Isaia

26 KO e aho ia to lologo ai e lologo nai ke he motu ko Iuta, Ha ha ia tautolu e maga malolo ko e fakamouiaga to eke ia mo kaupa, mo e tau kolo.

2 Kia hafagi lā e mutolu e tau gutuhala, ke huhu mai ai e motu mahani tututonu ko lautolu ne omaoma ke he mena moli.

3 To leveki e koe a ia kua mauokafua e loto ke monuina ni a ia; ha kua tua a ia kia koe.

4 Kia tua ā mutolu kia Iehova tukulagi; ha ko Ioha ko Iehova, ko e maka tumau tukulagi haia.

5 Ha kua tulei hifo e ia a lautolu ne nonofo ke he tau mena tokoluga; ko e maga tokoluga kua fakatokolalo ai e ia, kua fakatokolalo ke hoko ke he kelekele, kua fakatatai a ia mo e efuefu.

6 To taholi ai he tau hui, ko e tau hui ni ha lautolu ne matematekelea, ko e tau hui foki ha lautolu ne lolelole.

7 Kua molemole e puhala he tau tagata tututonu; ko koe na, ko e tututonu, kua fakamolemole ai e puhala he tau tagata tututonu.

8 Ko e moli, Iehova na e, kua tatali atu a mautolu kia koe ke he puhala he hau a fakafiliaga; ko e manako he tau loto ha mautolu ha ha he higoa hāu ia, mo e fakamanatuaga kia koe.

9 Kua manako haku loto kia koe ke he po; ko e moli to uhu kumi a koe he haku a agaga ki loto ia au; ha ko e mena ka eke ai hau a tau fakafiliaga ke he lalolagi, ti ako ai e mahani tututonu e lautolu kua nonofo ke he atu motu.

10 Kia ofania a ia ne mahani kelea, ka e nakai ni ako e ia e mahani tututonu; to mahani hepehepe a ia ke he motu tututonu, nakai kitia foki e ia e lilifu a Iehova.

11 Iehova na e, kua tokoluga hau a lima, ka e nakai kitekite ki ai a lautolu; to kitekite ni a lautolu, ti mā ai a lautolu; ko e fakamakutu ha ko e hau a motu, ko e moli, ko e afi ha ko lautolu ne fai fi kia koe to fakaoti ai a lautolu.

12 Iehova na e, to tuku mai e koe e monuina kia mautolu; ha kua eke foki e koe ma mautolu ha mautolu a tau gahua oti.

13 Iehova na e, ha mautolu a Atua, ne pule kia mautolu e tau iki nakai ko koe; ka ko koe hoko koe ni, to fakaheke atu a mautolu ke he hau a higoa.

14 Kua mamate a lautolu, nakai tuai momoui a lautolu, ko e tau agaga ha lautolu, nakai liliu tutu mai a lautolu; ha kua fakahala e koe a lautolu, mo e fakaoti e koe a lautolu, kua fakagalo ai e koe e manatu oti kia lautolu.

15 Kua fakatokologa e koe e motu, Iehova na e, kua fakatokologa e koe e motu; kua lilifu ni a koe; kua fakamamao e koe e tau katofia oti he motu.

16 Iehova na e, ne kumi atu e lautolu a koe ke he ha lautolu a matematekelea, ne liligi atu e lautolu e liogi ha ko e hau a akonaki kia lautolu.

17 Tuga ne fifine kua fatu, kua tata tuai hana fanauaga, kua mamahi a ia mo e fakatutu ai ke he hana mamahi; Iehova na e, ne pihia ni a mautolu ki mua hau.

18 Ne fatu a mautolu, ti mamahi a mautolu, ti tuga ne mena fanau ai e mautolu e havili, nakai eke ai e mautolu ha fakamouiaga ke he lalolagi, to nakai veveli foki a lautolu ne nonofo ke he atu motu.

19 To momoui mai hau a tau tagata mamate, ti liliu tutu mai haku a tau tino mamate. Kia ala mai a, mo e kalaga fiafia a mutolu kua nonofo ke he efuefu; ha ko e hahau hāu kua tuga ne hahau ke he vao mui haia; to liti atu foki he kelekele a lautolu ne mamate.

20 Kia o mai a, haku a motu na e; kia huhu atu ā mutolu ke he ha mutolu a tau poko, mo e pa ai ha mutolu a tau gutuhala ki tua ha mutolu; kia fakamumuli ai a koe ke he magaaho kiliiku, ato mole atu e ita lahi.

21 Ha ko e mena kitiala, ko e haele mai ne fai a Iehova he mena kua haele ai a ia, kia ahi mai e ia a lautolu kua nonofo ke he lalolagi ha ko e tau mahani kelea ha lautolu; to fakakite foki he kelekele hana toto, to nakai liu ufiufi ai foki hana tau tagata ne kelipopo.