Matikteititikan ika tikintlakaitaj oksekimej

1. ¿Kenijki titomachiliaj ijkuak techtlakaitaj? (Proverbios 22:1).

TINOCHIMEJ tikuelitaj niman techyolpaktia matechtlakaitakan. Niman xsan yejon, noneki matechtlakaitakan. Ika yejon, Biblia kijtoua: “Más kuajli tla mitstlakaitaj, xijkon ken tla tikpiya plata niman oro” (xpoua Proverbios 22:​1, TNM).a

2, 3. ¿Tleka kemantika xueli titetlakaitaj, niman tlenon tikitaskej ipan yejuin tlamachtijli?

² Kanaj kemantika xmás uelij tikteititiaj ika titetlakaitaj pampa más tikitaj tlen xkuajli kichiuaj. Niman noijki, aman tinemij kampa miyekej xok tetlakaitaj. San ika, tejuamej kema tiknekij titetlakaitaskej pampa Jehová techtlajtlanilia matikintlakaitakan nochimej (1 Ped. 2:17).

³ Ipan yejuin tlamachtijli tikitaskej tlenon kijtosneki tikintlakaitaskej oksekimej niman kenijki tikteititiskej ika tikintlakaitaj 1) tochanejkauan, 2) tokniuan niman 3) akin xiteixpantijkauan Jehová. Más tikasikamatiskej kenijki titetlakaitaskej ijkuak techtekiyomakas.

¿TLENON KIJTOSNEKI TIKINTLAKAITAS OKSEKIMEJ?

4. ¿Tlenon kijtosneki tikintlakaitas oksekimej?

⁴ Tikintlakaitas oksekimej kijtosneki tlen tiknemiliaj intech yejuamej niman kenijki tikinnotsaj. Ijkuak tikitaj ika yakaj kuajli tlen kichiua noso kichiua tlen techmojkatlachialtia noso ueli technauatia, tikteititiaj ika tiktlakaitaj itech ken tiknotsaj. Niman noneki matitetlakaitakan, san ika, noneki kisas ipan toyojlo (Mat. 15:8).

5. ¿Tleka tikintlakaitaj oksekimej?

⁵ Jehová kineki matikintlakaitakan oksekimej. Yejua technauatia “makintlakamatikan gobiernos akin uejueyixtokej” (Rom. 13:​1, 7). San ika, kanaj yakaj kijtos: “Nejua niktlakaita akin kinotlanilia”. ¿Kuajli tla ijkon titlanemiliaj? Ka. Akin tiktekichiuiliaj Jehová noneki tikintlakaitaskej oksekimej, pero xtikintlakaitaj ipampa tlen kichiuaj noso ipampa tlen xkichiuaj. Tejuamej tikintlakaitaj pampa tiktlasojtlaj Jehová niman tiknekij tikyolpaktiskej (Jos. 4:14; 1 Ped. 3:15).

6. ¿Uelis tiktlakaitaskej yakaj akin xtechtlakaita? (Noijki xkita tlaixkopinajli).

⁶ Kanaj totlajtoltiaj: “¿Uelis tiktlakaitaskej yakaj akin xtechtlakaita?”. Kema. Matitlanemilikan itech yejuin. Tekiuaj Saúl okipijpinaujti ikoneuj Jonatán imixpan oksekimej (1 Sam. 20:​30-34). Maski ijkon, Jonatán nochipa okitlakaitak itaj niman iuan oteixnamik hasta ijkuak Jonatán omik (Éx. 20:12; 2 Sam. 1:23). Ueyi teopixki Elí, okijto ika Ana yotlauanka (1 Sam. 1:​12-14). Maski ijkon, yejua kuajli okinankili maski nochimej israelitas kimatiyaj ika Elí xokimijli ikoneuan tlen xkuajli kichiujtoyaj ijkon ken se tajtli noneki kinnotsas ikoneuan, niman xokichiuj ijkon ken noneki kichiuas se ueyi teopixki (1 Sam. 1:​15-18; 2:​22-24) Niman sekimej tlakamej akin chantiyaj Atenas, okijtokej ika Pablo, “nion xkimati tlenon kijtojtinemi” (Hech 17:18). San ika, Pablo nochipa okintlakaitak ijkuak okinnots (Hech. 17:22). Nochi yejuin techititia ika noneki tikintlakaitaskej oksekimej maski tikmachiliskej ika xtiuelij. Niman noneki tikchiuaskej pampa melak tiktlasojtlaj Jehová niman xtiknekij tikyolkokoskej. Aman matikitakan akinomej noneki tikintlakaitaskej niman tleka.

