Tau Salamo

36 KO e kupu he holifono ke he tagata mahani kelea, ha ha he loto haku haia, kua nakai fakai ke matakutaku a ia ke he Atua.

2 Ha kua fakavai e ia a ia ni, ke he hana tau hala po ke iloa ai mo e vihiatia ai.

3 Ko e tau kupu he hana gutu ko e hala mo e fakavai ia; kua toka tuai e ia e mahani fakalatalata mo e mahani mitaki.

4 Kua manamanatu e ia e mahani kelea ki luga he hana mohega; kua tumau a ia ke he puhala nakai mitaki; nakai fakavihia e ia e kelea.

5 Iehova na e, ha ha he lagi hāu a fakaalofa; kua hoko hāu a fakamoli ke he tau aolagi.

6 Ko e hāu a tututonu, tuga ne tau mouga he Atua ia; ko e hāu a tau fakafiliaga ko e moana hokulo ia; Iehova na e, to fakamoui e koe e tau tagata katoa mo e tau manu.

7 Ko e Atua na e, kua uhoaki hāu a fakaalofa, ti kua fakamalu e tau tagata ki lalo he malu he hau a tau tapakau.

8 To makona a lautolu he tau mena lolo ha he fale hāu; to fakainu foki e koe a lautolu he vai lele he hāu a tau mena fakafiafia.

9 Ha ko e mena ha ha ia koe e puna he moui; ko e hāu a maama ke kitia ai e mautolu e maama.

10 Kia fakatumau e koe hāu a fakaalofa kia lautolu kua iloa a koe; mo e hāu a tututonu kia lautolu kua loto fakamoli.

11 Aua neke hoko mai kia au e hui he fakatokoluga, aua foki neke vega au he tau lima he tau tagata mahani kelea.

12 Kua veveli a lautolu ne eke mahani hepehepe ke he mena ia ni; kua palu hifo a lautolu, ti nakai maeke ke tu ki luga.