1 Ioane

4 KO e tau tagata fakahelehele na e, aua neke talia e tau agaga oti kana, ka kia kamatamata e mutolu e tau agaga po ke mai he Atua a lautolu; nukua tokologa e tau perofeta pikopiko kua o atu ke he lalolagi.

2 Ko e mena hanai ke iloa ai e mutolu e Agaga he Atua, ko e tau agaga oti kua talahau, kua haele mai tuai a Iesu Keriso ke he tino, mai he Atua a lautolu.

3 Ka ko e tau agaga oti kua nakai talahau, kua haele mai a Iesu Keriso ke he tino, nakai mai he Atua a lautolu, ka ko e anetikeriso haia, ne fanogonogo ai a mutolu ha ne hau a ia, ha he lalolagi a ia ke he vaha nai ni.

4 Ko mutolu, ko e tau fanau ikiiki na e, mai he Atua a mutolu, kua kautu foki a mutolu kia lautolu, nukua mua a ia ha ia mutolu, kia ia ha he lalolagi.

5 Ko lautolu, mai he lalolagi a lautolu, ko e mena ia kua vagahau ai a lautolu ke he tau mena he lalolagi; kua fanogonogo atu foki e lalolagi kia lautolu.

6 Ko mautolu, mai he Atua a mautolu, ko ia kua iloa e Atua, kua fanogonogo mai a ia kia mautolu; ko e tagata kua nakai mai he Atua, kua nakai fanogonogo mai a ia kia mautolu; ko e mena ia kua iloa ai e tautolu e agaga moli, mo e agaga fakahehe.

7 Ko e tau tagata fakahelehele na e, kia feofanaki a tautolu, ha ko e mena mai he Atua e fakaalofa; ko lautolu auloa foki kua fakaalofa, kua fanau mai a lautolu mai he Atua, kua iloa foki e lautolu e Atua.

8 Ko e tagata kua nakai fakaalofa, kua nakai iloa e ia e Atua; ha ko e Atua ko e fakaalofa a ia.

9 Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana Tama fuataha ke he lalolagi, kia momoui a tautolu kia ia.

10 Ko e fakaalofa hanai, nakai ko e fakaalofa ha tautolu ke he Atua, ka kua fakaalofa mai a ia kia tautolu; ne fakafano mai foki e ia hana Tama ko e lukutoto mo e tau hala ha tautolu.

11 Ko e tau tagata fakahelehele na e, kaeke kua pihia e fakaalofa mai e Atua kia tautolu, lata ni ke feofanaki a tautolu.

12 Nakai fakai taha kua kitia ni e Atua; kaeke kua feofanaki a tautolu, kua nofo e Atua ki loto ia tautolu, kua katoatoa foki e fakaalofa kia ia ki loto ia tautolu.

13 Ko e mena foki hanai kua iloa ai e tautolu kua nonofo a tautolu ki loto ia ia, ko ia foki ki loto ia tautolu, ha ko e hana Agaga kua foaki mai e ia kia tautolu.

14 Ko mautolu foki kua kitia e mautolu, mo e talahau e mautolu, kua fakafano mai he Matua e Tama ko e Fakamoui he lalolagi.

15 Ko e tagata kua talahau, ko Iesu ko e Tama he Atua a ia, kua nofo e Atua ki loto ia ia, ko ia foki ki loto he Atua.

16 Kua iloa foki e tautolu, mo e tua a tautolu ke he fakaalofa ha he Atua kia tautolu. Ko e Atua, ko e fakaalofa a ia; ko e tagata kua nofo mo e fakaalofa, kua nofo a ia ki loto he Atua, ko e Atua foki ki loto ia ia.

17 Ko e mena hanai kua katoatoa ai e fakaalofa kia tautolu, kua moua e tautolu e fakamalolo ke he aho he fakafiliaga; ha ko e mena tuga a ia, ti pihia foki a tautolu ke he lalolagi nai.

18 Nakai toka ai ha matakutaku ke he fakaalofa; ka ko e fakaalofa katoatoa kua vega kehe e ia e matakutaku, ha ko e ha he matakutaku e mamahi; ka ko ia kua matakutaku, kua nakai fakakatoatoa a ia ke he fakaalofa.

19 Kua fakaalofa a tautolu, ha ko e mena ne fakamua mai hana fakaalofa kia tautolu.

20 Kaeke ke pehe age taha, Kua fakaalofa au ke he Atua, ka e vihiatia e ia hana matakainaga, ko e pikopiko a ia; ha ko ia kua nakai fakaalofa ke he matakainaga hana kua kitia, maeke fefe ia ia ke fakaalofa ke he Atua, kua nakai kitia e ia?

21 Ko e poaki foki hanai ne moua mai e tautolu ia ia, ko ia kua fakaalofa ke he Atua, kia fakaalofa foki a ia ke he matakainaga hana.