MATIKINTLAKAITAKAN TOCHANEJKAUAN

7. ¿Tlenon uelis kichiuas maka matikintlakaitakan tochanejkauan?

⁷ Tlen uelis kichiuas maka matikintlakaitakan tochanejkauan. Ijkuak tiuejkauij tinemij imiuan tochanejkauan, tikitaj tlen kuajli kichiuaj niman tikitaj kenijki nopopolouaj. Noijki, kanaj tikinpiyaj tochanejkauan akin kualoj niman yejon kichiua matechtekiyomaka tikintlajpiliskej, noso kanaj ajmankamikij pampa kualoj. Noso sekimej kanaj techchiuiliskej noso kijtoskej itlaj tlen techyolkokos. Noneki ika toyojlo tomachiliskej ijkuak tinemiskej imiuan tochanejkauan, san ika, ijkuak xnotlakaitaj sa no yejuamej uelis nokualaniskej. Nochi yejon uelis kichiuas maka kuajli matouikakan imiuan tochanejkauan. Uelis tikijtoskej ika se familia yeskia ijkon ken totlalnakayo. Se kokolistli uelis kichiuas ika totlalnakayo maka kuajli matekiti. Noijki ijkon, tla tochanejkauan xnotlakaitaj, yejon uelis kichiuas maka kuajli manouikakan. San ika, ijkon ken ijkuak techajsi se kokolistli uelis tipajtiskej, ipan se familia noijki uelis kuajli nouikaskej niman notlakaitaskej.

8. ¿Tleka noneki tikintlakaitaskej tochanejkauan? (1 Timoteo 5:​4, 8).

⁸ ¿Tleka noneki titetlakaitaskej? (Xpoua 1 Timoteo 5:​4, 8.) Ipan kachtopa carta tlen Pablo okijkuilouili Timoteo, okijto tlenon noneki kichiuaskej akin nemij ipan se familia para notlajpiliskej. Noijki okijto ika xnoneki tikintlakaitaskej tochanejkauan san pampa noneki ijkon tikchiuaskej. Noneki tikintlakaitaskej pampa tiknekij tikyolpaktiskej toTajtsin noso pampa tiktlasojtlaj Jehová, niman noijki pampa ijkon tikueyichiuaj. Ijkuak tikintlakaitaj tochanejkauan, kentla tiktlakaitstokej Jehová pampa yejua Okichijchiuj familia (Efes. 3:​14, 15). Ika yejon, melak noneki titetlakaitaskej.

9. ¿Kenijki teueuentsin niman tesiuauj uelis kiteititiskej ika notlakaitaj? (Noijki xkimita tlaixkopinaltin).

