Teutaronome

5 TI ui ai a Mose kia Isaraela oti, kua pehe age kia lautolu, Isaraela na e, kia fanogonogo mai ke he tau fakatufono, mo e tau fakafiliaga kua vagahau atu e au kia mutolu ke he aho nai, kia ako ai a mutolu ia, mo e omaoma ki ai a mutolu mo e eke ai ni e mutolu.

2 Ne eke ai e Iehova ha tautolu a Atua e maveheaga mo tautolu i Horepa.

3 Nakai eke e Iehova e maveheaga nai mo e tau matua ha tautolu, ka e eke ai mo tautolu, ni, ko tautolu oti hanai kua momoui agaia ke he aho nai.

4 Ne fakafehagao aki a mutolu mo Iehova he vagahau ai a ia mo mutolu ke he mouga ni mai loto he afi.

5 (Ne tu ai au ke he vaha loto a Iehova mo mutolu ke he vaha ia, ti tala atu e au kia mutolu e finagalo a Iehova; ha ko e mena matakutaku a mutolu ha ko e afi, ti nakai o hake ai foki a mutolu ke he mouga), kua pehe mai,

6 Ko au ko Iehova hau a Atua ne ta mai e au a mutolu he motu ko Aikupito, ko e mena ne nonofo fakatupa ai a mutolu.

7 Aua neke eke e koe mau e tau atua kehe hoku mua.

8 Aua neke eke e koe mau ha tupua kua ta, po ke taha fakatai he taha mena ha ha he lagi i luga, po ke ha he fonua i lalo, po ke ha he tahi i lalo he fonua;

9 Aua neke hufeilo a koe ki ai, aua foki neke fekafekau ki ai; ha ko au ko Iehova hau a Atua, ko e Atua ita tafua au, to taui atu e au ke he fanau e mahani hepehepe he tau matua ha lautolu, ke hoko ke he hau ne tolu mo e fa ha lautolu kua fakavihia au;

10 Ka e fakaalofa au ke he afe he tau hau ha lautolu kua fakaalofa kia au, mo e omaoma ke he haku a tau poaki.

11 Aua neke totoku teao e higoa a Iehova hau a Atua; ha kua nakai toka noa e Iehova a ia kua totoku teao hana higoa.

12 Kia omaoma ke he aho sapati ke fakatapu ai; tuga ne poaki mai ai e Iehova hau a Atua kia koe.

13 Ono ni e aho ke gahua ai a koe, mo e eke ai hau a tau gahua oti kana;

14 Ka ko e aho fitu ko e sapati haia kia Iehova hau a Atua, aua neke eke ai e koe ha gahua taha, ko koe, mo e hau a tama tane, mo e hau a tama fifine, ko e hau a fekafekau tane, mo e hau a fekafekau fifine, mo e hau a povi, mo e hau a asini, po ke taha he hau a tau manu, mo e tagata kehe kua nofo mo koe, kia okioki ai hau a fekafekau tane, mo e hau a fekafekau fifine tuga na koe ni.

15 Kia manatu foki e koe, ne eke ai a koe mo fekafekau ke he motu ko Aikupito, ka kua ta mai e Iehova hau a Atua a koe he mena ia ke he lima malolo, mo e lima fakaolo; ko e mena ia kua poaki mai ai e Iehova hau a Atua kia koe ke eke ai e aho sapati.

16 Kia fakalilifu a koe ke he hau a matua tane, mo e hau a matua fifine, tuga ne poaki mai e Iehova hau a Atua kia koe, kia loga ai hau a tau aho, kia monuina ai foki a koe ke he motu kua foaki mai ai e Iehova hau a Atua kia koe.

17 Aua neke kelipopo tagata a koe.

18 Ti aua neke faivao a koe.

19 Ti aua neke kaiha a koe.

20 Ti aua neke fatipiko a koe ke he taha tagata.

21 Ti aua neke manako a koe ke he hoana he taha tagata, ti aua neke manako a koe ke he fale he taha tagata, ko e hana fonua, po ke hana fekafekau tane, po ke hana fekafekau fifine, ko e hana povi, po ke hana asini, po ke taha mena kehe he taha tagata.

22 Ko e tau kupu hanā ne vagahau mai ai a Iehova ke he ha mutolu a fakapotopotoaga oti ni ke he mouga, mai loto he afi, mo e aolagi, mo e pouli kikio, kua leo lahi mai ti nakai lafilafi mai e ia ha kupu; ne tohi ai foki e ia e tau kupu ia ke he na lapa maka ne ua, ti ta mai ai ia kia au.

23 Ne logona ai e mutolu e leo mai loto he pouli, ne vela foki e mouga ke he afi, ti fakatata mai ai a mutolu kia au, ko e tau iki he tau magafaoa ha mutolu, mo e ha mutolu a tau patu;

24 Ti pehe mai a mutolu, Kitiala, kua fakakite mai e Iehova ha tautolu a Atua kia mautolu hana lilifu mo e hana homo atu, ko e hana leo foki kua logona ai e mautolu mai loto he afi; kua kitia tuai e mautolu ke he aho nai kua vagahau mai he Atua ke he tau tagata, ka e momoui ai a lautolu.

25 Ko e hanai, ke mamate a mautolu he ha? ha ko e mena fakaotioti he afi lahi na a mautolu, kaeke ke liu foki logona e mautolu e leo a Iehova ha tautolu a Atua, ti mamate ai ni a mautolu;

26 Ha ko hai kia he tau tagata oti kua logona ai tuga na mautolu e leo he Atua moui kua vagahau mai he loto afi, ka e moui ai a ia?

27 Kia fakatata atu a koe kia ia, mo e fanogonogo ai a koe ke he tau mena oti ke talahau mai ai e Iehova ha tautolu a Atua, ti vagahau mai a koe kia mautolu ke he tau mena oti kua vagahau atu ai a Iehova ha tautolu a Atua kia koe, ti fanogonogo atu a mautolu kia koe, mo e eke ai ni e mautolu.

28 Ti fanogonogo mai a Iehova ke he ha mutolu a tau kupu ne vagahau mai ai a mutolu kia au; ti pehe mai a Iehova kia au, Kua fanogonogo ai au ke he tau kupu he motu nai ne vagahau atu ai a lautolu kia koe, kua mitaki ni e tau kupu oti ne vagahau atu ai a lautolu.

29 Ane mai ke ha ha ia lautolu na e tau loto ke matakutaku kia au, mo e omaoma ai ke he haku a tau poaki oti ke he tau aho oti, po kua monuina ai a lautolu, katoa mo e ha lautolu a fanau tukulagi ni.

30 Kia fano a koe, ti pehe atu a koe kia lautolu, Kia liliu atu a mutolu ke he ha mutolu a tau fale ie.

31 Ka ko koe kia tu mai a koe ki hinei, ti vagahau atu e au kia koe ke he tau poakiaga oti, mo e tau fakatufono, mo e tau fakafiliaga ke fakaako atu ai e koe lautolu, kia eke ai e lautolu ke he motu kua foaki atu e au kia lautolu ke eke ma lautolu.

32 Hanai, kia omaoma a mutolu ti eke ai, tuga ne poaki mai ai e Iehova ha mutolu a Atua kia mutolu, aua neke afe atu a mutolu ke he fahi matau, po ke fahi hema.

33 Kia o atu a mutolu ke he tau puhala oti ni ne poaki mai ai e Iehova ha mutolu a Atua kia mutolu, kia momoui ai a mutolu, mo e monuina ai a mutolu, mo e loga ai ha mutolu a tau aho ke he motu kua eke ma mutolu.