Kenese

18 NE fakakite a Iehova kia ia ke he tau aluna a Mamere; ha ne nofo a ia ke he gutuhala he fale ie ke he magaaho la.

2 Kua haga atu a ia mo e kitekite atu, kitiala, kua tutu mai e tokotolu a tagata kia ia; kua kitia e ia ti poi atu ai a ia he gutuhala he fale ie ke fonofono a lautolu, ti fakaveli fakafohifo ai a ia ke he kelekele.

3 Ti pehe atu a ia, Ko e Iki na e, kaeke kua ofania mai nai e koe au, aua neke fano leva a koe ia au ko e hau a fekafekau;

4 Ato ta mai e taha magavai ke holoholo aki ha mutolu a tau hui, mo e okioki a mutolu ki lalo he akau.

5 To ta mai foki e au taha mena kai, mo e okioki a mutolu to o ai a mutolu; ha ko e mena ia kua o mai ai a mutolu ke he fekafekau ha mutolu. Ti pehe mai a lautolu, Ati eke la pihia, tuga ne tala mai e koe.

6 Ti alumaki atu a Aperahamo ke he fale ie kia Sara, mo e pehe atu, Fakaave a koe ke eke e falaoa, ko e falaoa mitaki, tolu ni e fafati, ti laku ni mo e eke aki e tau areto pukupuku.

7 Ti poi a Aperahamo ke he fuifui manu mo e ta mai ai e punua povi, kua mukamuka mo e mitaki, ti uta ai e ia ke he fuata; ti fakaave a ia ke taute ai.

8 Ne uta foki e ia e puke huhu tuli, mo e puke huhu, mo e punua povi kua taute e ia, ti fakatokatoka ai ki mua ha lautolu; ka e tu age a ia kia lautolu ki lalo he akau, ti taumafa ai a lautolu.

9 Kua pehe mai a lautolu kia ia, Ko fe a Sara e hoana hau? ti pehe atu ai a ia, Haia, ha he fale ie.

10 Ti pehe mai a ia, To liu mai ni au kia koe ke he vaha ke lata mo e moui, kitiala, to moua e Sara e hoana hau e tama tane. Ne logona foki e Sara ke he gutuhala he fale ie, ha he tua hana.

11 Ko Aperahamo foki mo Sara kua motua tuai a laua, kua loga ha laua a tau tau; kua mole foki ia Sara e mahani he tau fifine.

12 Ti kata fufu ai a Sara, kua pehe hifo, Kua motua tuai au, to ha ia au kia ha fiafia, ko e haku a iki foki kua motua a ia?

13 Ti pehe mai a Iehova kia Aperahamo, Ko e ha ne kata ai a Sara kua pehe, Ko e moli kia ke fanau e au kua motua?

14 Kua uka kia ha mena kia Iehova? Ko e vaha ne kotofa to liu mai ai au kia koe, ke he vaha ke lata mo e moui, ti moua ai e Sara e tama tane.

15 Ti fakatikai ai e Sara, kua pehe, Nakai kata au, ha kua matakuaku a ia. Ti pehe atu a ia, Nakai, mena kata ni a koe.

16 Ti tutu mai e tau tagata ia he mena ia, mo e hagao atu ki Sotoma; kua o foki a lautolu mo Aperahamo ke fakafano atu a lautolu.

17 Ti pehe ai a Iehova, To fufu kia e au ia Aperahamo e mena ko e eke ne fai au?

18 Ha ko Aperahamo ni, to eke moli a ia mo tupuna he motu lahi mo e malolo; to monuina foki ia ia e tau motu oti he lalolagi.

19 Ha kua iloa e au a ia to poaki atu e ia ke he hana fanau mo e hana magafaoa ka mole atu a ia, ke taofi e lautolu ke he puhala a Iehova ke mahani tututonu mo e hako, kia fakahoko mai ai e Iehova kia Aperahamo e mena ne talahau e ia.

20 Ti pehe mai ai a Iehova, Kua lahi ni e tagi mai ia Sotoma mo Komora, kua lahi mahaki ni ha lautolu a hala;

21 Ko e mena ia ko e hifo ne fai au, ke kitia ai po ke ne mahani fakaoti a lautolu tuga ne tagi kua hoko mai kia au; kaeke kua nakai, ti iloa ni e au.

22 Kua toka tuai he tau tagata e mena ia mo e o atu ki Sotoma; ka ko Aperahamo, kua tu agaia a ia ki mua a Iehova.

23 Ti fakatata atu ai a Aperahamo, mo e pehe atu, To fakamahakava kia e koe e tau tagata tututonu fakalataha mo e tau tagata mahani kelea?

24 Kaeke ke ha ha he maga tokolimagofulu e tagata tututonu; to fakamahakava kia e koe ti nakai fakamagalo e maga ha ko e tokolimagofulu e tagata tututonu ha ha i ai?

25 Kia mamao ni ia koe ke eke pihia, ke tamate e tau tagata tututonu fakalataha mo e tau tagata mahani kelea; ke fakatatai foki e tau tagata tututonu mo e tau tagata mahani kelea, kia mamao e mena ia ia koe. Nakai kia hako e mena ka eke he fakafili he lalolagi oti?

26 Ti pehe mai a Iehova, Kaeke ke moua e au i Sotoma e tau tagata tututonu ne tokolimagofulu ha he maga, ti fakamagalo e au e maga oti kana ha ko lautolu ni.

27 Ti tali atu ai a Aperahamo, kua pehe atu, Kitiala, ko au ni ko e efuefu mo e efuefu afi, kua fakamalolo e au ke vagahau atu ke he Iki;

28 Kaeke kua toe tokolima to katoa ai e tokolimagofulu e tagata tututonu, ti fakamahakava kia e koe e maga oti kana ha ko e tokolima ia? Ti pehe mai a ia, Nakai fakamahakava ni e au kaeke ke moua ai e au e tokofagofulu ma lima.

29 Ti liu foki vagahau atu a ia, kua pehe. Kaeke ke moua ai e tokofagofulu to ha? Ti pehe mai a ia, Ka tokofagofulu ti nakai eke e au ha ko lautolu ni.

30 Ti pehe atu ai a ia, Aua neke ita mai e Iki, to liu foki vagahau atu e au, Kaeke ke moua ai e tokotolugofulu to ha? Ti pehe mai a ia, Nakai eke ni e au kaeke ke moua ai e au tokotolugofulu.

31 Ti pehe atu a ia, Kitiala, kua fakamalolo e au ke vagahau atu ke he Iki, Kaeke he moua ai e tokouafulu to ha? Ti pehe mai a ia, Nakai ni fakamahakava e au ha ko e tokouafulu.

32 Ti pehe atu a ia, Aua neke ita mai e Iki, to vagahau atu lagataha foki e au, Kaeke ke moua ai e tokohogofulu to ha? Ti pehe mai a ia, Nakai fakamahakava ni e au ha ko e tokohogofulu.

33 Ti haele ai a Iehova ha kua oti e vagahau kia Aperahamo; ti liu foki a Aperahamo ke he hana kaina.