Teutaronome

10 TI pehe mai ai a Iehova kia au ke he aho ia, Kia ta e koe ua e lapa maka tuga ne tau mena fakamua, mo e ta hake e koe ia kia au ke he mouga; ti eke ai foki e koe e puha ke he akau.

2 To tohi ai e au ke he tau lapa maka ne ua e tau kupu ha ha he tau lapa fakamua ne lipilipi e koe ti tuku ai e koe ke he puha,

3 Ti eke ai e au e puha ke he akau ko e sitima, ti ta foki e au ua e lapa maka tuga ne tau mena fakamua, ti hake ai au ke he mouga, mo e tau lapa maka ne ua ke he haku lima.

4 Ti tohi ai ke he tau lapa maka tuga ne tau kupu ne tohi ai fakamua, ko e tau kupu ne hogofulu ne vagahau mai ai e Iehova kia mutolu ke he mouga, mai loto he afi, ke he aho ne eke ai e fakapotopotoaga, ti ta mai ai e Iehova ia kia au.

5 Ti tafilu ai au mo e hifo he mouga, ti tuku e au e tau lapa maka ke he puha ne eke ai e au, ti ha ha i ai ni, tuga ne poaki mai e Iehova kia au.

6 Ti o atu ai a fanau a Isaraela i Perota ha i Peneakana i Mosera; ti mate ai a Arona, ti tanu ai a ia ke he mena ia, ti eke ai a Eleasaro hana tama tane mo ekepoa he hukuiaki a ia.

7 Ne o atu a lautolu he mena ia ki Kutekota, ti o atu a lautolu i Kutekota ki Iatepata, ko e motu ne ha i ai e tau vailele.

8 Ko e vaha ia ne vevehe kehe ai e Iehova e magafaoa a Levi, ke tauloto e puha he maveheaga mo Iehova, kia tutu a lautolu ki mua a Iehova ke fekafekau kia ia, mo e fakamonuina atu ke he tau tagata ke he hana higoa, ke hoko mai ni ke he aho nai.

9 Ko e mena ia nakai moua ai e Levi ha fonua mana po ke tufaaga fakalataha mo e hana tau matakainaga; ko Iehova ko e hana tufaaga haia, tuga ne vagahau mai ai e Iehova hau a Atua kia ia.

10 Ne ha i ai au ke he mouga fagofulu e aho ti fagofulu e po, tuga ne tau aho fakamua; ti fanogonogo mai ai foki e Iehova kia au ke he aho ia, ti nakai finagalo ai a Iehova ke fakaoti ai a koe.

11 Ti pehe mai ai a Iehova kia au, Kia matike a a koe, ti fano a koe ke mua atu ke he motu, kia hohoko atu a lautolu, mo e eke ma lautolu e motu ne omonuo ai au ke he ha lautolu a tau matua ke foaki atu ai kia lautolu.

12 Hanai, Isaraela na e, ko e heigoa kia e mena kua finagalo ki ai a Iehova hau a Atua kia koe, ka ko e tau mena nai hokoia, kia matakutaku a koe kia Iehova hau a Atua, kia fano ai ke he hana tau puhala oti ni, mo e fakaalofa atu a koe kia Iehova hau a Atua, mo e fekafekau a koe kia Iehova hau a Atua mo e hau a loto katoa mo e hau a agaga katoa,

13 Kia omaoma a koe ke he tau poaki a Iehova mo e hana tau fakatufono kua poaki atu ai e au kia koe ke he aho nai, kia monuina ai a koe.

14 Kitiala, ha ia Iehova e lagi mo e lagi he tau lagi, ko e lalolagi foki, mo e tau mena oti kana ha ha i ai.

15 Ka e fiafia a Iehova ke he ha mutolu a tau matua, ne fakaalofa a ia kia lautolu, ti fifili ai foki e ia ha lautolu a fanau ka kua mole atu a lautolu, ko mutolu haia, ka e toe ni e tau mōtu oti, tuga ne eke ke he aho nai.

16 Hanai, kia peritome ai e mutolu ke he kili he tau loto ha mutolu, ti aua neke liu ke mao ai ha mutolu a tau ua.

17 Ha ko Iehova ha mutolu a Atua ko e Atua he tau atua a ia, ko e Iki he tau iki, ko e Atua lahi a ia, kua lilifu a ia, mo e matakutakuina, nakai fakamailoga tagata a ia, ti nakai talia e ia e taui;

18 Kua eke e ia e fakafiliaga ma e tama kua nakai fai matua mo e fifine takape; kua fakaalofa a ia ke he tagata kehe kua age ki ai e tau mena kai katoa mo e tau tapulu.

19 Ko e hanai foki, kia fakaalofa atu a mutolu ke he tagata kehe; ha ko e tau tagata kehe foki a mutolu ke he motu ko Aikupito.

20 Kia matakutaku a koe kia Iehova hau a Atua, ti fekafekau a koe kia ia, ti pipiki atu a koe kia ia mo e omonuo ai ke he hana higoa.

21 Ko ia ke fakaheke a koe ki ai, ko e hau a Atua foki a ia, ko ia ni ne eke e tau mena lalahi māu mo e matakutakuina ne kitekite ki ai hau a tau mata.

22 Ne o hifo e tau matua hau ki Aikupito ko e tokofitugofulu a lautolu; ka ko ainei kua fakatokologa e Iehova hau a Atua a koe ke tuga ne tau fetu he lagi he loga.