Fakamatalaaga

6 HA ha i ai e mena kelea kua kitia e au i lalo he lā, kua mamafa foki ia ke he tau tagata;

2 Ko e tagata kua foaki ki ai he Atua e koloa, mo e tau mena loga, mo e lilifu, nakai nofogati foki a ia ke he taha mena he tau mena oti kua manako a ia ki ai, ka e nakai foaki atu he Atua kia ia e malolo ke kai ai, ka e kai ai he tagata kehe. Ko e mena fakateaga haia, ko e gagao kelea haia.

3 Kaeke ke fanau e tagata e tau tama toko teau, kua loga foki e tau he moui ai a ia, ti loga e aho he tau tau hana, ka e nakai makona hana loto ke he mitaki, kua nakai fai tukuaga foki a ia ka mate; kua pehe au, Kua mua e mitaki he fanau maua ke he tagata na.

4 Ha kua hau a ia ko e mena fakateaga, kua fina atu foki a ia mo e pouli, kua ufiufi ai foki hana higoa ke he pouli;

5 Nakai kitia foki e ia e la, to nakai iloa e ia ha mena; kua mua hana a okiokiaga ke he taha.

6 Kaeke foki ke moui a ia ke ua e afe tau hana, nakai ni kitia e ia ha monuina; nakai kia o atu e tau tagata oti ke he mena taha?

7 Ko e tau gahua oti he tagata ma e hana gutu haia, ka e nakai ni makona e manako.

8 Ko e heigoa foki e mena ne toka ai ke he tagata iloilo ke mua ai a ia ke he tagata goagoa? ko e heigoa e mena ha ha i ai ke he tagata nofogati, kua iloa ke faifano ki mua he tau tagata momoui?

9 Kua mua e mitaki he mena kua moua, ke he mena kua manako ki ai e loto; ko e mena fakateaga foki haia, mo e kai ai e matagi.

10 Ko ia ha ha i ai nai kua oti he ui ai a ia ke he hana higoa, kua iloa foki a ia ko e tagata; nakai maeke foki kia ia ke taufetoko mo ia kua mua hana malolo ke he malolo hana.

11 Ko e loga ni e mena kua fakaloga ai e tau mena fakateaga, ko e heigoa kia e mena kua moua ai he tagata?

12 Ha ko hai kua iloa e mena ke mitaki ai e tagata ke he mouiaga nai, ko e tau aho oti nai he hana moui fakateaga, kua mole atu a ia tuga ne ata? po ko hai foki ke fakailoa atu ke he tagata e mena ke tupu ai i lalo he lā ka mole atu a ia?