Tau Salamo

79 KO e Atua na e, kua hokoko mai e tau motu kehe ke he hāu a fonua; kua fakakelea e lautolu hāu a faituga tapu; kua eke e lautolu a Ierusalema mo tanakiaga maka.

2 Kua age e lautolu e tau tino he hāu a tau fekafekau mamate mo mena kai ke he tau manu lele, kua age e tau tino he hāu a tau tagata tapu ke he tau manu totolo.

3 Kua fakamaligi ha lautolu a toto tuga ne magavai kua takai a Ierusalema; ti nakai fai tagata ke tanu a lautolu.

4 Kua eke a mautolu mo ekefakakelea e lautolu kua katofia mo mautolu, kua va mai mo e feki e lautolu kua agaagai mai kia mautolu.

5 Iehova na e, to ita mai a koe ato a fe? ke tukulagi kia? to vela kia hāu a ita tafua tuga ne afi?

6 Kia liligi atu hāu a ita lahi ke he tau motu kehe, ko lautolu kua nakai iloa a koe, katoa mo e tau kautu kua nakai ui atu ke he hāu a higoa.

7 Ha kua kai e lautolu a Iakopo, kua moumou foki e lautolu e mena ne nofo ai a ia.

8 Aua neke manatu e koe ha mautolu a tau hala ne aho mua; kia alumaki hāu a fakaalofa hofihofi ke mua kia mautolu; ha kua opeope lahi a mautolu.

9 Ko e Atua na e, ha mutolu a fakamouiaga, kia lagomatai mai ā kia mautolu ha ko e hāu a higoa lilifu; kia laveaki e koe a mautolu, mo e fakamagalo ha mautolu a tau hala ha ko e hāu a higoa.

10 Ko e ha kia ne pehe mai ai e tau motu kehe, Ko fe e Atua ha lautolu? kia iloa he tau motu kehe ha i mua ha mautolu e taui he tau toto he tau fekafekau hāu ne fakamaligi.

11 Kia hoko atu kia koe e oi he tagata kua lili; ke lata mo e malolo he hau a lima kia fakahao e koe a lautolu kua ikakupega;

12 Mo e taui lagafitu atu ke he tau loto ha lautolu ne katofia mo mautolu e tau kupu ha lautolu ne ekefakakelea ai e lautolu a koe ma Iki na e.

13 Ko mautolu foki ko e hāu a tau tagata mo e fuifui mamoe ne fagai e koe, to fakaheke atu tukulagi a mautolu kia koe; to talahau atu e mautolu hāu a fakahekeaga ke he taha hau mo e taha hau.