Nisura Yohane
11 Samuza maʼökhö, so zofökhö sotöi Lazaro banua Mbetania, banua si toröi Maria faoma Marata talifusönia.+ 2 Maria andre zombayoini ahe Zoʼaya me mböröta faoma fanikha somuhua ba iʼosi faoma bunia.+ Talifusönia Lazaro sofökhö andrö. 3 Börö daʼö, lafaʼoheʼö goroisara ira Maria faoma Marata ba wangombakha khö Yesu, ”He Soʼaya, mofökhö zi fahuwu khöu, niha niʼomasiʼömö andrö.” 4 Me irongo daʼö Yesu imane, ”Tenga solohe faʼamate wökhönia andrö, hizaʼi samolakhömi Lowalangi,+ enaʼö tefolakhömi Nono Lowalangi ba daʼö.”
5 Marata, Maria hegöi Lazaro, iʼomasiʼö sibai ira Yesu. 6 Me irongo duria wa mofökhö Lazaro, toröi ia nasa ba daʼö dua hari tö. 7 Aefa daʼö, imane khö ndra nifahaʼönia, ”Tafuli zui ita ba Yudea.” 8 Lamane ira nifahaʼönia, ”He Samahaʼö,+ awena yaʼi laʼalui lala ira niha Yudea ba wanebu yaʼugö faoma kara.+ Hadia öfuli zui möi ba daʼö?” 9 Imane Yesu, ”So 12 za zi maʼö-maʼökhö lö?+ Lö manendre niha sofanö ba zi maʼökhö, börö me mohaga gulidanö. 10 Hizaʼi, manendre niha sofanö ba zi bongi, börö me lö khönia haga.”
11 Me no aefa iwaʼö daʼö, imane nasa, ”No mörö Lazaro si fahuwu khöda,+ ba möi ndraʼo ba daʼö wanusugi yaʼia.” 12 Lamane ira nifahaʼönia, ”He Soʼaya, na si mörö ia, tatu döhö ia.” 13 Sindruhunia, eluaha niwaʼö Yesu no mate Lazaro. Hizaʼi, lawalingagö sindruhu femörö niwaʼönia. 14 Andrö ifatunö khöra Yesu zindruhunia, ”No mate Lazaro.+ 15 Omuso dödögu ba khömi, börö me lö yaʼo ba daʼö, enaʼö itugu faduhu dödömi. Tabu, möi ita khöra.” 16 Imane Toma nifotöi si Faero khö ndra nifahaʼö tanö böʼö, ”Aine, möi ita göi, enaʼö mate ita awönia.”+
17 Me irugi Yesu, iʼila wa no öfa hari Lazaro ba lewatö. 18 Faʼahatö Mbetania ba Yeruzalema, so mato tölu kilometer.* 19 Ato niha Yahudi si möi mondrara tödö Marata faoma Maria börö me no mate dalifusöra. 20 Me irongo Marata wa tohare Yesu, möi ia ifalukhaisi, ba toröi Maria+ ba nomo. 21 Imane Marata khö Yesu, ”He Soʼaya, na so menaʼö ndraʼugö ba daʼa, ba lö mate dalifusögu. 22 Hizaʼi, faduhu sibai dödögu, gofu hadia manö niʼandrömö hasambalö ifondrondrongo Lowalangi.” 23 Imane Yesu, ”Hasambalö ifuli auri dalifusömö.” 24 Itema linia Marata, ”Aboto ba dödögu wa ifuli maoso ia na alua wanusugi+ ba ngaluo safuria.” 25 Imane khönia Yesu, ”Yaʼodo wemaoso ba faʼauri.+ Dozi samati khögu isöndra waʼauri hewaʼae no mate ia, 26 ba dozi niha sauri ba samati khögu, lö irai mate ira.+ Hadia faduhu dödöu?” 27 Imane Marata, ”He Soʼaya, faduhu dödögu wa Keriso ndraʼugö, Ono Lowalangi si möi ba gulidanö.” 28 Me no aefa iwaʼö daʼö, möi Marata ba wogaoni Maria, fangöngö ia imane, ”No tohare Zamahaʼö,+ ikaoni ndraʼugö.” 29 Me irongo daʼö, iʼanemaiʼö mosindro Maria ba mofanö ia wamalukhaisi Yesu.
