1 Korinito

3 KO au foki, ko e tau matakainaga na e, kua nakai maeke ia au ke vagahau atu kia mutolu tuga ne tau tagata omaoma ke he agaga, ka e tuga ni e tau tagata omaoma ke he tino, tuga e tau tama mukemuke ha ha ia Keriso.

2 Ne fagai e au a mutolu ke he puke huhu, ka e nakai ko e mena kakano; ha kua nakai fahia a mutolu ke he vaha ia, ti kua nakai fahia agaia a mutolu.

3 Ha ko e mena omaoma agaia a mutolu ke he tino; ha kua ha ha i ai ia mutolu e mahekeheke, mo e taufetoko, mo e feveheveheaki, kua nakai kia omaoma a mutolu ke he tino, ti mahani tuga ne tau tagata?

4 Nukua pehe mai taha, Ko au ha Paulo; mo e taha, Ko au ha Apolo, kua nakai kia omaoma a mutolu ke he tino?

5 Ko hai kia a Paulo? Ko hai a Apolo? Nakai kia ko e tau fekafekau ne tua ai a mutolu ke he Iki kia tuga he foaki mai e ia kia maua takitokotaha?

6 Ne to e au, ne fakamalū e Apolo, ka ko e Atua ni kua fakatutupu ai.

7 Hanai, kua noa a ia ne to, mo e noa a ia ne fakamalū; ka ko e Atua ni kua fakatutupu ai.

8 Ko ia ne to, mo ia ne fakamalū ne taha a laua; ka e takitokotaha mo e moua hana taui ke lata mo e hana gahua.

9 Ha ko e tau ekegahua a mautolu fakalataha mo e Atua; ko mutolu ko e kaina haia ne to he Atua, ko e fale ne eke he Atua.

10 Ke lata mo e fakaalofa noa he Atua kua foaki mai kia au, tuga ni e patu tufuga kua iloilo, kua fakatoka ai e au e fakaveaga, ka ko e taha kua ati hake ai; ka kia takitokotaha mo e fakaeneene po ke fefe hana ati hake ai.

11 Ha ko e mena nakai maeke kia taha ke fakatoka ai ha fakaveaga kua kehe mo e fakaveaga kua fakatoka tuai, ko Iesu Keriso ni haia.

12 Kaeke foki ke ati hake e taha ke he fakaveaga nei e auro, ko e ario; ko e tau maka uho, ko e tau akau, ko e tau pupu, ko e gutugutu saito.

13 To fakakite mai e tau gahua he tau tagata takitokotaha; to fakailoa mai he aho, ha ko e mena to fakakite mai ke he afi; to kamatamata foki e tau gahua he tau tagata takitokotaha ke he afi po ke fefe.

14 Kaeke ke tumau e gahua he taha tagata kua ati hake ai e ia, to moua e ia e taui.

15 Kaeke ke vela e gahua he taha tagata, ti moumou ni hana tau mena; ko e fakamoui a ia, ka e tuga he hao mai he afi.

16 Ai kia iloa e mutolu ko e faituga he Atua a mutolu, kua haele foki e Agaga he Atua ki loto ia mutolu?

17 Kaeke ke fakakelea e taha e faituga he Atua, to fakakelea he Atua e tagata ia; ha kua tapu e faituga he Atua, ti pihia foki e mutolu.

18 Aua neke fakahehe e taha a ia ni. Kaeke kua ha ha ia mutolu taha kua manatu kua iloilo a ia ke he tau mena he lalolagi nai, kia uta a ia mo goagoa, kia iloilo ai a ia.

19 Ha ko e iloilo he lalolagi nai, ko e goagoa haia ki mua he Atua; nukua tohi mai, Kua moua e ia e tau tagata iloilo ke he tau lagatau ha lautolu.

20 Mo e pehe foki, Kua fioia he Iki e tau manatu he tau tagata iloilo kua fakateaga ni.

21 Hanai, aua neke hula taha ke he tau tagata; ha ko e tau mena oti, ko e ha mutolu haia;

22 Po ko Paulo, po ko Apolo, po ko Kefa, po ke lalolagi, po ke moui, po ke mate, po ke tau mena he vaha nai, po ke tau mena ne tatali; ko e tau mena oti, ko e ha mutolu haia;

23 Ka ko e ha Keriso a mutolu, ha he Atua foki a Keriso.