2 Tesalonia

2 KA e ole atu a mautolu kia mutolu ko e tau matakainaga na e, ha ko e haele mai he Iki ha tautolu ko Iesu Keriso mo e fakapotopotoaga ha tautolu kia ia,

2 Neke fagahuatia vave ha mutolu a tau loto, aua foki neke fakaatukehe ke he taha agaga, po ke kupu, po ke tohi tuga ne mai ia mautolu, tuga ne mena ko e hoko mai ne fai e aho a Keriso.

3 Aua neke fakahehe e taha a mutolu ke he taha lagatau taha; ha ko e mena nakai hoko mai e aho ia, ato hoko fakamua mai e liliuaga mo e fakakite mai e tagata he hala, ko e tagata haia he malaia,

4 Ko ia kua totoko atu, mo e fakatokoluga e ia a ia ke mua ke he tau mena oti kua talahaua ko e tau atua, po ke hufeilo ki ai, ko ia kua nofo ai a ia ke he faituga he Atua, tuga ne Atua a ia, kua fakakite mai e ia a ia, ko e Atua ni.

5 Nakai kia manatu a mutolu, ne tala atu e au e tau mena nai kia mutolu ka kua nonofo a tautolu mo mutolu?

6 Hanai, kua iloa e mutolu e mena kua fakalavelave, kia fakakite mai ai a ia ke he hana ni a vaha.

7 Ha kua gahua ainei e mena galo he mahani kelea, ato uta kehe a ia kua fakalavelave ti kuenaia.

8 Ti fakakite mai ke he vaha ia a ia kua mahani kelea, to tamate a ia he Iki ke he fafagu mai he hana fofoga, mo e fakaotioti a ia ke he fakakiteaga he hana haele mai;

9 Ko e hana hau foki kua lata ia mo e gahua a Satani ke he malolo oti, mo e tau fakamailoga, mo e tau mana pikopiko,

10 Mo e tau mena fakahehe oti he mahani kelea kia lautolu kua malaia; ha ko e mena nakai talia e lautolu e kupu moli mo e fiafia ki ai kia momoui ai a lautolu.

11 Ko e mena foki ia kua fakafano atu ai he Atua kia lautolu e gahua ke fakahehe ai, kia talia ai e lautolu e pikopiko;

12 Kia fakahala a lautolu oti kua nakai talia e kupu moli, ka e fiafia ke he mahani hepehepe.

13 Ka ko mautolu ko e mena lata kia mautolu ke fakaaue ke he Atua nakai noa ha ko mutolu, ko e tau matakainaga na e, kua ofania he Iki, ha kua fifili he Atua a mutolu mai he kamataaga kia momoui ke he fakatapu he Agaga, mo e talia fakatonu e kupu moli,

14 Ne ui ai e ia a mutolu, ke he vagahau mitaki ha mautolu, kia moua ai e mutolu e monuina he Iki ha tautolu ko Iesu Keriso.

15 Ko e mena ia ko e tau matakainaga na e, kia tumau a mutolu, mo e taofi mau ke he tau kupu toka tuai ne fakaako atu ai kia mutolu ke he kupu ha mautolu, mo e tohi ha mautolu.

16 Ka ko e Iki ni ha tautolu ko Iesu Keriso, katoa mo e Atua ko e Matua ha tautolu, ko ia kua fakaalofa mai kia tautolu, mo e foaki mai e fakamafanaaga tukulagi, mo e amaamanaki mitaki ke he Fakaalofa noa,

17 Kia fakamafana e ia ha mutolu a tau loto, mo e fakatumau a mutolu ke he tau kupu mitaki oti mo e tau gahua mitaki oti.