Tau Fakatai

12 KO ia kua fiafia ke he fakaakoaga kua fiafia a ia ke he iloilo; ka ko ia kua fakavihia ke he akonakiaga kua goagoa ni a ia.

2 Ko e tagata mahani mitaki to moua e ia e fakaalofa mai ia Iehova; ka ko e tagata kua eke e tau lagatau kelea, to fakahala a ia.

3 Nakai tumau ai e tagata ke he mahani kelea; ka ko e vaka he tagata tututonu nakai ni fagahuatia ia.

4 Ko e fifine mahani mitaki ko e foufou a ia he hana taane; ka ko ia kua fakama, kua lata a ia mo e mena ke popo ai hana tau hui motua.

5 Ko e tau manatu he tau tagata tututonu, kua tonu ia; ka ko e tau pulega he tau tagata mahani kelea, ko e tau pikopiko haia.

6 Ko e tau kupu he tau tagata mahani kelea kua takahao ia ke he toto; ka ko e gutu he tau tagata mahani hakohako to laveaki ai a lautolu.

7 Kua fakaoti e tau tagata mahani kelea, ti nakai ni ha ha i ai a lautolu; ka ko e fale he tagata tututonu to tumau ni a ia.

8 Kua fakaheke ke he tagata ke lata mo e hana pulotu; ka ko ia kua loto hepehepe to vihiatia ni a ia.

9 Kua mitaki e tagata kua fakateaga ki ai kua fai fekafekau; ka e kelea a ia kua fakaheke a ia kia ia, ka e fia kai a ia.

10 Kua fakahelehele he tagata tututonu e manu hana; ka ko e fakaalofa hofihofi he tau tagata mahani kelea, ko e favale haia.

11 Ko ia kua gahua ke he hana fonua to makona ai a ia he tau mena kai; ka ko ia kua mui atu ke he tau tagata matahavala kua noa a ia mo e manamanatu.

12 Ko e manako he tau tagata mahani kelea ke he tau mena kua moua he tau tagata mahani kelea; ka ko e vaka he tau tagata tututonu, to fua mai haia.

13 Ha ha i ai e hele kelea ke he holifono he tau laugutu; ka e hao e tagata tututonu mai he matematekelea.

14 Kua makona e tagata he tau mena mitaki mai he tau fua he hana gutu; kua taui atu foki ke he tagata he tau mena ne eke he tau lima hana.

15 Ko e puhala he tagata goagoa, kua tonu ia ke he manatu hana; ka ko ia kua fanogonogo ke he pule, kua iloilo a ia.

16 Kua iloa agataha e ita he tagata goagoa, ka ko e tagata lotomatala, kua ufiufi e ia hana mā.

17 Ko ia kua vagahau mai mo e moli, kua fakakite mai e ia e tonu; ka ko e tagata fakamoli mena ne mahani pikopiko, kua fakakite mai e ia e tau mena fakavai.

18 Ha ha i ai e tagata kua vagahau, ti tuga ne tuina ai e tau tagata he pelu; ka ko e alelo he tagata iloilo ke malolo ai.

19 To fakatumau tukulagi e tau laugutu kua vagahau mo e moli; ka ko e alelo pikopiko, ke tuga ne magaaho ke kemo ai e mata haia.

20 Ko e fakavai ne toka ai ke he tau loto ha lautolu kua eke e tau lagatau kelea; ka e ha ha i ai e olioli, kia lautolu kua pule ke mafola.

21 Nakai ni hoko ha mena kelea taha ke he tagata tututonu; ka ko e tau tagata mahani kelea to puke a lautolu ke he kelea.

22 Kua vihiatia e Iehova e tau laugutu pikopiko; ka kua fiafia a ia, kia lautolu kua eke e tau mena moli.

23 Kua ufiufi he tagata lotomatala hana iloilo; ka ko e tau loto he tau tagata goagoa kua fakapuloa ai ha lautolu a goagoa.

24 To kautu he tau lima ha lautolu ne malolo ke gahua; ka ko e tagata teva, to eke a ia mo tagata ke ta age e poa.

25 Ko e fakaatukehe ke he loto he tagata kua tukutukuhifo ai a ia; ka ko e kupu mitaki ke olioli ai.

26 Kua fakakite he tagata tututonu e puhala, ke he hana kapitiga; ka ko e puhala he tau tagata mahani kelea kua fakahehe ai a lautolu.

27 Nakai tunu he tagata teva hana tau manu ne moua ai he tutuli; ka ko e tau mena uho he tau tagata, ne tokai ia kia ia ne malolo ke gahua.

28 Ha ha i ai e moui, ke he puhala he mahani tututonu; ti nakai fai mate foki ke he hana tau puhala loto.