Ioane

15 KO au nai ko e vine moli, ka ko e Matua haku ko e gahua vine a ia.

2 Ko e tau la oti ni ha ia au, nakai fua, kua uta kehe e ia; ka ko e tau la oti kua fua, kua taute e ia, kia au atu ai he fua.

3 Kua oti foki he fakamea a mutolu ke he kupu ne talahau atu ai e au kia mutolu.

4 Kia tumau a a mutolu kia au, ko au foki kia mutolu; tuga ne la nakai maeke ke fua hokoia, kaeke kua nakai tumau ke he vine; ti pihia foki a mutolu, kaeke kua nakai tumau a mutolu ia au.

5 Ko au nai ko e vine, ko e tau la a mutolu; ko ia ke tumau kia au, mo au kia ia, to fua loga a ia; ha ko e mena nakai maeke ia mutolu ke eke ha mena, ka nakai nofo ai au.

6 Kaeke kua nakai tumau taha kia au, ti tiaki ai a ia ki tua tuga ne la, kua fakapakupaku foki, ati tatanaki ai he tau tagata, mo e tolo ke he afi, ti huhunu ai.

7 Kaeke ke tumau a mutolu kia au, ti tumau foki haku a tau kupu kia mutolu, ko e tau mena oti kana ke manako ki ai a mutolu, kia ole atu ai a mutolu, ati eke ai ma mutolu.

8 Kua fakaheke ai ke he haku a Matua ke he mena nai, ka fua loga mai a mutolu; ati eke ai a mutolu mo tau tutaki haku.

9 Tuga ne Matua ne fakaalofa kia au, kua pihia haku a fakaalofa kia mutolu, kia tumau a mutolu ke he haku a fakaalofa.

10 Kaeke ke omaoma e mutolu haku a tau poaki, ti tumau a mutolu ke he haku a fakaalofa; tuga au ne oma e tau poaki he haku a Matua, mo e tumau au ke he hana fakaalofa.

11 Kua tala atu e au e tau mena nai kia mutolu, kia tumau ai haku a fiafia kia mutolu, kia fakakatoatoa ai foki ha mutolu a fiafia.

12 Ko e haku a poaki hanai, kia feofanaki a mutolu, tuga e fakaalofa au kia mutolu.

13 Nakai mua ni e fakaalofa he taha ke he fakaalofa nai, kia tuku atu e taha hana moui ke hukui aki hana tau kapitiga.

14 Ko e haku a tau kapitiga a mutolu, kaeke ke eke e mutolu e tau mena oti kana kua tala atu ai au kia mutolu.

15 Nakai tuai totoku atu e au a mutolu ko e tau fekafekau, ha ko e mena nakai iloa he fekafekau e tau mena kua eke he hana iki; ka e totoku atu e au a mutolu ko e tau kapitiga; ha kua fakailoa atu e au kia mutolu e tau mena oti ne fanogonogo ai au ke he haku a Matua.

16 Nakai fifili e mutolu au, ka kua fifili e au a mutolu; kua tuku atu foki e au a mutolu, kia o a mutolu, mo e fua mai ke he tau fua, mo e tumau ha mutolu a tau fua; kia foaki atu kia mutolu he Matua e tau mena oti kana ka ole atu ai a mutolu kia ia ke he haku a higoa.

17 Kua tala atu e au e tau mena ia kia mutolu, kia feofanaki a mutolu.

18 Kaeke ke fakavihia he lalolagi a mutolu, kua iloa e mutolu ne fakavihia fakamua mai kia au, ti fakavihia ai kia mutolu.

19 Kane mai ko e tau tagata he lalolagi a mutolu po kua fakaalofa e lalolagi ke he hana tau tagata; ka e nakai ko e tau tagata he lalolagi a mutolu, ka kua fifili e au a mutolu mai he lalolagi, ko e mena ia kua fakavihia ai he lalolagi a mutolu.

20 Kia manamanatu a mutolu ke he kupu ne tala atu ai e au kia mutolu, Nakai mua e fekafekau ke he hana iki. Kaeke kua favale a lautolu kia au, ti favale foki kia mutolu; kaeke kua omaoma a lautolu ke he haku a kupu, ti omaoma ai foki a lautolu ke he ha mutolu a kupu.

21 Ka to eke e lautolu e tau mena oti ia kia mutolu, ha ko e haku a higoa, he nakai iloa e lautolu a ia ne fakafano mai au.

22 Kane mai nakai hau au mo e vagahau atu kia lautolu, po kua nakai fai hala e lautolu; ka ko e ainei, nakai fai mena ke ufi aki ha lautolu a hala.

23 Ko ia ne fakavihia mai kia au, kua fakavihia foki a ia ke he haku a Matua.

24 Ane nakai eke e au kia lautolu e tau gahua, nakai eke ni e taha, po kua nakai fai hala a lautolu; ka ko e ainei, kua kitia tuai e lautolu, mo e fakavihia mai a lautolu kia au, katoa mo e haku a Matua.

25 Ka e pihia ni kia fakamoli ai e kupu ne tohi ke he fakatufono ha lautolu, Kua fakavihia teao mai a lautolu kia au.

26 Ka haele mai e Lagomatai, ko ia ke fakafano mai e au kia mutolu mai he Matua, ko e Agaga ke tupu ai e kupu moli haia, ko ia ne haele mai mai he Matua, ko ia ni ke talahau kia au.

27 To talahau foki e mutolu, ha kua fakalataha a mutolu mo au tali mai he kamataaga.