Tau Salamo

44 KO e Atua na e, kua fanogonogo e tau teliga ha mautolu, kua talatalahau he tau matua ha mautolu kia mautolu e gahua ne eke e koe ke he vaha ha lautolu ne aho mua.

2 Ko koe ni ne tutuli ke he hāu a lima e tau motu kehe, ka e to e koe a lautolu; kua fakamamahi foki e koe e tau motu, ka e fakatupu lahi a lautolu.

3 Ha ko e mena nakai moua e lautolu e motu ke he pelu ha lautolu, nakai fakamoui foki a lautolu ke he lima ha lautolu; ka ko e hau a lima matau, ko e hau a lima ni, mo e maama he hau a fofoga, ha kua fiafia a koe kia lautolu.

4 Ko e Atua na e, ko koe ko e haku a Patuiki; kia poaki mai e koe kia fakamoui a Iakopo.

5 Ko koe ni ke tulei atu ai e mautolu a lautolu ne fai fi kia mautolu; ko e hāu a higoa foki ke taholi ai e mautolu a lautolu kua tutu mai kia mautolu.

6 Ha ko e mena nakai tua au ke he haku a kaufana, ti nakai fakamoui au he haku a pelu.

7 Ha kua fakamoui e koe a mautolu mai ia lautolu kua fai fi kia mautolu; kua fakamā foki e koe a lautolu kua fakavihia mai kia au.

8 Ko e Atua ni kua fakaheke a mautolu ki ai ke he aho oti, ko e hāu a higoa foki ke fakaaue tukulagi ai e mautolu. Sila.

9 Ka kua tiaki e koe a mautolu mo e fakamā a mautolu; kua nakai tuai haele atu a koe fakalataha mo e tau kau ha mutolu.

10 Kua fakaliu ki tua e koe a mautolu mai mua he tagata kua ita mai; kua fofo foki ha mautolu a tau mena a lautolu kua fakavihia a mautolu.

11 Kua tuku atu e koe a mautolu tuga ne mamoe ke kai; kua fakapaea fano e koe a mautolu ke he tau motu kehe.

12 Kua fakafua atu e koe hāu a motu ka e nakai moua e koe ha koloa; ti nakai fakalahi foki hāu a koloa ke he totogi ne fakafuaaki a lautolu.

13 Kua eke e koe a mautolu ke ekefakakelea e lautolu kua katofia mo mautolu, kua va mai mo e feki a lautolu ne agaagai mai kia mautolu.

14 Kua eke e koe a mautolu mo kupu fakatai ke he tau motu kehe; kua luelue ai e tau ulu he tau tagata.

15 Ha i mua haku ke he aho oti e mena kua mā ai au; kua ufiufi foki haku mata he mā.

16 Ha ko e leo hana kua eke fakakelea mai mo e va mai; ha ko ia foki kua fai fi mai katoa mo ia kua taui.

17 Kua hohoko mai e tau mena oti ia kia mautolu, ka e nakai nimo ia mautolu a koe, ti nakai fakavai e mautolu ke he hau a maveheaga.

18 Kua nakai tukumuli ha mautolu a tau loto; kua nakai mafoki kehe foki ha mautolu a tau hui mai he puhala hāu;

19 Ke he vaha ne tuki malipilipi ai e koe a mautolu ke he mena ha i ai e tau tanimo, mo e ufiufi, e koe a mautolu ke he ata he mate.

20 Kaeke kua nimo ia mautolu e higoa he Atua ha mautolu, kaeke foki kua fakaolo atu ha mautolu a tau lima ke he Atua kehe;

21 Ti nakai kia kumi he Atua e mena ia? ha ko ia ni kua fioia e tau mena galo ha he tau loto.

22 Ha ko koe kua kelipopo ai e mautolu ke he aho oti; kua talahaua a mautolu poke tau mamoe ko e tamate ha ne fai.

23 Ko e Iki na e, kia ala a koe, ko e ha kia ne tugolo ai a koe? kia tu mai a, aua neke tiaki tukulagi e koe a mautolu.

24 Ko heigoa e mena ne ufiufi ai e koe hāu a fofoga, to fakanimonimo kia e koe ha mautolu a mamahi, mo e ha mautolu a matematekelea?

25 Ha kua fakamaloku hifo a mautolu ke he efuefu; kua piki ha mautolu a manava ke he kelekele.

26 Kia tu mai a ke eke mo lagomatai ma mautolu; kia laveaki e koe a mautolu ha ko e hāu a fakaalofa.