Fakakiteaga

20 NE kitia foki e au e agelu kua hifo mai he lagi, ha ia ia e kei he pahua nakai gata mai, ha he lima foki hana e toua lapatoa lahi.

2 Ti tapaki e ia e tarako, ko e gata tuai, ko e tiapolo ia mo Satani, ti lili e ia a ia ke he tau tau ne taha e afe.

3 Kua liti foki a ia ke he pahua kua nakai gata mai kua puipui foki a ia, mo e tuku atu e fakamau fakamailoga ki luga hana, kia nakai tuai fakahehe e ia e tau motu, ato katoatoa ai e tau tau ne taha e afe; ka mole atu foki ia to vevete ni a ia ke he tau aho gahoa.

4 Ne kitia foki e au e tau nofoaiki mo lautolu kua nonofo ai, kua tuku age foki e fakafiliaga kia lautolu; ne kitia foki e tau agaga ha lautolu kua tutū e tau ulu ha lautolu ha ko e talahau kia Iesu mo e kupu he Atua, ko lautolu foki kua nakai hufeilo ke he manu favale, po ke hana fakatino, kua nakai talia foki e fakamailoga ke he tau matale ha lautolu, po ke tau tima ha lautolu; ne momoui foki a lautolu ti eke mo tau patuiki fakalataha mo Keriso ke he tau tau ne taha e afe;

5 Ka ko lautolu kua mamate ne toe, kua nakai liu foki momoui a lautolu ato katoatoa ai e tau tau ne taha e afe. Ko e liu tu mai fakamua haia.

6 Kua monuina mo e tapu a ia ha i ai e tufaaga he liu tu mai fakamua; to nakai hoko kia lautolu e pule he mate ne ua, ka e eke a lautolu mo tau ekepoa he Atua mo Keriso, ti eke foki a lautolu mo tau patuiki fakalataha mo ia ke he tau tau ne taha e afe.

7 Ka katoatoa e tau tau ne taha e afe, ti vevete ai a Satani mai he mena ne puipui ai a ia.

8 To fina atu foki a ia ke fakahehe e tau motu ha he tau fahi ne fa he lalolagi, ko Koku mo Makoku, ke fakapotopoto a lautolu ke tau; kua tuga ne oneone he tahi a lautolu he tokologa.

9 Ti o hake a lautolu ke he laulahi he lalolagi, mo e pātakai e lautolu e heaga api he tau tagata tapu mo e māga kua ofania; ti to hifo ai e afi mai he Atua, mo e huhunu ai a lautolu;

10 Ko e tiapolo foki ne fakahehe a lautolu, kua liti a ia ke he loloto he afi mo e taio, ha i ai e manu favale mo e perofeta pikopiko; to matematekelea ai a lautolu ke he aho mo e po tukulagi tukumuitea.

11 Ne kitia foki e au e nofoaiki hina kua lahi, mo ia kua nofo ai, kua hola kehe e lalolagi mo e lagi mai mua hana; kua nakai kitia foki ha mena ke tu ai a laua.

12 Ti kitia e au a lautolu ne mamate, ko e tau lalo tagata katoa mo e tau iki, kua tutu ki mua he Atua, ti fofola ai e tau tohi; kua fofola foki e taha tohi, ko e tohi haia he moui; ti fakafili ai a lautolu kua mamate ke he tau mena kua tohi ke he tau tohi, ke lata mo e tau mahani ha lautolu.

13 Kua ta atu he tahi a lautolu kua mamate ha i ai, kua ta atu foki he mate mo e Hate a lautolu kua mamate ha i ai; kua takitokotaha foki a lautolu mo e fakafili ke lata mo e ha lautolu a mahani.

14 Kua liti foki e mate mo e Hate ke he loloto afi; ko e mate ne ua haia.

15 Kaeke foki kua moua ha tagata kua nakai tohia ke he tohi he moui, kua liti a ia ke he loloto afi.