Teutaronome

2 TI liliu atu a tautolu, mo e o atu a tautolu ke he tutakale ke he puhala ke he Tahi Kula, tuga ne poaki mai ai e Iehova kia au; ti takai ai e tautolu e mouga, ko Seira ke he tau aho loga.

2 Ti poaki mai ai e Iehova kia au, kua pehe mai,

3 Kua leva tuai ha mutolu a takai ke he mouga nai; kia hagao atu a mutolu ke he fahi tokelau,

4 Ti poaki atu e koe ke he motu; kua pehe atu, Ko e o atu ne fai a mutolu ke he tau katofia he motu he tau matakainaga ha mutolu, ko e fanau a Esau, kua nonofo i Seira, to matakutaku a lautolu kia mutolu, a mutolu kia mutolu.

5 Aua neke tau a mutolu mo lautolu, ha ko e mena nakai ta atu e au kia mutolu ha mena mai he kelekele ha lautolu, nakai ta atu e au kia mutolu ha maga tuga ne tuagahui ha ko e mena tuku atu e au e mouga ko Seira kia Esau ke eke mo tufaaga mana.

6 Kia fakafua mai e tau mena kai ia lautolu ke he tau tupe ti kai ai a mutolu, ko e maga vai foki kia fakafua mai e mutolu ia lautolu ke he tau tupe to inu ai e mutolu.

7 Ha kua fakamonuina e Iehova hau a Atua kia koe ke he tau gahua oti he hau a tau lima; kua iloa e Iehova hau a Atua hau a fano ke he tutakale lahi nai, ha ha ia koe hau a Atua ko Iehova ke he tau tau nai ne fagofulu; nakai ni nofogati ai a koe ke he taha mena taha.

8 Ti o age a tautolu mai he tau matakainaga ha tautolu ko e fanau a Esau kua nonofo i Seira, ke he puhala ke he kelekele tatai ia Elata mo Esiokape, ti liliu ai a tautolu mo e o age ke he puhala ke he tutakale a Moapi.

9 Ti pehe mai a Iehova kia au, Aua neke fakamamahai atu kia Moapi, ti aua neke tau foki a koe mo lautolu, ha ko e mena nakai foaki atu e au ha fahi fonua hana ke eke mo tufaaga mau, ha ko e mena tuku atu e au a Aro ke he fanau a Lota ke eke mo tufaaga ma lautolu.

10 Ne nonofo fakamua ai e tau tagata Emema, ko e motu haia ne malolo to tokologa to leleva foki a lautolu tuga ne tau tagata Anaki.

11 Ne talahaua foki a lautolu ko e tau tagata makimaki tuga ne tau tagata Anaki, ka e ui he tau tagata Moapi a lautolu ko e tau tagata Emema.

12 Ne nonofo foki e tau tagata Hori fakamua i Seira, ka e vega kehe he fanau a Esau a lautolu, mo e fakaotioti a lautolu ki mua ha lautolu, ti nonofo ai a lautolu ke he mena ia ha lautolu, tuga ne eke a Isaraela ke he motu ke eke mo tufaaga mana, kua foaki atu ai e Iehova kia lautolu.

13 Hanai, kia tutu a mutolu mo e o ke he fahi atu he vai ko Sareta. Ti o ai a tautolu ke he fahi atu he vai ko Sareta.

14 Ko e tau aho foki ne o ai a tautolu i Katesapanea; to hohoko a tautolu ke he fahi atu he vai ko Sareta, ne tolugofulu ti valu e tau; ato fakaotioti ai e hau he tau tagata oti kana mai he heaga api, tuga ne omonuo ai e Iehova kia lautolu.

15 Ha kua hoko ni kia lautolu e lima a Iehova ke fakaotioti a lautolu mai he heaga api, ato fakaotioti ai a lautolu.

16 Ka kua fakaotioti ai foki ke he mate e tau tagata tau oti kana he motu,

17 Ti vagahau mai a Iehova kia au, kua pehe mai,

18 Ko e aho nai ke fina atu ai a koe i Aro ko e katofia a Moapi;

19 Ka fakatata foki a koe ke he mena ne fehagai ai mo e fanau a Amoni, aua neke fakamamahi e koe a lautolu, ti aua neke tau a koe kia lautolu, ha ko e mena nakai ta atu e au ha maga he fonua he fanua Amoni ke eke mau, ha kua foaki atu tuai e au ke he fanau a Lota ke eke ma lautolu.

