Kenese

11 NE taha maka e vagahau, ti taha ni e kupu he lalolagi oti.

2 Kua hoko foki he o mai a lautolu he fahi uta, ti moua ai e lautolu e kelekele tatai ke he motu ko Sinara, ti nonofo ai a lautolu.

3 Ti fevagavagahauaki na lautolu ko e taha ke he taha, Hau ā ke eke e tautolu e tau maka kelekele, ti tunu fakalahi ke he afi. Ti eke e tau maka kelekele mo maka ha lautolu, mo e hemeri foki kua eke mo puga ha lautolu.

4 Ti pehe age a lautolu, O mai ā, kia ati e tautolu taha maga, mo e taha kolo, kia hoko hana tapunu ke he lagi; kia eke e tautolu e mena ke talahaua ai a tautolu, neke mavehevehe fano a tautolu ke he lalolagi oti kana.

5 Ti haele hifo a Iehova ke kitekite ke he maga, mo e kolo, kua ati he tau tagata.

6 Ti pehe a Iehova, Kitiala, taha ni e motu, ti taha e vagahau ia lautolu oti; kua kamata foki a lautolu ke eke e mena nai, ko e hanai, nakai tuai maeke ke taofi a lautolu ke he taha mena taha kua manatu a lautolu ke eke.

7 O mai a, kia o hifo a tautolu mo e fakakehekehe ha lautolu a vagahau kia nakai tuai logona he taha tagata e vagahau he taha tagata.

8 Ti fakamavehevehe e Iehova a lautolu he mena ia ke he lalolagi oti; ati toka ai e lautolu e maga nakai ati.

9 Ko e mena ia ne ui ai hana higoa ko Papelu, ha ko e mena ia ne fakakehekehe ai e Iehova e vagahau he lalolagi oti; ko e mena foki ia ne fakamavehevehe ai e Iehova a lautolu ke he lalolagi oti.

10 Ko e matohiaga hanai a Semu; taha ni e teau he tau tau a Semu, ti fanau ai e ia a Afakasata ke he tau ua tali he mole e fakapuke;

11 Kua fanau e Semu a Afakasata, ti moui ai a ia lima e teau he tau tau, ne fanau foki e ia e tau tama tane mo e tau tama fifine.

12 Ne tolugofulu ma lima e tau tau ne moui a Afakasata ti fanau ai e ia a Silaha;

13 Kua fanau e Afakasata a Silaha, ti moui ai a ia fa e teau he tau tau ti tolu ni e tau, ne fanau foki e ia e tau tama tane mo e tau tama fifine.

14 Ne tolugofulu e tau tau ne moui ai a Silaha, ti fanau ai e ia a Heperu;

15 Kua fanau e Silaha a Heperu, ti moui ai a ia fa e teau he tau tau ti tolu e tau, ne fanau foki e ia e tau tama tane mo e tau tama fifine.

16 Ne tolugofulu ma fa e tau tau ne moui ai a Heperu, ti fanau ai e ia a Peleko;

17 Kua fanau e Heperu a Peleko, ti moui ai a ia fa e teau he tau tau ti tolugofulu, ne fanau foki e ia e tau tama tane mo e tau tama fifine.

18 Ne tolugofulu e tau tau ne moui ai a Peleko, ti fanau ai e ia a Reu;

19 Kua fanau e Peleko a Reu, ti moui ai a ia ua e teau he tau tau ti fitu e tau, ne fanau foki e ia e tau tama tane mo e tau tama fifine.

20 Ne moui a Reu tolugofulu ma ua e tau tau, ti fanau ai e ia a Saruka;

21 Kua fanau e Reu a Saruka, ti moui ai a ia ua e teau he tau tau, ti fitu e tau, ne fanau foki e ia e tau tama tane mo e tau tama fifine.

22 Ne moui a Saruka tolugofulu e tau tau, ti fanau ai e ia a Nakori;

23 Kua fanau e Saruka a Nakori, ti moui ai a ia ua e teau he tau tau, ne fanau foki e ia e tau tama tane mo e tau tama fifine.

24 Ne moui a Nakori uafulu ma hiva e tau tau ti fanau ai e ia a Taraha;

25 Kua fanau e Nakori a Taraha, ti moui ai a ia ua e teau e tau tau, ti hogofulu ma hiva e tau, ne fanau foki e ia e tau tama tane mo e tau tama fifine.

26 Ne moui a Taraha fitugofulu e tau tau ti fanau ai e ia a Aperamo, Nakori, mo Arana.

27 Ko e matohiaga hanai a Taraha; ne fanau e Taraha a Aperamo, Nakori, mo Arana; ne fanau foki e Arana a Lota.

28 Ti mate ni a Arana ka e moui agaia hana matua tane ko Taraha, ke he motu ne fanau ai a ia, ko Uro ia i Kaletaia.

29 Ti faihoana ai a laua ko Aperamo mo Nakori; ko e higoa he hoana a Aperamo ko Sarai ia; ka ko e higoa he hoana a Nakori ko Mileka ia, ko e tama fifine a Arana, ko e matua tane ia a Mileka; ko e matua tane foki a Iseka.

30 Ne tufua foki a Sarai, nakai fai tama a ia.

31 Ne uta foki e Taraha hana tama ko Aperamo, mo Lota ko e tama a Arana, ko e tama haia he hana tama, mo Sarai ko e hana figona fifine, ko e hoana he hana tama ko Aperamo; ti o ai fakalataha a lautolu i Uro i Kaletaia ke o ke he motu ko Kanana; kua hohoko foki a lautolu ki Karana ti nonofo ai a lautolu.

32 Ko e tau aho foki a Taraha ne ua e teau ia he tau tau ti lima e tau; ti mate ai a Taraha i Karana.