Ieremia

9 KO hai ke eke haku ulu mo maga vai, mo e haku tau mata mo vaipuna ke puna ai e tau hihina mata, kia tagi ai au ke he aho mo e po ha ko lautolu ne keli he tamafifine he haku a motu?

2 Ko hai ke tamai maku ke he tutakale e fale api ke api ai e tau fenoga; kia toka e au haku a motu mo e fano kehe ai? ha ko e tau tagata faivao a lautolu oti, ko e fakapotopotoaga he tau tagata fakavai.

3 Kua loloku e lautolu ha lautolu a tau alelo tuga ne tau kaufana ha lautolu, ke vagahau pikopiko ai; ti nakai malolo a lautolu ke eke mena mo e fakamoli ke he motu; ha kua homo atu ha lautolu a mahani, ti nakai iloa e lautolu au, kua pihia mai a Iehova.

4 A mutolu takitokotaha ke he ha mutolu a tau matakainaga, ti ua tua a mutolu ke he taha matakainaga; ha kua takitaha e tau matakainaga oti mo e fakavai hana matakainaga, mo e tau matakainaga oti kua takitaha mo e faifano mo e feutaaki tala.

5 Kua takitaha a lautolu mo e fakavai hana matakainaga, ti nakai vagahau mo e fakamoli a lautolu, kua fakamahani e lautolu e tau alelo ha lautolu ke vagahau mo e pikopiko, kua oti e manava ha lautolu he eke e tau mahani keukeu.

6 Ko e mena kua nofo ai a koe ha ha i loto he motu fakavai haia; ko e mahani fakavai ti nakai mafai a lautolu ke iloa au, kua pihia mai a Iehova.

7 Ko e mena ia kua vagahau mai pehe a Iehova Sapaota, Kitiala, to kamatamata e au a lautolu, mo e kumikumi e au kia lautolu, ha ko e mena ko e heigoa foki ke eke e au ke he tamafifine he haku a motu?

8 Ko e tau alelo ha lautolu ko e tau fana ia ke mamate ai; kua vagahau mo e fakavai; kua takitaha a lautolu mo e vagahau he gutu hana mo e mafola ke he hana matakainaga, ka ko e loto hana kua lamalamati kia ia.

9 Kua pehe mai a Iehova; nakai kia ahi e au a lautolu ha ko e tau mena ia? Nakai kia lalago atu he agaga haku ke he motu pehena?

10 Ha ko e atu mouga to tagi au, mo e tagi aue ai, ko e tagi tatuki foki ha ko e tau mena he tutakale ne toka ai e vao mui, ha kua huhunu, ti nakai o age ai e tau tagata; ti nakai logona ai e leo he tau manu; kua fehola e tau manu lele he pulagi katoa mo e tau manu huifa, kua o a lautolu.

11 To eke foki e au a Ierusalema mo tanakiaga maka, ko e mena ke ofaga ai e tau luko; ti eke ai e au e tau maga a Iuta mo tau mena kua moumou, nakai nofo ai taha.

12 Ko hai kia e tagata iloilo ke logona ai e ia e mena nai? po ko hai foki kua vagahau mai kia ia he fofoga a Iehova, kia fakailoa mai e ia e mena ne fakaoti ai e kelekele, ne huhunu ai tuga ne tutakale, kua nakai fina age ai taha?

13 Ti pehe mai a Iehova, Kua tiaki e lautolu haku a fakatufono ne tuku atu e au ki mua ha lautolu, ti nakai fanogonogo a lautolu ke he haku a leo, mo e o fano ai a lautolu;

14 Ka kua mumui atu a lautolu ke he tau loto mao ha lautolu, katoa mo Paala, ne fakaako ai kia lautolu he tau matua ha lautolu;

15 Ko e mena ia, kua vagahau mai pehe a Iehova Sapaota, ko e Atua a Isaraela, Kitiala, to fagai aki e au a lautolu, ko e motu nai ni, ke he laena, ti fakainu aki e au a lautolu ke he vai kona.

16 Ti fakamavehevehe e au a lautolu ke he tau motu kehe kua nakai iloa e lautolu, po ke tau matua ha lautolu; ti fakafano atu e au e pelu ke mui atu kia lautolu, ato fakaoti ai a lautolu.

17 Kua vagahau mai pehe a Iehova Sapaota, Kia manamanatu ā mutolu, mo e ui atu e mutolu ke he tau fifine tagi tautau, kia o mai a lautolu, mo e fakafano atu e mutolu ke he tau fifine iloilo, kia o mai foki a lautolu;

18 Kia fakaave a lautolu, mo e takitaki ai e tagi aue ma tautolu, kia lele hifo ai e tau hihina mata he tau mata ha tautolu, mo e tafe mai ai e puke vai he tau tua mata ha tautolu.

19 Ha kua logona atu i Siona e leo he tagi aue, Kua maona ai pihia a tautolu! kua mā lahi ni a tautolu, ha kua tiaki e tautolu ha tautolu a kelekele, ha kau ulu moumou e lautolu ha tautolu a tau fale.

20 Hanai, ko mutolu, ko e tau fifine, kia fanogonogo mai a ke he kupu a Iehova, kia fakateliga mai a mutolu ke he kupu he hana fofoga, ti fakaako atu e mutolu ke he tau tama fifine ha mutolu ke tagi tautau, ke takitaha foki mo e fakaako atu ke he hana matakainaga ke tagi aue.

21 Ha kua hake e mate ke he tau fakamaama ha tautolu, kua hu mai ai ke he tau fale iki ha tautolu, ke fakaoti e tau tama ikiiki mai he tau puhala, mo e tau fuata mai he tau male.

22 Kia pehe atu a, kua vagahau mai pehe a Iehova, To veveli ai e tau tino he tau tagata mamate ke tuga ne otaota ke he fuga kelekele, tuga foki e fuhi saito ka kua mole atu a ia ne helehele, ti nakai ha i ai taha ke fakapotopoto ai.

23 Kua vagahau mai pehe a Iehova, Aua neke hula e tagata iloilo he hana iloilo, ti aua neke hula e tagata malolo he hana malolo, ti aua neke hula e tagata maukoloa he hana tau koloa;

24 Ka ko ia kua hula kia hula a ia he mena nai, kua lotomatala a ia, mo e iloa e ia au, ko au ni ko Iehova, kua eke e tau mena fakaalofa, mo e fakafiliaga, mo e mahani tututonu ke he lalolagi; ha ko e tau mena kua fiafia au ki ai, kua pihia mai a Iehova.

25 Kua pehe mai a Iehova, Kitiala, to hoko mai e vaha ke taui atu ai e au kia lautolu oti kua peritome ha ko e ha lautolu a nakai peritome;

26 Ko Aikupito, mo Iuta, mo Etoma, mo e fanau a Amoni, ko Moapi foki, mo lautolu oti kua helehele ha lautolu a tau hafe kakau; ko lautolu kua nonofo ke he tutakale; ha kua nakai peritome e tau motu kehe oti, ko e magafaoa oti a Isaraela foki kua nakai peritone ke he tau loto ha lautolu.