⁹ ¿Kenijki titetlakaitaskej? Teueuentsin akin kitlakaita isiuatsin, kiteititia ika kitlasojtla ijkuak teixpan niman san inselti nemij (Prov. 31:28; 1 Ped. 3:7). Xkeman kiuisoki nion xkeman kipijpinaujtia, nion xkichiua makimachili ika xtlaj ika tepaleui. Ariel,b se tokniuj akin chanti Argentina, kijtoua: “Nosiuatsin san tlenon nechijlia pampa kualo. Ijkuak ijkon panoua, nikilnamiki ika xyejon tlen yejua yemelak kimachilia. Ijkuak nikmachilia ika xok niueli, nikilnamiki 1 Corintios 13:5 niman yejon nechpaleuiya maniktlakaita niman kualtsin maniknotsa” (Prov. 19:11). Noijki, tesiuatsin akin kitlakaita iueuentsin, kuajli itech tlajtoua imixpan oksekimej (Efes. 5:33). Xkitejteneua nion xkikamanaluiya para kipijpinaujtis, noijki xkiyolkokoua ika tlen kijtoua. Yejua kimatstika ika tla ijkon kichiuaskia xok kuajli nouikaskia iuan iueuentsin (Prov. 14:1). Se tokniuj akin chanti Italia niman iueuentsin ajmankamiki noso kipiya ansiedad, kijtoua: “Kemantika nikmachilia ika yejua sa nochi kajmana. Yeuejkaui, ika tlen nikijtouaya niman ika tlen nesiya ipan noxayak nikteititiaya ika xniktlakaitaya. Pero, yonikitak ika pampa aman ninouika imiuan akin kintlakaitaj oksekimej, yejon nechpaleuiya noijki maniktlakaita noueuentsin”.

10. ¿Kenijki telpokamej uelis kiteititiskej ika kintlakaitaj intajuan?

¹⁰ Telpokamej, xkintlakamatikan nemotajuan niman xkintlakaitakan ijkuak nenkinnotsaskej (Éx. 21:17; Efes. 6:​1-3). Ijkuak yejuamej más yeuejueyiyaskej noneki más tikintlajpiyaskej. Kuakon, xmokojtilikan kuajli nenkintlajpiliskej. Matitlajtokan itech se tokniuj akin itoka María. Ijkuak, okualok itaj akin xiteixpantijkauj Jehová, yejua opeuj kitlajpiya maski melak okitekiyomakak. María kijtoua: “Niktlajtlaniliaya Jehová manechpaleui manikititi notaj ika niktlakaita. Sa no nejua ninoijliaya ika tla Jehová nechtlajtlanilia manikintlakaita notajuan yejua nechpaleuis ijkon manikchiua. Sakin, onikasikamat ika noneki niktlakaitas notaj maski yejua maka manopatla”. Ijkuak tikintlakaitaj tochanejkauan, maski nopopolouaj, tikteititiaj ika tiktlakaitaj Jehová akin okichijchiuj familia.

MATIKINTLAKAITAKAN TOKNIUAN

11. ¿Tlenon uelis kichiuas maka matikintlakaitakan tokniuan?

¹¹ Tlen uelis kichiuas maka matikintlakaitakan tokniuan. Maski tokniuan nokojtiliaj kichiuaskej tlen kijtoua Biblia, kemantika xkualtsin technotsaskej, kinemiliskej tlen xkuajli totech noso techtlauelmiktiskej. Tla yakaj kinamiki iuan tikualantoskej kanaj techtekiyomakas tiktlakaitaskej (Col. 3:13). Matikitakan tlenon uelis techpaleuis.

12. ¿Tleka noneki tikintlakaitaskej tokniuan? (2 Pedro 2:​9-12).

¹² ¿Tleka noneki titetlakaitaskej? (Xpoua 2 Pedro 2:​9-12). Ipan ika ome carta tlen Pedro okijkuilo. Okijto ika sekimej tokniuan akin nemiyaj ipan kachtopa siglo, xkuajli tlajtojtoyaj intech “akin tlayekanaj”. ¿Tlenon okichiujkej ángeles ijkuak okitakej yejon? Pedro okijto ika pampa “kitlakaitaj Jehová” xokijtojkej itlaj tlen xkuajli intech yejon tlakamej akin xtetlakaitayaj niman noueyimatiyaj. Melak temojkatlachialti ika yejon ángeles, xokijtokej itlaj tlen xkuajli intech yejuamej pampa okikauilijkej Jehová makintlajtlakolmaka (Rom. 14:​10-12; uelis tikitas Judas 9). ¿Tlenon tiuelij itech tlen okichiujkej ángeles? Ika tla yejuamej okintlakaitakej akin teixnamikij, tejuamej más noneki tikintlakaitaskej nochimej tokniuan akin kitlasojtlaj Jehová. Tejuamej akin kachtopa noneki tikimititiskej oksekimej ika tikintlakaitaj (Rom. 12:10). Tla ijkon tikchiuaj, tikteititiaj ika tiktlakaitaj Jehová.

