Mataio

14 KO e vaha ia ne logona ai he patuiki ko Herota e ogo kia Iesu;

2 Ti tala age ai a ia ke he hana tau fekafekau, Ko Ioane papatiso hanai; kua matike mai a ia ia lautolu kua mamate; ko e mena ia ni kua eke ai e ia e tau mana.

3 Ha ko e mena tapaki e Herota a Ioane, ti lili a ia, mo e tuku ke he fale puipui, ha ko Herotia e hoana a Filipo hana matakainaga.

4 Ha kua pehe age a Ioane kia ia, Kua nakai lata ke eke e koe a ia mo hoana hau.

5 Ti kua fia tamate e ia a ia ka e matakutaku a ia ke he lanu tagata, ha kua eke e lautolu, ko e perofeta a ia.

6 Kua eke e fakamanatuaga he aho ne fanau mai ai a Herota, ati koli ai ki mua ha lautolu e tama fifine a Herotia, mo e fakafiafia e ia a Herota.

7 Ko e mena haia ne tala age ai e ia mo e omonuo, ke age e ia māna e mena ka ole mai ai e ia.

8 Kua omoomoi a ia he matua fifine hana, ti pehe age, Kia ta mai e koe ki hinei kia au e ulu a Ioane ko e papatiso ke he kumete.

9 Ati hukia ai e loto he patuiki; ka ko e omonuo, mo lautolu ne tatakoto ke kai mena fakalataha mo ia, kua poaki atu ai a ia ke ta age.

10 Ti fekau atu ai e ia mo e hio e ulu a Ioane ke he fale puipui.

11 Ti ta mai ai hana ulu ke he kumete, kua age ke he tamafine; ti uta ai ne ia ke he matua fifine hana.

12 Ati o age ai hana tau tutaki, kua uta hana tino, mo e tanu; ti o mai a lautolu, mo e tala age kia Iesu.

13 Kua fanogonogo ki ai a Iesu, ti haele kehe ai a ia hokoia ni he mena ia ke he foulua ke he mena tokanoa; kua fanogonogo ai e lanu tagata, ati mumui atu ai a lautolu kia ia, kua o hala uta mai he tau māga.

14 Kua haele atu a Iesu, kua fioia e ia e lanu tagata tokologa, ti hofihofi ai hana fakaalofa kia lautolu, ati fakamalolo e ia e tau gagao ha lautolu.

15 Kua hoko ke he afiafi, ti o mai ai hana tau tutaki kia ia, kua pehe mai, Ko e tukakale hanai; ko e po ha ne fai, kia fakafano atu e koe e lanu tagata kia o a lautolu ke he tau magamotu ke fakatau ai e tau mena kai ma lautolu.

16 Ka e tala age a Iesu kia lautolu, Nakai aoga ke o a lautolu; kia age e mutolu e tau mena ke kai ai a lautolu.

17 Ka e pehe mai a lautolu kia ia, Nakai fai mena a tautolu i hinai, lima noa e areto mo e ua e ika.

18 Ti kua pehe age a ia, Ta mai la ki hinai kia au.

19 Ati tala age ai a ia ke he lanu tagata kia tatakoto a lautolu ke he motietie; kua toto foki e ia e lima e areto mo e ua e ika, kua haga hake a ia ke he lagi, mo e fakaaue; kua tofitofi foki e ia e tau areto mo e age ke he tau tutaki; ti uta ai he tau tutaki ke he lanu tagata.

20 Ati kai ai a lautolu oti kana, kua makona; kua fafao foki e lautolu e tau mena kai ne toe, kua puke ai e hogofulu ma ua e kato.

21 Ko lautolu foki ne kai, toka ai ko e lima e afe he tau tane, ka e nakai totou e tau fifine mo e tau tama ikiiki.

22 Ati fakamakamaka ai agataha e Iesu ke he hana tau tutaki ke o hake ke he foulua, ke mumua atu ia ia ke he fahi atu, ato fakafano atu e ia e lanu tagata.

23 Kua fakafano atu e ia e lanu tagata, ti hake ai a ia hokoia ke he mouga ke liogi. Kua hoko ke he afiafi, ko ia ni hokoia ne nofo ai.

24 Ka ko e foulua ha ha he tutavaha, kua taupagea he loka; ha kua agi mai i mua e matagi.

25 Kua haele age a Iesu kia lautolu ke he leoleoaga fa he po, kua fano i luga he kili vai.

26 Kua kitia he tau tutaki a ia ha ne fano i luga he kili vai, ati fakaatukehe ai a lautolu, kua pehe age, Ko e aitu; ti fakatutu ai a lautolu he matakutaku.

27 Ati tala age ai agataha a Iesu kia lautolu, kua pehe age, Kia fakamanavalahi a a mutolu; ko au ni, ua matakutaku a mutolu.

28 Kua tali age a Peteru kia ia, kua pehe age, Ko e Iki na e, kaeke ko koe kia tala mai e koe kia au ke fina atu au kia koe i luga he vai.

29 Ti pehe ai a ia, Ati hau a. Ti hifo mai ai a Peteru he foulua, kua fano i luga he vai ke fina atu kia Iesu.

30 Ha kua kikite a ia ke he matagi kua lahi, ati matakutaku ai; ti kamata ke tomo a ia, kua hea, kua pehe atu, Ko e Iki na e, kia fakamoui mai e koe au.

31 Ti fakaolo ai agataha e Iesu hana lima, mo e toto a ia, kua pehe kia ia, Ko koe ni ne tua fakatote, ko heigoa e mena ne mahalohalo ai a koe?

32 Ati o hake ai a laua ke he foulua, ti milino ai e matagi.

33 Ti o mai a lautolu ha he foulua, kua hufeilo kia ia, kua pehe mai, Ko e moli, ko koe ni ko e Tama he Atua.

34 Kua o a lautolu ke he fahi atu, kua hohoko atu ke he fahi ko Kenesareta.

35 Kua iloa a ia he tau tagata he mena ia, ati fakafano atu ai e lautolu ke he fahi oti ia, kua ta mai foki e lautolu kia ia e tau tagata gagao oti kana;

36 Mo e olelalo mai a lautolu kia ia ke fakapiki noa atu a lautolu ke he kala tapulu hana; kua fakamalolo foki a lautolu oti ne piki age ki ai.