Malaki

Ko e Tohi a Malaki

1 KO e kavega he kupu a Iehova ne hoko mai ai ia Malaki.

2 Kua pehe mai a Iehova, Kua fakaalofa atu au kia mutolu; ka kua pehe mai a mutolu, Ko e mena fe kua fakaalofa mai ai a koe kia mautolu? Nakai kia ko e tau matakainaga a Esau mo Iakopo? Kua pihia mai a Iehova; ka e fakaalofa au kia Iakopo,

3 Ka e vihiatia e au a Esau; kua eke foki e au hana tau mouga mo tau mena kua moumou, mo e tuku age ai hana tufaaga ke he tau tanimo he tutakale.

4 Kua pehe mai a Etoma kua malipilipi a mautolu, ka to liliu ati e mautolu e tau fale kua maona; kua pehe mai a vagahau a Iehova Sapaota, To ati e lautolu, ka ko au, to ulu moumou e au, to talahaua a lautolu ko e kelekele ha lautolu ne mahani kelea, mo e motu kua ita tukulagi ki ai a Iehova.

5 To kitekite ki ai foki e tau mata ha mutolu, ti pehe age a mutolu, Kia fakaheke a kia Iehova mai he kelekele a Isaraela.

6 Kua fakalilifu e tama tane ke he hana matua tane, kua fakalilifu foki e fekafekau ke he hana a iki; kaeke ko e matua tane au ko fe kia haku a lilifu? kaeke foki ko e iki au ko fe kia e matakutaku kia au? kua pihia mai a Iehova Sapaota kia mutolu ko e tau ekepoa kua fakavihia haku a higoa; ka kua pehe mai a mutolu, Ko e mena fe kia kua fakavihia ai e mautolu hau a higoa?

7 Kua ta mai e mutolu e tau mena kai kelea ke he haku a fatapoa; ka kua pehe mai a mutolu, Ko e heigoa e mena ne kelea ai a koe ia mautolu? Kua kelea he pehe age a mutolu, Ko e laulau a Iehova, ko e mena fakateaga ni haia.

8 Ka ta mai e mutolu e mena matapouli ke eke mo poa, nakai kia kelea? Ka ta mai e mutolu e mena kulikuli mo e mena gagao nakai kia kelea? Kia ta age a ke he iki kua pule kia koe; po ke fiafia mai nakai a ia kia koe? po ke talia mai nakai e ia a koe? kua pihia mai a Iehova Sapaota.

9 Hanai, kia olelalo atu a mutolu ki mua he Atua kia fakaalofa mai a ia kia tautolu; ne tutupu mai ia mutolu e tau mena nai; po ke talia mai nakai e ia a mutolu? kua pihia mai a Iehova Sapaota.

10 Ko hai ia mutolu ke pa e tau gutuhala? Ke aua neke tafu noa e mutolu e afi ke he haku a fakapoa; nakai ni fai fiafia au kia mutolu, kua pihia mai a Iehova Sapaota; nakai talia foki e au e poa mai he tau lima ha mutolu.

11 Ha kua kamata mai he mena ne hake ai e la, ke hoko ke he mena ne hifo ai a ia, to fakaheke ki ai haku a higoa ke he tau motu kehe; to ta mai ai foki e mena manogi ke huhunu ke he haku a higoa ke he tau motu oti ni, katoa mo e poa mitaki; ha ko e mena to fakaheke ki ai haku a higoa ke he tau motu kehe, kua pihia mai a Iehova Sapaota.

12 Ka ko mutolu kua holitu ai e mutolu haku higoa, ha kua pehe age a mutolu, Kua kelea e laulau a Iehova; mo e hana tau fua, ko e hana tau mena kai, ko e mena fakateaga haia.

13 Kua pehe foki a mutolu, Kitiala, ko e mena ke matematekelea lahi ai ni! mo e vihiatia ai e mutolu kua pihia mai a Iehova Sapaota; kua ta mai foki e mutolu e mena ne fofo, mo e mena kulikuli, mo e mena gagao; kua ta mai ai e mutolu mo tau poa? Ke talia kia e au e tau mena ia mai he tau lima ha mutolu? kua pihia mai a Iehova.

14 Ka kia malaia e tagata fakavai kua fai manu tane a ia ke he hana fuifui, ka kua omonuo a ia mo e eke poa ai ke he Iki ke he mena kelea; ha ko e Patuiki ne mua ue atu au, kua pihia mai a Iehova Sapaota; ko e mena ke matakutaku ai haku higoa ke he tau motu kehe.