30 Lö nasa sofeta Yesu ba mbanua daʼö. Ba zi falukha ira Marata so ia nasa. 31 Me iʼanemaiʼö mosindro ba mofanö Maria, laʼila ia ira niha Yahudi si möi mondrara tödönia ba laʼoʼö ia. Lawalinga möi ia ba lewatö+ wangeʼesi Lazaro. 32 Me irugi nahia si so Yesu ba falukha ira, ituhi danö Maria ba imane, ”He Soʼaya, na so menaʼö ndraʼugö ba daʼa, ba lö mate dalifusögu.” 33 Me iʼila Yesu meʼe Maria hegöi ira niha Yahudi si fao khönia, abu sibai dödönia ba ifatalikhö ia. 34 Imane, ”Hezo so mifadölö ia?” Lamane, ”He Soʼaya, tabu ae faigi.” 35 Ilau meʼe Yesu.+ 36 Ibörögö lamane ira niha Yahudi, ”Hiza, iʼomasiʼö sibai Lazaro!” 37 So göi zangumaʼö, ”Tola ifadöhö niha sauʼa.+ Hana wa lö itaha enaʼö böi mate niha daʼa?”
38 Ifuli zui abu dödö Yesu ba möi ia ba lewatö. Sindruhunia, lewatö daʼö tögi narö hili si no labalugö faoma kara sebua. 39 Imane Yesu, ”Miheta gara andrö.” Aefa daʼö imane Marata talifusö zi mate andrö, ”He Soʼaya, aböu saʼae börö me no öfa hari mate ia.” 40 Imane khönia Yesu, ”Hadia tenga no uwaʼö, na faduhu dödöu hasambalö öʼila lakhömi Lowalangi?”+ 41 Ba laheta gara andrö. Aefa daʼö, ifaöga ia+ Yesu imane, ”He Ama, uʼandrö saohagölö khöu börö me no öfondrondrongo wangandrögu. 42 Aboto ba dödögu wa lö mamalö-malö öfondrondrongo wangandrögu, hizaʼi fahuhuo ndraʼo salahi niha sato si zizio ba daʼa, enaʼö faduhu dödöra wa yaʼugö zamatenge yaʼo.”+ 43 Me no aefa iwaʼö daʼö, ebua linia weʼao, ”He Lazaro, ae baero!”+ 44 Möi baero niha si no mate andrö. No laʼolohuni gahe, tanga hegöi bawania faoma nukha. Imane khöra Yesu, ”Mitotoʼö nukha andrö khönia enaʼö tola mofanö ia.”
45 Börö daʼö, ato niha Yahudi sangondrasi Maria, mamati ira khö Yesu me no laʼila nifaluania.+ 46 Hizaʼi, so ösa zi möi mangombakha khö ndra Farizaiʼo hadia nifalua Yesu. 47 Börö daʼö, laʼowuloi zohalöwö ba gödo zanguhuku ira Farizaiʼo hegöi ira kafalo gere, ba lamane, ”Hadia nifaluada? Oya dandra sahöli-höli dödö nifalua niha daʼö.+ 48 Na tatehegö manö ifalua zimane daʼa, mamati khönia fefu niha, ba tohare niha Romawi ba wangai nahia niʼamoniʼö* hegöi soida.” 49 Samösa gere sebua ba gotaluara me luo daʼö sotöi Kayafa+ imane, ”Lö miʼila mbalö, 50 ba lö aboto ba dödömi wa sökhi mate zi samösa niha salahi zi sambua soi moroi na tehori fefu mbanua daʼa.” 51 Sindruhunia, tenga moroi ba dödönia iwaʼö wehede daʼö. Hizaʼi, börö me ere sebua ia me luo daʼö, ifaʼeleʼö wa mate Yesu salahi soi andrö, 52 tenga ha salahi soi daʼö, tobali ba wangowuloi ono Lowalangi si no muzawili göi. 53 Iʼotarai daʼö, mamagölö ira ba wamunu yaʼia.
54 Börö daʼö, lö saʼae itörö föna niha sato Yesu ba gotalua niha Yahudi. Mofanö ia moroi ba daʼö numalö ba mbanua sahatö ba danö si mate, banua sotöi Eferai,+ ba daʼö toröi ia awö ndra nifahaʼönia. 55 Me arakhagö alua Gowasa Fasa+ ba niha Yahudi, ato niha si otarai mbanua side-ide möi ira ba Yeruzalema ba wamalua fangehao boto fatua lö alua Wasa. 56 Laʼalui Yesu ba lamane me mozizio ira ba gosali, ”Hewisa moloʼö yaʼami? Hadia sindruhu-ndruhu lö möi ia ba gowasa?” 57 No labeʼe fareta ira kafalo gere hegöi ira Farizaiʼo, enaʼö laʼombakhaʼö na so zangila hezo Yesu ba wondraʼu yaʼia.