20 Ne talahaua foki ia ko e motu he tau tagata makimaki, ne nonofo ai ne aho mua, ne ui foki he tau tagata Amoni a lautolu ko e tau tagata Samasuma.

21 Ko e motu malolo haia to tokologa, to Ieleva foki tuga ne tau tagata Anaki; ka e fakaotioti ai e Iehova a lautolu ki mua ha lautolu, ti vega kehe a lautolu a lautolu, mo e nonofo ai ke he mena ne nonofo ai a lautolu;

22 Tuga ne eke e ia ke he fanau a Esau kua nonofo i Seira, ka kua fakaotioti ai e ia e tau tagata Hori ki mua ha lautolu, ne vega e lautolu a lautolu ti nonofo ai a lautolu ke he mena ne nonofo ai a lautolu, kua hoko mai ni ke he aho nai.

23 Ko e tau tagata Gavi foki ne nonofo i Haserima ke hoko atu ki Kasa, ne o mai e tau tagata Kafatori i Kafatori, mo e fakaotioti a lautolu, ti nonofo ai a lautolu ke he mena ne nonofo ai a lautolu.

24 Kia tutu a a mutolu ke o atu, ti o a mutolu ke he fahi atu he vai ko Arinona, kitiala, kua tuku atu e au ke he hau a lima a Sikono ko e patuiki a Hesepona, ko e tagata Amori, mo e hana kelekele, kia kamata la, ti eke ni mau, ti tau ai mo ia ke he tau.

25 To kamata ai e au ke he aho nai ke fakahoko atu e hopo ate, mo e matakutaku ha ko koe ke he tau motu oti ke he lalolagi oti, ka logona e lautolu e tala kia koe ti vivivivi a lautolu, mo e fakalolelole ai a lautolu ki mua hau.

26 Ti fakafano atu e au e tau fekau mai he tutakale ko Ketemota kia Sikono ko e patuiki a Hesepona, mo e tau kupu he mafola kua pehe atu,

27 Kia fina atu ai au ke he hau a motu, to fano ai au ke he puhala tu nakai afe atu au ke he fahi matau, po ke fahi hema.

28 To fakafua mai e koe e tau mena kai ke he tau tupe, ti kai ai e au, ti ta mai foki e koe e maga vai ma e tau tupe to inu ai e au, ti fina atu ai au ke he haku tau hui;

29 Tuga ne eke he fanau a Esau kia au, ko lautolu haia ne nonofo i Seira, mo e tau tagata Moapi ne nonofo i Aro, ato hohoko a mautolu ke he fahi atu a Ioritana ke he motu kua foaki mai e Iehova ha mautolu a Atua kia mautolu.

30 Ka e nakai mafai a Sikono ko e patuiki a Hesepona, ke toka a tautolu ke o age ai; ha ko e mena fakamaō e Iehova hau a Atua, hana agaga, mo e fakamalolo e ia hana loto, kia tuku atu e ia a ia ke he hau a lima, tuga ne eke ai ke he aho nai.

31 Ti pehe mai ai a Iehova kia au, Kitiala, kua kamata tuai e au ke tuku atu a Sikono mo e hana motu kia koe, kia kamata e koe ke eke mau hana motu.

32 Ti o mai ai a Sikono mo e hana motu oti ke fonofono a tautolu ke tau ai i Iaesa;

33 Ti tuku mai e Iehova ha tautolu a Atua a lautolu kia tautolu, ti keli ai e tautolu a ia, mo e hana tau tama tane, katoa mo e hana motu oti.

34 Ti fofo ai e tautolu hana tau maga oti ke he vaha ia, ti kelipopo ai e tautolu e tau tane, mo e tau fifine, mo e tau tama ikiiki oti ke he tau maga oti ni, nakai fai tagata kua toka e tautolu.

35 Ko e tau manu hokoia ne uta e tautolu ma tautolu, katoa mo e tau mena ne fofo he tau ke he tau maga ne fofo ai e tautolu.

36 Ke kamata i Aroeru, ha ha he kauvai he vailele ko Aranona, mo e tau māga ne tata age ke he vailele, ko hoko atu ki Kiliata, nakai ni fai maga ne mua ha lautolu a malolo ke he malolo ha tautolu, ne foaki mai e Iehova ha tautolu a Atua a lautolu oti kia tautolu.

37 Ka ko e motu he fanau Amoni nakai hoko atu a koe ki ai, ko e tau mena oti ne tata age ke he vailele ko Iapoka, mo e tau maga ke he mouga, mo e tau mena oti ne poaki mai ai e Iehova ha tautolu a Atua, neke o ki ai a tautolu.