2 Tau Patuiki

17 KO e tau ne hogofulu ma ua a Ahasa ko e patuiki a Iuta ne eke ai a Hosea ko e tama a Ela mo patuiki a Isaraela i Samaria, ti hiva e tau ne patuiki ai a ia.

2 Ne eke foki e ia e mahani kelea ki mua a Iehova ka e nakai tuga ne mahani he tau patuiki a Isaraela ne fakamua atu kia ia.

3 Kua hake mai a Salamanesa ko e patuiki a Asuria ke tau kia ia, ti eke ai a Hosea mo fekafekau hana mo e ta age ai e tau poa kia ia.

4 Ka kua kitia he patuiki a Asuria e fakafualoto a Hosea, ha kua fakafano atu e ia e tau fekau kia So ko e patuiki a Aikupito, kua nakai ta age foki e ia e tau poa ke ke patuiki a Asuria, tuga ne eke ai e ia ke he taha tau mo e taha tau, ko e mena ia ne puipui ai he patuiki a Asuria a ia, mo e lili ai a ia ke he fale puipui.

5 Ti hake ai e patuiki a Asuria ke he motu oti kua hake ni a ia ki Samaria, mo e pa takai ai e ia ke he tau tau ne tolu.

6 Ko e tau ne hiva a Hosea ne fofo ai he patuiki a Asuria a Samaria, ti uta e ia a Isaraela mo e fakapaea atu a lautolu ki Asuria, ti fetuku atu e ia a lautolu ki Hala mo Havoli ne tata age ke he vailele ko Kosana, katoa mo e tau maga a Metai.

7 Ne hohoko e tau mena na ha kua hala e fanau a Isaraela kia Iehova ha lautolu a Atua, ne ta hake a lautolu mai he motu ko Aikupito mai lalo he lima a Farao ko e patuiki a Aikupito, mo e matakutaku ai a lautolu ke he tau atua kehe.

8 Ti o fano ai a lautolu ke he tau mahani he tau motu kehe ne vega ai e Iehova ki mua he fanau a Isaraela, katoa mo e tau mahani he tau patuiki a Isaraela ne eke ai e lautolu.

9 Ti eke fakagalogalo ai he fanau a Isaraela e tau mena kua nakai lata ke eke kia Iehova ha lautolu a Atua; ti ati ai e lautolu ma lautolu e tau mena tokoluga ke he tau maga oti ha lautolu, ko e kolo he tau tagata toko katoa mo e maga ne nonofo ai ke he tau taue.

10 Ne fakatu foki e lautolu e tau tupua ma lautolu mo e tau tupua a Asaira ki luga he tau matiketike tokoluga oti, ki lalo foki he tau akau lau uhiuhi oti.

11 Ne huhunu ai e lautolu e tau mena manogi ke he tau mena tokoluga oti, tuga ne tau motu kehe ne fakapaea atu ai e Iehova ki mua ha lautolu, ne eke foki e lautolu e tau mena kelea ke fakahogohogomanava atu ai kia Iehova;

12 Ha kua fekafekau ai a lautolu ke he tau tupua, ko e tau mena ne tala mai ai e Iehova kia lautolu, Aua neke eke e mutolu e mena na.

13 Ti akonaki mai ni a Iehova kia Isaraela, katoa mo Iuta ke he hana tau perofeta oti, mo e tau tagata kitekite oti, kua pehe mai, Kia liliu mai a mutolu he tau puhala kelea, mo e omaoma a mutolu ke he haku a tau poaki, mo e haku a tau kotofaaga ke lata mo e tau fakatufono oti ne poaki atu ai e au ke he tau matua ha mutolu, ti fakafano atu ai foki e au kia mutolu ke he haku a tau fekafekau ko e tau perofeta.

14 Ka e nakai ni fanogonogo a lautolu ka e fakamao ai e lautolu ha lautolu a tau ua, tuga ne fakamao ai e tau ua he tau matua ha lautolu, kua nakai tua a lautolu kia Iehova ha lautolu a Atua.

