Ken tetlajyouiltia guerra
Melak miyekej soldados niman akin chantij kampa nochiuaj guerras noso kampa noixnamikilo melak yotlajyouijkej, niman tlen inpan yonochiuj xueli kilkauaj.
SOLDADOS
Gary, akin ualeua Gran Bretaña, okijto: “Melak xkuajli ijkuak noixnamikilo pampa tikitas kenon kinmiktiaj oksekimej noso melak kinkokouaj. Nochipa timomojtijtos pampa uelis itlaj mopan nochiuas”.
Wilmar, akin ualeua Colombia, okijto: “Onechmotlakej ipan notepostlan niman ipan noxayak niman onikitak kenon kinmiktiayaj miyek kokonej niman ueuentsitsintin. Guerra kichiua maka xteikneli”.
Zafirah, akin ualeua Estados Unidos, okijto: “Ijkuak yakaj mixpan kimotlaj, xkeman uelis tikilkauas kenon tsajtsi niman kenon nokokoua. Xkeman tikilkauas akin ijkon okichiuilijkej”.
AKIN NOIJKI TLAJYOUIYAJ
Olexandra, akin ualeua Ucrania, okijto: “Oniknemili ika xok keman niyolpakiskia. Ijkuak noixnamikilo timomojtis pampa uelis mitsmiktiskej niman hasta uelis kinmiktiskej mofamilia noso moamigos”.
Daler, akin ualeua Tayikistán, okijto: “Nonekiya toformaroskej desde las 2 ika kualkan hasta las 11 ika tlayoua para techmakaskej tlakuajli. Sajnoye timomojtis ijkuak ompa tinemis pampa xtikmatis tla uelis mitsajxilis se bala”.
Marie, akin ualeua Ruanda, okijto: “Notajuan omikkej ipan se guerra niman san noselti oninokauj. Xakaj nechtlajpiaya niman xakaj nechyolseuiaya”.
Maski akin yotikinteneujkej yokixnamijkej miyek tlen xkuajli ipampa guerras, aman yolseujtokej. Noijki kuajli kimatstokej ika iyejkotok tonajli ijkuak xok nochiuaskej guerras niman xok noixnamikilos. Yejuin revista techasikamachiltia ika Biblia kenon nochiuas yejuin.