1 Nofoaga he Tau Patuiki

17 KUA nofo a Tavita ke he hana fale, ti pehe atu a Tavita ke he perofeta ko Natano, Kitiala, kua nofo ai au ke he fale arasi, ka ko e puha he maveheaga a Iehova, kua toka ai i lalo he tau ie puipui.

2 Ti pehe mai a Natano kia Tavita, Kia eke a e koe e tau mena oti kua finagalo a koe ki ai, ha kua fakalataha e Atua mo koe.

3 Ko e po ia ni ne hoko mai ai e kupu he Atua kia Natano kua pehe mai,

4 Kia fano a koe, ti pehe atu a koe ke he haku a fekafekau ko Tavita; Kua vagahau mai pehe a Iehova, nakai ta e koe e fale ke nofo ai au;

5 Ha kua nakai nofo fale au tali mai he aho ne ta hake ai e au a Isaraela kua hoko mai ke he aho nai, ka e ha i ai au ke he taha fale ie mo e taha fale ia, ko e taha faituga mo e taha faituga.

6 Ko e tau mena oti ne o fano ai au mo Isaraela oti, ne vagahau atu nakai e au ha kupu ke he taha fakafili Isaraela, ne poaki atu ai e au ke leveki haku a motu, kua pehe atu, Ko e ha nakai ta ai e mutolu e fale arasi maaku?

7 Hanai, kia vagahau atu pehe a koe ke he haku a fekafekau ko Tavita, Kua vagahau mai pehe a Iehova Sapaota, Ko au ne ta mai a koe he lotopa mamoe, ne mui atu ai a koe ke he tau mamoe, kia eke a koe mo takitaki he motu haku ko Isaraela.

8 Ti ha i ai au mo koe ke he tau mena oti ne fano a koe ki ai, mo e fakaoti ai e au ki mua hau a lautolu oti ne fai fi kia koe; to eke foki e au māu e higoa lilifu tuga ne tau higoa he tau iki lalahi ke he lalolagi.

9 To tuku atu foki e au e mena ke nofo ai haku motu ko Isaraela, ti to e au a lautolu ke nonofo ai a lautolu ke he motu ha lautolu, ti nakai fagahuatia foki a lautolu; to nakai fakamamahi atu foki he tau tagata mahina kelea kia lautolu tuga ne vaha fakamua;

10 Tali mai foki he vaha ne kotofa ai e au e tau fakafili ke pule ke he motu haku ko Isaraela. To fakatokolalo foki e au a lautolu oti kua fai fi kia koe, kua talahau atu foki e au kia koe, ko e eke ha ne fai e Iehova e magafaoa māu.

11 Ka hoko ke he vaha ke katoatoa ai hau a tau aho kia fakalataha ai a koe mo e hau a tau matua, ti fakatu ai e au hau a fanau ka mole atu a koe, ko e taha foki he hau a tau tama tane, to fakatumau ai e au hana kautu.

12 To ta e ia e fale maaku, to fakatumau tukulagi foki e au hana nofoaiki.

13 To eke au mo matua hana, to eke a ia mo tama haku; ti nakai uta kehe e au haku a fakaalofa ia ia, tuga he uta kehe e au ia ia ne fakamua atu kia koe.

14 To fakatumau tukulagi e au a ia ke he haku fale mo e haku a kautu; to fakatumau tukulagi foki hana nofoaiki.

15 Ke lata mo e tau kupu oti na, ke lata foki mo e fakakiteaga oti na, ne vagahau atu pihia e Natano kia Tavita.

16 Ti fina atu e patuiki ko Tavita, mo e nofo ai a ia ki mua a Iehova; ti pehe atu a ia, Iehova na e, ko e Atua na e, ko hai kia au nai? ko hai foki haku a magafaoa kua fakahoko mai ai e koe au ke he aho nai?

17 Ka ko e mena tote ia kia koe, ko e Atua na e, ka kua vagahau mai e koe ke he magafaoa he hau a fekafekau ke he tau aho loga kua toka mai i mua; Iehova na e, ko e Atua na e, kua fofoga mai foki a koe kia au ke tuga ne tagata kua mua he lilifu au.

18 Ko e heigoa kia e mena ne toe ke vagahau atu foki a Tavita kia koe ke he fakalilifu mai he hau a fekafekau? ha kua iloa e koe hau a fekafekau.

19 Iehova na e, ha ko e fekafekau hau, ke lata foki mo e hau a finagalo, kua eke ai e koe e tau mena lalahi oti nai, ke fakailoa mai ai e tau mena lalahi oti nai.

20 Iehova na e, nakai ha ha i ai taha ke tatai mo koe, ti nakai fai Atua ka ko koe ni, ke lata mo e tau mena oti kua logona ai e mautolu ke he tau teliga ha mautolu.

21 Ko fe kia taha motu ke he lalolagi kua tatai mo e motu hau ko Isaraela, ne haele atu e Atua ke laveaki ke eke mo motu hana, ke eke ai ni māu e higoa he tau mena lalahi mo e tau mena ke matakutaku ai, he vega e tau motu kehe ki mua he motu hau ne laveaki mai e koe i Aikupito?

22 Ne eke e koe hau a motu ko Isaraela mo motu ni hau tukulagi; ko koe foki, Iehova na e, kua eke a koe mo Atua ha lautolu.

23 Hanai, Iehova na e, kia fakamau tukulagi e koe e kupu ne vagahau mai e koe ke he hau a fekafekau mo e hana magafaoa, ti eke a tuga ne vagahau mai ai e koe.

24 Kia fakamau ai ni, kia fakalilifu ai tukulagi hau a higoa, kua pehe, Ko Iehova Sapaota ko e Atua a Isaraela, ko e Atua ni a ia kia Isaraela; ko e magafaoa foki he hau a fekafekau ko Tavita kia fakatumau ai e koe ki mua hau.

25 Ha ko koe, Haku Atua na e, kua fakakite mai ke he hau a fekafekau ke eke ai e koe ha magafaoa māku; ko e mena ia kua manatu ai au ko e hau a fekafekau ke liogi atu ai ki mua hau.

26 Hanai, Iehova na e, ko koe ni ko e Atua, kua talahau mai e mena mitaki ia ke he hau a fekafekau.

27 Hanai, kua finagalo a koe ke fakamonuina e magafaoa he hau a fekafekau, kia ha i ai a lautolu ki mua hau tukulagi; ha ko koe Iehova na e, kua fakamonuina e koe, ti monuina tukulagi ai ni.