13, 14. ¿Kenijki uelis tikteititiskej ika tikintlakaitaj tokniuan? (Noijki xkimita tlaixkopinaltin).

¹³ ¿Kenijki titetlakaitaskej? Tlayekankej, nochipa xteititikan ika nentetlasojtlaj ijkuak nentemachtiaj (Filem. 8, 9). Tla noneki yakaj nenkijliskej ika yokichiuj tlen xkuajli, kualtsin xnotsakan niman maka xtlauelmikikan. Nokniuan siuamej, maka san xtetejteneuakan nion xtetlajtolchijchiuilikan. Tla ijkon nenkichiuaj, ipan tlanechikojli nochimej notlakaitaskej (Tito 2:​3-5). Niman tinochimej uelis tikteititiskej ika tikintlakaitaj tlayekankej. ¿Kenijki uelis ijkon tikchiuaskej? Tla tikinpaleuiyaj niman tla tikimijliaj ika tiktlasojkamatij nochi tlen kichiuaj pampa kinyekanaj tlanechikoltin, kitaj kenijki titenojnotsaskej niman kinpaleuiyaj akin okichiujkej tlen xkuajli (Gál. 6:1; 1 Tim. 5:17).

¹⁴ Se tokniuj akin itoka Rocío kitekiyomakaya kitlakaitas se tlayekanketl akin okimakaka se consejo. Yejua kijtoua: “Onikmachili ika xkualtsin onechnots. Nochan xkuajli itech nitlajtouaya. Nikyejyekouaya ika maka manesi tlen nikmachiliaya, san ika, ipan noyojlo niknemiliaya ika xmelauak najmanaya nopampa niman xkinekiya nechpaleuis, ika yejon, xonikchiuj tlen onechijli”. Tokniuj kijtoua ika okipaleui ijkuak okiamapouj 1 Tesalonicenses 5:​12, 13. Yejua kijtoua: “Onikitak ika xniktlakaitaya tokniuj. Kuakon notlamachilis opeuj nechpajsoloua. Oniknots Jehová, niman opeuj niktejtemoua ipan toamatlajkuiloluan tlen nechpaleuis manikpatla ken nitlanemiliaya. Sakin, onikasikamat ika nejua akin ninoueyimatiya niman tokniuj kema kinekiya nechpaleuis. Aman nikasikamati ika tla nikneki nikteititis ika nitetlakaita noneki niyolyemanki yes. Nikmatstok ika ok nechpoloua, san ika, ninokojtilijtika niman nikmatstok ika Jehová kitstika”.

MATIKINTLAKAITAKAN AKIN XITEIXPANTIJKAUAN JEHOVÁ

15. ¿Tleka kemantika xueli tikintlakaitaj akin xiteixpantijkauan Jehová?

¹⁵ Tlen uelis kichiuas maka matikintlakaitakan akin xiteixpantijkauan Jehová. Ijkuak titenojnotsaj, miyekpa tikinnextiaj akin xtlaj kinekij kimatiskej itech toTajtsin nion itech Biblia (Efes. 4:18). Sekimej xkinekij techkakiskej ijkuak tikinnojnotsaj ipampa tlen okinmachtijkej ijkuak pipitikej katka. Noijki, kanaj noneki tikinxikoskej akin intech titekitij noso maestros pampa miyek tlen techtlajtlaniliaj niman xkeman ueli tikinyolpaktiaj. Noso noijki noneki titlaxikoskej pampa akin imiuan tomachtiaj ipan escuela noso akin imiuan titekitij xkuajli ken tlajtouaj niman xkualtsin technotsaj. Nochi yejon uelis kichiuas maka sa matikintlakaitakan niman maka matikinchiuilikan tlen tejuamej tikuelitaskiaj matechchiuilikan.