15 Ti tiaki e lautolu hana tau kotofaaga mo e hana maveheaga ne eke ai e ia mo e tau matua ha lautolu, katoa foki mo e hana tau fakatufono ne vagahau mai e ia kia lautolu; ne mumui atu foki a lautolu ke he tau mahani fakateaga ti mahani fakateaga ai a lautolu; ti mumui atu a lautolu ke he tau motu kehe ne agaagai mai kia lautolu, ne poaki mai ai e Iehova kia lautolu, Aua neke eke e lautolu tuga na lautolu.

16 Ti tiaki e lautolu e tau poaki oti a Iehova ha lautolu a Atua, ti eke ai e lautolu e tau tupua ma lautolu, ko e tau punua povi ne ua; ne eke foki e lautolu e tau tupua Asaira, ti fakaveli fakafohifo a lautolu ke he kau oti he lagi, mo e fekafekau ai a lautolu kia Paala

17 Ti fakafano age e lautolu ha lautolu a tau tama tane mo e ha lautolu a tau tama fifine ke he afi, ti eke e lautolu e tau lagatau he tau taulaatua, mo e kumi e tau fakamailoga; ti fakafua atu e lautolu a lautolu ke eke e tau mahani kelea ki mua a Iehova ke fakahogohogomanava atu kia ia.

18 Ko e mena ia ne ita lahi mai ai a Iehova kia Isaraela, ti uta kehe ai e ia a lautolu mai mua hana; nakai ni toe, ka ko e magafaoa a Iuta hoko lautolu.

19 Ko Iuta foki nakai omaoma a lautolu ke he tau poaki a Iehova ha lautolu a Atua, ka kua o fano a lautolu ke he tau mahani a Isaraela ne eke ai e lautolu.

20 Ti tiaki ai e Iehova e fanau oti a Isaraela mo e fakamamahi e ia a lautolu, ti tuku atu e ia a lautolu ke he tau lima ha lautolu en fofo a lautolu ati oti ti liti e ia a lautolu mai mua hana.

21 Ha ko e mena vevehe kehe e ia a Isaraela mai he magafaoa a Tavita; ti eke e lautolu a Ierepoamo ko e tama a Nepata mo patuiki ha lautolu, ti uhu kehe e Ierepoamo a Isaraela neke mumui atu a lautolu kia Iehova, ti fakatupu ai e ia kia lautolu e hala lahi.

22 Ti o ai e fanau a Isaraela ke he tau hala oti a Ierepoamo ne eke e ia, nakai o kehe a lautolu mo e tau mena ia.

23 Ato tuku kehe ai e Iehova a Isaraela mai mua hana, tuga ne vagahau mai ai e ia ke he hana tau fekafekau oti ko e tau perofeta, Ko e mena ia ne uta a Isaraela mo e fakapaea ai a lautolu mai he motu ha lautolu ki Asuria, kua hoko mai ke he aho nai.

24 Ti ta mai ai he patuiki a Asuria e tau tagata i Papelonia, mo Kuta, mo Ava, mo Hamato, katoa foki mo Sefavaima, ti tuku atu a lautolu ke he tau maga a Samaria ke hukuiaki e fanau a Isaraela, ti eke e lautolu a Samaria ma lautolu, mo e nonofo ai a lautolu ke he hana tau maga.

25 Ko e kamataaga he ha lautolu a nonofo ke he motu ia nakai matakutaku a lautolu kia Iehova; ti fakafano atu ai e Iehova e tau leona kia lautolu, ti keli ai he tau leona e falu ia lautolu.

26 Ti tala age a lautolu ke he patuiki a Asuria kua pehe age. Ko e tau motu ne uta kehe e koe mo e tuku ai ke he tau maga a Samaria, kua nakai iloa e lautolu e mahani he Atua he motu; ko e mena ia kua fakafano mai e ia e tau leona kia lautolu kitiala, kua mamate ai a lautolu, he nakai iloa e lautolu e mahani he Atua he motu.

