Tau Salamo

18 IEHOVA na e, haku a malolo, kua fakaalofa atu au kia koe.

2 Ko Iehova ko e haku a maka tumau haia, mo e haku a kolo, mo e haku a fakamoui; ko e haku a Atua, ko e haku a maka tumau, kua tua au kia ia; ko e haku a akau punuti, mo e hoe he haku a fakamouiaga, mo e haku a taue tokoluga.

3 Kua ui au kia Iehova, ko ia kua lata ke fakaheke ki ai; ti fakamoui ai au mai ia lautolu kua fai fi kia au.

4 Ne agaagai au he tau hele ke mate ai, kua matakutaku foki au ke he tau vai lele he tau tagata matahavala.

5 Ne agaagai au he tau hele a Seoli, ha i mua ia au e tau matahele he mate.

6 To ui atu au kia Iehova ke he haku a matematekelea, mo e kalaga au ke he haku a Atua; to fanogonogo mai a ia mai he faituga hana, ke he haku a leo, to hoko hake foki haku a kalaga kia ia, ke he hana na teliga.

7 Ti luelue ai mo e vivivivi e lalolagi, ne vivivivi foki e tau fakaveaga he tau mouga, ne luelue a lautolu ha kua ita tuai a ia.

8 Ne hake e ahua he hana tau pokoihu; ko e afi mai he hana fofoga kua moumou; kua tugi ai e tau malala.

9 Ne ue hifo a ia e lagi mo e haele hifo; ko e pouli foki ha i lalo he hana tau ve.

10 Ne heke e ia e kerupi, mo e lele; ne lele a ia ke he tau tapakau he matagi.

11 Kua eke e ia e pouli mo mena ke galo ai a ia, kua agaagai a ia ke he hana haeleaga ke he vai uli, ko e tau aolagi uli ia.

12 Ne mole atu hana tau aolagi, mai he kikila i mua hana, ko e uha tuli mo e tau malala kaka he afi.

13 Ne fakapakū e Iehova ke he lagi, ne vagahau mai a ia ne Mua ue atu ke he hana leo, ko e uha tuli mo e tau malala kaka he afi.

14 Ne fana atu e ia hana tau fana, mo e fakamavehevehe a lautolu, mo e tau uhila loga, kua tutuli ai a lautolu.

15 Ti kitia ai e tau hala he tau vai; mo e toka noa mai e tau fakave he lalolagi ke he hāu a akonakiaga, Iehova na e, ko e fakamanava he hāu a fofoga.

16 Kua fakaolo mai hana lima mai luga, kua toto kia au mo e futi au mai he tau vai loga.

17 Kua laveaki e ia au mai he tagata malolo kua fai fi kia au, mo lautolu ne fakavihia au; ha kua mua ha lautolu a malolo ke he haku.

18 Ha i mua haku a lautolu ke he aho he haku a malaia; ka kua eke a Iehova mo toko haku.

19 Kua ta mai e ia au ke he mena pu lahi, kua laveaki e ia au, ha kua finagalo fakaalofa mai a ia kia au.

20 Kua taui mai e Iehova au ke lata mo e haku a tututonu; kua taui mai e ia au ke lata mo e haku tau lima meā.

21 Ha kua taofi taha e au ke he tau puhala a Iehova, mo e nakai mahani kelea au ke fano kehe mo e haku Atua.

22 Ha kua ha i mua foki haku hana tau fakafiliaga oti; nakai tuku kehe foki ia au hana tau fakatufono.

23 Ne mahani hakohako au ki mua hana; ti taofi e au akita neke hala au.

24 Hanai, kua taui tuai au e Iehova ke lata mo e haku a tututonu, ke lata mo e meā he haku a tau lima ki mua hana.

25 Kua mahani fakaalofa a koe kia ia kua fakaalofa; ti mahani hakohako a koe ke he tagata mahani hakohako;

26 Ti mahani meā a koe kia ia kua mahani meā; ti mahani keukeu foki a koe kia ia kua mahani keukeu.

27 Ha ko koe ni, ke fakamoui e motu kua matematekelea; ka ko lautolu kua mata fakatokoluga, ke tulei hifo e koe a lautolu.

