Hosea

Ko e Tohi a Hosea

1 KO e kupu a Iehova ne hoko atu kia Hosea ko e tama a Peri, ke he vaha a Usia, mo Iotamo, mo Ahasa, mo Hesekia, ko e tau patuiki a Iuta; ko e vaha foki a Ierepoamo ko e tama a Ioasa ko e patuiki a Isaraela.

2 Ko e kamataaga he vagahau mai a Iehova kia Hosea. Ne pehe mai a Iehova kia Hosea, Fano a koe, ke fai hoana ke he fifine faivao, mo e eke ai e koe e tau tama faivao māu, ha kua faivao lahi ni e motu nai, kua o kehe a lautolu ia Iehova.

3 Ti fano a ia mo e fai hoana a ia kia Komeri ko e tama fifine a Tipelaima, ne fatu foki a ia ti fanau ai e ia kia ia e tama tane.

4 Ti pehe mai a Iehova kia ia, Kia ui e koe hana higoa, ko Isereelu; ha kua toe tote, ti taui atu e au e toto a Isereelu ke he magafaoa a Iehu, to fakaoti foki e au e kautu he magafaoa a Isaraela.

5 Ko e aho ia to papaki ai e au e kaufana a Isaraela ke he pahua a Isereelu.

6 Ne fatu foki a ia, ti fanau ai e ia e tama fifine; ti pehe mai a Iehova kia ia, kia ui e koe hana higoa, ko Loruama; ha ko e mena nakai fakaalofa atu foki au ke he magafaoa a Isaraela, kia uta kehe ai e au ha lautolu a tau hala.

7 Ka to fakaalofa atu au ke he magafaoa a Iuta, to fakamomoui e au a lautolu ha ko Iehova ha lautolu a Atua; nakai fakamoui ai e au a lautolu ke he kaufana, po ke pelu, po ke tau, po ke tau solofanua, po ke kau heke solofanua.

8 Kua tapani e ia a Loruama, ti fatu a ia, ti fanau ai e ia e tama tane.

9 Ti pehe mai e Atua, Kia ui e koe hana higoa, ko Loama; ha ko e mena nakai ko e motu haku a mutolu, ti nakai eke foki au mo Atua ha mutolu.

10 Ka to eke e fanau a Isaraela ka totou ke tuga ne oneone he tahi, kua nakai maeke ke fafati, to nakai maeke ke totou; ko e mena foki ne pehe atu ai kia lautolu, Nakai ko e motu haku a mutolu, to pehe atu ai kia lautolu, Ko e tau tama he Atua moui a mutolu.

11 Ti fakapotopoto fakalataha ai e fanau a Iuta, katoa mo e fanau a Isaraela, to kotofa foki e lautolu e takitaki tokotaha ma lautolu, to o hake foki a lautolu he motu; ha ko e aho lahi e aho a Isereelu.