Ioelu

3 KO e mena kitiala, ko e tau aho ia mo e vaha ia ka liu aki mai e au e paeaaga a Iuta mo Ierusalema,

2 To fakapotopoto ai e au e tau motu oti ni, to ta hifo e au a lautolu ke he pahua a Iehosafata, to fakahala ai e au a lautolu ha ko e motu haku, mo e haku a tufaaga ko Isaraela ne fakamavehevehe ai e lautolu ke he tau motu kehe, ko e haku a kelekele foki kua tufatufa ai e lautolu.

3 Kua eke e lautolu e vili ke moua ai haku a motu; kua ta age e lautolu e tama tane ke eke mo taui he fifine fakataka, kua ta age foki e lautolu e tama fifine ke fakafua aki e uaina ke inu ai a lautolu.

4 Turo na e, mo Saitonu, mo e tau fahi oti a Filisitia, ko e heigoa foki ha mutolu kia au? to ta mai kia e mutolu e taui kia au? kaeke foki ke ta mai e mutolu e taui kia au, to alumaki au, mo e liuaki atu ha mutolu a taui ki luga he tau ulu ha mutolu.

5 Ha kua uta e mutolu haku a tau ario mo e haku a tau auro, ko e haku a tau mena fakafiafia mo e haku a tau mena mitaki kua uta ai e mutolu ke he tau faituga ha mutolu;

6 Ko e fanau a Iuta mo e fanau a Ierusalema kua fakafua atu e mutolu ke he fanau a Iavana, kia uta fakamamao e mutolu a lautolu mo e motu ha lautolu.

7 Kitiala, to fakalagalaga e au a lautolu mai he mena kua fakafua atu e mutolu a lautolu ki ai, to liuaki atu foki e au ha mutolu a taui ki luga he tau ulu ha mutolu.

8 To fakafua atu e au e tau tama tane ha mutolu mo e tau tama fifine ha mutolu ke he pule he fanau a Iuta, to fakafua atu foki e lautolu a lautolu ke he tau tagata Sihipa, ko e motu mamao ha kau talahau mai ai e Iehova.

9 Kia fakamatala atu e mutolu e tau mena nai ke he tau motu kehe; kia tauteute a a mutolu ke tau, kia fakaohooho e mutolu e tau tagata malolo; kia fakatata mai e tau tagata tau oti, kia o hake a lautolu.

10 Kia tukituki e mutolu e tau koho ha mutolu ke eke mo tau pelu, mo e tau titipi ne taute aki e tau vine ha mutolu ke eke mo tau tao; kia pehe age a ia ne lolelole, Kua malolo au.

11 Ko mutolu ko e tau motu oti kua agaagai mai, kia o mai fakaave a mutolu, mo e fakapotopoto mai ai a mutolu; Iehova na e, kia fakahoko hifo e koe ke he mena ia hau a tau toa malolo.

12 Kia lagalagā ai e tau motu kehe, mo e o hake a lautolu ke he pahua a Iehosafata, ha ko e mena to nofo ai au ke he mena ia ke fakafili ai e tau motu oti nai he tau fahi oti.

13 Kia tuku atu e mutolu e helesaito ha kua motua tuai e tau saito; o mai a kia taholi e mutolu ha kua puke e holiaga vine, kua puapuā e tau mena ha lautolu ne hihina ki ai e huhua vine; ha kua lahi e mahani kelea ha lautolu.

14 Ko e motu o tagata tokologa ni ke he pahua ke fakahala ai, ha kua tata mai e aho a Iehova ke he pahua he fakahala ai.

15 To fakapouligia e la mo e mahina, ko e tau fetu foki nakai tuai kikila mai a lautolu.

16 To fakaleo lahi mai foki a Iehova i Siona, mo e leo mai hana fofoga i Ierusalema; to vivivivi e lagi mo e lalolagi, ka ko Iehova ko e taue a ia ma e motu hana, mo e kolo a ia ma e fanau a Isaraela.

17 Ti iloa ai e mutolu ko au ko Iehova ha mutolu a Atua kia nofo i Siona haku a mouga tapu; ti tapu ai a Ierusalema, ko e tau tagata kehe foki nakai tuai o age ai a lautolu.

18 Ka hoko foki ke he aho ia ti hihina mai he tau mouga e huhua vine, to tafe hifo ai foki e puke huhu he tau matiketike, ko e tau vailele oti foki a Iuta to tafe ai e vai; to tafe ai e vaipuna mai he fale a Iehova, ke fakamalū aki e pahua a Sitima.

19 To eke a Aikupito mo tau mena kua moumou, to eke foki a Etoma mo tutakale kua tiaki, ha ko e favale ke he fanau a Iuta, ha kua fakamaligi e lautolu ke he tau motu ha lautolu e toto he tau tagata nakai hala.

20 Ka to nofo tukulagi a Iuta, ko Ierusalema foki ke he taha hau mo e taha hau.

21 To fakamea e au ha lautolu a toto, kua nakaila fakamea ai e au; ko au ni ko Iehova kua nofo i Siona.