28 Ha ko koe foki ke tugi haku lamepa; to fakamaama haku a pouli e Iehova haku Atua.

29 Ha ko koe ni ne heia ai e au e tutu he kau; ko e haku a Atua ne hopo ai au e pa.

30 Ko e Atua, kua hakohako hana puhala; kua fakamoli e vagahau a Iehova; ko e akau punuti ni a ia kia lautolu oti kua tua kia ia.

31 Ha ko hai kia e Atua, ka ko Iehova hokoia? ko hai kia e maka tumau, ka ko e Atua ha tautolu hokoia?

32 Ko e Atua, ko ia ni ne pipi au ke he malolo, mo e fakahakohako foki haku a puhala.

33 Kua fakatatai e ia haku tau hui mo e tau hui he aila, kua fakatu e ia au ki luga he haku a tau mena tokoluga.

34 Kua fakaako e ia haku a tau lima ke tau; kua loloku he haku tau lima e kaufana apa kula.

35 Kua foaki mai foki e koe kia au e akau punuti he fakamouiaga mai ia koe; kua tokotu au he hāu a lima matau; ko e hāu a holoilalo kua fakamatalahi ai au.

36 Kua fakalaulahi e koe e mena ke fano ai au, neke hapelua haku tau tepu hui.

37 Kua tutuli e au a lautolu kua fai fi kia au, ti moua ni; nakai liu mai foki au ato fakaotioti a lautolu.

38 Kua keli e au a lautolu, ti nakai maeke ia lautolu ke tutu ki luga; kua veveli a lautolu ki lalo he haku tau hui.

39 Kua pipi e koe au ke he malolo ke tau; kua fakatokolalo e koe kia au a lautolu ne tutu mai kia au.

40 Ko koe ni, kua haga tua mai ai kia au a lautolu ne fai fi kia au: ko lautolu foki ne fakavihia au, kua oti kana a lautolu he keli e au.

41 Kua kalaga a lautolu, ka e nakai fai fakamoui; kua tagi atu kia Iehova, ka e nakai fanogonogo a ia kia lautolu.

42 Kua tuki malipilipi e au a lautolu, ti tuga ne efuefu a lautolu ki mua he matagi; kua liligi e au a lautolu tuga ne tau pelapela he puhala.

43 Kua laveaki e koe au he taufetoko au mo e motu, kua kotofa e koe au ke pule ke he tau motu kehe; kua fekafekau mai kia au e motu nakai iloa e au.

44 Ka logona e lautolu ti fanogonogo ai a lautolu kia au; to fakaheke fakatupua mai e tau tagata kehe kia au.

45 To mole atu e tau tagata kehe; to vivivivi a lautolu ke he tau mena ne puipui a lautolu ma lautolu ni.

46 Kua moui ni a Iehova, kia fakaaue foki ke he haku a maka tumau; kia fakaheke ke he Atua haku a fakamoui.

47 Ko e Atua haia kua taui atu ha ko au; ko ia foki kua fakatokolalo ai e tau motu kia au.

48 Ko ia kua laveaki au mai ia lautolu kua fai fi kia au; ko koe foki kua fakamatalahi au ki luga ia lautolu ne tutu mai kia au; kua laveaki e koe au mai he tagata favale.

49 Ko e mena ia ni, Iehova na e, ke fakaheke atu ai au kia koe ki mua he tau motu kehe; ti lologo atu foki e au ke he hau a higoa.

50 Kua eke e ia e fakamouiaga lahi ke he hana patuiki, to mahani totonu kia ia kua fakauku e ia, ko Tavita ni haia, mo e hana fanau tukulagi.