16. ¿Tleka melak noneki matikintlakaitakan akin xekitekichiuiliaj Jehová? (1 Pedro 2:12; 3:15).

¹⁶ ¿Tleka noneki titetlakaitaskej? Xkilnamikikan ika Jehová kuajli kitstok kenijki tikinnotsaj akin xiteixpantijkauan Jehová. Apóstol Pedro okimilnamikti tokniuan ika tlen kichiuayaj ueliskia kichiuas ika oksekimej makiueyiteneuakan toTajtsin. Yejua ika, okimijli ika ijkuak kiteijliskej tlen kineltokaj mayolseujtokan niman makiteititikan ika tetlakaitaj (xpoua 1 Pedro 2:12; 3:15). Ijkuak kiteijliskej tlen kineltokaj ixpan se juez noso ixpan okse yakaj, nochipa noneki kiteititiskej ika kintlakaitaj oksekimej, kentla tla toTajtsin ompa nemiskia. Melak noneki matikintlakaitakan akin xiteixpantijkauan Jehová pampa toTajtsin kitstika tlen tikijtouaj niman kenijki tikijtouaj.

17. ¿Kenijki tikteltiaj ika tikintlakaitaj akin xiteixpantijkauan Jehová?

¹⁷ ¿Kenijki titetlakaitaskej? Ijkuak titenojnotsaj, xtiknekij tikchiuaskej tlen makiteititi ika tejuamej más tiuejueyixtokej niman ika akin tikinnojnotsaj xmás kimatij itech Biblia. Matikilnamikikan ika toTajtsin nochimej kintlasojtla niman matikimitakan ika yejuamej más uejueyixtokej xijkon ken tejuamej (Ageo 2:7; Filip. 2:3). Tla yakaj san tlemach itlaj tlen techijlia ipampa tlen tikneltokaj, maka matotlakuepiltikan, noijki maka matikijtokan itlaj tlen makiteititi ika tejuamej más titlamachilisejkej niman ika yejuamej semi xtlaj kimatij (1 Ped. 2:23). Tla tikijtouaj itlaj tlen xnonekiya, nimantsin matikteijlikan matechtlapopoluikan. Niman ipan totekiyo noijki uelis tikteititiskej ika titetlakaitaj tla titekitkej niman tla tokojtiliaj tikitaj tlen kuajli kichiuaj akin imiuan titekitij niman akin itech titekitij (Tito 2:​9, 10). Noijki, melak noneki matikteititikan ika uelis totech tlaneltokaskej, niman ika nochi toyojlo matitekitikan. Maski xnochipa uelis tikinyolpaktiskej oksekimej, Jehová kema uelis nochipa tikyolpaktiskej (Col. 3:​22, 23).

18. ¿Tlenon otiuelkej ipan yejuin tlamachtijli?

¹⁸ Yotikitakej tleka noneki tikintlakaitaskej oksekimej. Otiuelkej ika tla tikintlakaitaj tochanejkauan, tiktlakaitstoskej Jehová, akin Okichijchiuj familia. Noijki, tla tikintlakaitaj tokniuan, tiktlakaitstoskej toTajtsin akin nemi ipan cielo. Niman tla tikintlakaitaj akin xiteixpantijkauan Jehová, yejon uelis kichiuas makiueyiteneuakan niman makitlakaitakan toueyiTajtsin. Maski tla sekimej xtechtlakaitaj, melak kuajli tla tejuamej kema tikintlakaitaj pampa Jehová techteochiuas. Yejua kijtoua: “Nikintlakaitas yejuan nechtlakaitaskej” (1 Sam. 2:30).