Roma

2 KO e mena ia kua nakai fai kupu ke tali atu ai a mutolu takitokotaha kua fakahala atu, ha ko e hāu a fakahala atu ke he taha kua fakahala ai e koe a koe; ha ko koe kua fakahala atu, kua eke e koe e tau mena ia ni.

2 Kua iloa foki e tautolu, kua lata ni mo e kupu moli e fakahala he Atua kia lautolu kua eke e tau mena pehenā.

3 Teme na e, ko koe na kua fakahala atu a lautolu kua eke e tau mena pehenā, ka kua eke e koe e tau mena ia ni, piko kia a koe ke hao a koe he fakahala he Atua?

4 Po kua fakateaga kia a koe ke he lahi ue atu he hana mahani totonu, mo e hana fakamanavalahi, mo e hana fakauka; he nakai iloa e koe kua takitaki he mahani totonu he Atua a koe ke he tokihala?

5 Ka ko e hāu a loto mao mo e nakai tokihala, kua tanaki ai e koe māu e ita ke he aho he ita mo e fakakiteaga he fakahala tonu he Atua;

6 Ko ia ke ta age ke he tau tagata takitokotaha e taui kua lata mo e ha lautolu a tau gahua;

7 To āge foki e moui tukulagi kia lautolu kua tumau ke he tau gahua mitaki, ko lautolu kua kumi e fakahekeaga, mo e lilifu, mo e moui nakai popo;

8 Ka ko e vale mo e ita kia lautolu kua fetoko, mo e nakai omaoma ke he kupu moli, ka e omaoma ke he mahani hepehepe;

9 Ko e matematekelea mo e fakaatukehe ke he tau tagata oti kana kua eke mahani kelea, kua fakamua e tau tagata Iutaia, katoa mo e tau tagata Heleni;

10 Ka ko e fakahekeaga, mo e lilifu, mo e monuina kia lautolu oti kua eke e mahani mitaki; kua fakamua e tau tagata lutaia, katoa mo e tau tagata Heleni.

11 Ha kua nakai fakamailoga tagata e Atua;

12 Ha ko lautolu gotoa kua hala ka e nakai ha i ai e fakatufono, to mahakava a lautolu ka e nakai ha i ai e fakatufono; ko lautolu gotoa foki kua hala ha ha i ai e fakatufono, to fakahala a lautolu ke he fakatufono;

13 Ha ko e mena nakai ko lautolu kua fanogonogo ke he fakatufono ke talahaua tututonu ki mua he Atua; ka ko lautolu kua omaoma ke he fakatufono, to talahaua tututonu a lautolu.

14 Ha ko e mena ka eke noa he tau motu kehe nakai ha ha i ai e fakatufono, e tau mena kua lata mo e fakatufono, pete ni he nakai ha i ai e fakatufono, kua eke a lautolu mo fakatufono kia lautolu;

15 Ko lautolu haia kua fakakite mai ai e gahua he fakatufono kua tohi ke he tau loto ha lautolu, kua fakamoli foki ha lautolu e tau loto manamanatu; kua fefakakeleāki foki, po ke fefakatonuaki ha lautolu a tau manatu;

16 Ka e fakahala a lautolu ke he aho ke fakafili ai he Atua kia Iesu Keriso e tau mena galo he tau tagata, ke lata mo e haku a vagahau mitaki.

17 Kitiala, ko koe kua fakahigoa ko e Iutaia, kua falanaki foki a koe ke he fakatufono, mo e hula ke he Atua,

18 Kua iloa foki hana finagalo, kua mailoga foki e koe e tau mena kehekehe, ha kua fakaako a koe ke he fakatufono;

19 Kua taofi foki e koe, ko koe ko e takiaki he tau matapouli, ko e maama kia lautolu ha ha he pouli,

20 Ko e akoako kia lautolu kua goagoa, ko e akoako ke he tau tama ikiiki, ha kua moua e tino he maama mo e kupu moli ha ha he fakatufono.

21 Hanai, ko koe kua fakaako ke he taha tagata, nakai kia fakaako e koe a koe? ko koe kua fakamatala atu, Ua kaiha, kua kaiha kia a koe?

22 Ko koe kua pehe atu, Ua faivao, kua faivao kia a koe? ko koe kua fakalialia ke he tau tupua, kua fofo kia e koe e tau faituga ha lautolu?

23 Ko koe kua hula ke he fakatufono, kua fakakelea kia ke he Atua he holia e koe e fakatufono?

24 Ha ko e mena kua eke fakakelea e higoa he Atua ha ko mutolu, ke he tau motu kehe, tuga he tohi mai.

25 Ha ko e mena aoga e peritome, kaeke kua omaoma a koe ke he fakatufono; kaeke kua holi e koe e fakatufono, kua eke hāu a peritome mo nakai peritome.

26 Hanai, kaeke kua fifitaki a ia kua nakai peritome ke he kupu tonu he fakatufono, nakai kia talahaua peritome hana a nakai peritome?

27 Ko ia foki kua tupu mai mo e nakai peritome, ka kua omaoma ni ke he fakatufono, to fakahala e ia a koe, ko koe kua holi e fakatufono, ka kua ha ha ia koe e Tohi mo e peritome,

28 Ha ko e mena nakai ko e Iutaia a ia kua kitia, nakai ko e peritome foki a ia kua kitia ke he tino;

29 Ka ko ia kua nakai kitia, ko e Iutaia ni a ia; ko e peritome foki, ko e mena he loto ia ha ha he agaga haia, nakai ha he tohi; ko e hana fakahekeaga nakai mai he tau tagata ia, ka e mai he Atua.