27 Ti poaki age ai he patuiki a Asuria kua pehe age, Kia uta e mutolu ki ai taha he tau ekepoa ne ta mai ai e mutolu he motu ia, ti nonofo ai a lautolu, ti fakaako atu ai e ia a lauotlu ke he mahani he Atua he motu.

28 Ti fina age ai taha he tau ekepoa ne uta ai e lautolu i Samaria, ti nofo a ia i Peteli, mo e fakaako atu ai e ia a lautolu ke he mahani matakutaku kia Iehova.

29 Ka kua takitaha e motu mo e eke e lautolu ha lautolu a tau atua, mo e tuku ai ke he tau fale ha ha i ai ke he tau mena tokoluga ne eke he tau tagata Samaria, ko e takitaha e motu mo e eke ai ke he ha lautolu a tau maga ne nonofo ai a lautolu.

30 Ne eke he tau tagata Papelonia a Sukopeno, ti eke he tau tagata Kuta a Nekala, ti eke he tau tagata Hamato a Asima.

31 Ti eke he tau tagata Ava a Niveasa Taretaka, ko e tau tagata Sefavaima foki ne huhunu ai e lautolu e fanau ha lautolu ke he afi kia Atameleko mo Anameleko, ko e tau atua ia a Sefavaima.

32 Ne matakutaku a lautolu kia Iehova mo e eke foki e lautolu ma lautolu e tau ekepoa ke he tau mena tokoluga mai he motu oti, ti eke poa ai e lautolu ma lautolu ke he tau fale ha ha he tau mena tokoluga.

33 Ne matakutaku a lautolu kia Iehova, ka e fekafekau foki a lautolu ke he ha lautolu a tau atua, tuga ne mahani he tau motu ne fakapaea mai ai a lautolu.

34 Ke hoko ni ke he aho nai kua eke e lautolu tuga ne mahani tuai ha lautolu. Nakai matakutaku a lautolu kia Iehova, ti nakai eke e lautolu ke lata mo e ha lautolu a tau kotofaaga mo e ha lautolu a tau fakafiliaga, mo e fakatufono, mo e poakiaga ne poaki mai ai e Iehova ke he fanau a Iakopo ne fakahigoa ai ko Isaraela.

35 Ne eke foki e Iehova e maveheaga mo lautolu mo e poaki mai ai e ia kia lautolu kua pehe mai, Aua neke matakutaku a mutolu ke he tau atua kehe, aua neke fakaveli fakafohifo a mutolu ki ai, aua neke fekafekau a mutolu ki ai, ti ua eke poa ai e mutolu kia lautolu.

36 Ka ko Iehova, ne ta hake a mutolu mai he motu ko Aikupito ke he malolo lahi, mo e lima fakaolo, to matakutaku a mutolu kia ia, to fakaveli fakafohifo a mutolu kia ia, to eke poa foki e mutolu kia ia.

37 Ko e tau kotofaaga foki, mo e tau fakafiliaga, mo e fakatufono, mo e poaki, kua tohi ma mutolu, to omaoma a mutolu ki ai ke eke ke he tau aho oti; ti aua neke matakutaku a mutolu ke he tau atua kehe.

38 Ko e maveheaga foki kua eke e au mo mutolu, aua neke nimo ia kia mutolu; ti aua neke matakutaku a mutolu ke he tau atua kehe.

39 Ka ko Iehova ni, ko e ha mutolu a Atua ke matakutaku ki ai a mutolu; ti laveaki ai e ia a mutolu mai he tau lima ha lautolu oti kua fai fi mai kia mutolu.

40 Ka e nakai fanogonogo ai a lautolu, ka e eke ni e lautolu ke tuga ne mahani tuai ha lautolu.

41 Ne matakutaku e tau motu ia kia Iehova ka e fekafekau foki a lautolu ke he ha lautolu a tau tupua kua ta. Ko e ha lautolu a fanau foki mo e fanau he ha lautolu a fanau, tuga ne eke he tau matua ha lautolu kua eke ai e lautolu kua hoko mai ke he aho nai.