Tau Salamo

2 KO e ha ne go ai e tau motu kehe, mo e manamanatu ai e tau tagata ke he tau mena nakai aoga?

2 Kua tutu mai e tau patuiki he lalolagi, kua pulega fakalataha foki e tau iki, ke totoko atu kia Iehova mo ia ne fakauku e ia.

3  “Kia momotu e tautolu ha laua a tau liliaga, mo e tiaki ha laua a tau toua mai ia tautolu.”

4 To kata a ia kua haele ke he lagi; to va e Iki kia lautolu.

5 Ti vagahau atu ai a ia kia lautolu ke he hana ita, ti fakamatakutaku foki e ia a lautolu ke he hana ita lahi.

6 Ka ko au, kua fakauku tuai e au haku a Patuiki ki luga a Siona, ko e haku a mouga tapu.

7 To tokutoku atu e au e fakatufono; na pehe mai a Iehova kia au, Ko e haku a Tama a koe, ko e aho nai kua fanau ai e au a koe.

8 Kia ole mai a koe kia au, ti ta atu ai e au e tau motu kehe mo fonua hāu; mo e tau kala he lalolagi ke eke māu.

9 To pakipaki e koe a lautolu ke he tokotoko lapatoa; to lipilipi e koe a lautolu tuga ne kapiniu he tagata eke kapiniu kelekele.

10 Hanai, ko mutolu ko e tau patuiki na e, kia loto matala a mutolu; kia ako a mutolu ko e tau fakafili he lalolagi.

11 Kia fekafekau kia Iehova mo e matakutaku, kia fiafia foki mo e vivivivi.

12 Kia figita ā e Tama neke ita mai a ia, mo e mahaikava ai a mutolu ke he puhala; ha ko e mena tupu vave hana ita. Uhoaki a lautolu oti kana kua tua kia ia.