Luka

11 HA he taha mena a ia, kua liogi; kua oti tuai, ti tala age ai kia ia e taha he hana tau tutaki, Ko e Iki na e, kia fakaako mai e koe kia mautolu e liogi; tuga foki a Ioane ne fakaako ke he hana tau tutaki.

2 Kua tala age a ia kia lautolu, Ka liogi a mutolu, ati pehe atu ai, Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.

3 Kia foaki mai e koe ke he taha aho mo e taha aho ha mautolu a tau mena kai, ke lata ma mautolu.

4 Kia fakamagalo e koe kia mautolu ha mautolu a tau hala; ha ko e mena fakamagalo atu a mautolu kia lautolu oti ne eke fakakelea kia mautolu. Aua neke tuku atu a mautolu ke he kamatamata; ka e laveaki mai a e koe a mautolu he mena kelea.

5 Kua tala age foki a ia kia lautolu, Ko hai taha ia mutolu hana e kapitiga ka fano kia ia he tuloto po, mo e tala age kia ia, Teme na e, ati ta mai a tolu e areto, ka e taui atu; 6 Ha kua hau tuai e kapitiga haku ke he hana fenoga, ka e nakai fai mena au ke age ki ai.

7 Ti ui mai a ia mai he fale, kua pehe mai, Ua fakahoha mai a koe kia au; kua pa tuai e gutuhala, ti kua tatakoto a mautolu mo e haku a fanau; nakai maeke ia au ke matike mo e atu māu.

8 Kua tala atu e au kia mutolu, Pete he nakai matike a ia mo e age kia ia, ha ko ia hana kapitiga; ka e matike a ia, mo e age e tau mena oti ne manako ai a ia, ha ko e hana ole fakamakamaka.

9 Kua tala atu foki e au kia mutolu, Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu.

10 Ha ko ia ke ole atu, to moua e ia; ko ia ke kumi, to iloa e ia; ko ia ke tukituki, to vevete mai kia ia.

11 Ko hai e matua ia mutolu ke age kia e ia e maka ke he tama hana ka ole mai e areto? ka ole mai e ika, ke age kia e gata kia ia mo ika. 12 Ka ole mai a ia e fufua moa, ke age kia kia ia e akarava?

13 Hanai, ko mutolu ne mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e Agaga Tapu kia lautolu ka ole atu ai kia ia?

14 Ne vega e ia taha temoni, kua kuhukuhu foki a ia; kua fano ki fafo e temoni, ti vagahau ai e kuhukuhu; kua ofomate e moto tagata.

15 Ka ko falu ia lautolu kua pehe, Ko Pelesepulo ko e iki he tau temoni kua vega ai e ia e tau temoni.

16 Ko e falu foki kua kamatamata, mo e kumi mai kia ia e taha fakamailoga mai he lagi.

17 Ka kua fioia e ia ha lautolu a tau manatu, kua pehe age a ia kia lautolu, Ko e tau kautu oti kua feveheaki, to takitaha mo e fakaoti ni; po ke magafaoa kua pihia, to malaia a ia.

18 Kaeke foki kua feveheaki a Satani, to tumau kia fefe hana kautu? ha kua tala mai a mutolu, ko Pelesepulo kua vega ai e au e tau temoni.

19 Kaeke ko Pelesepulo kua vega ai e au e tau temoni; ko hai kua vega ai he tau fanau ha mutolu e tau temoni? Ko e mena ia, ke eke ai a lautolu mo fakafili kia mutolu.

20 Kaeke foki ko e lima he Atua kua vega ai e au e tau temoni, ti kua hoko mai tuai kia mutolu e kautu he Atua.

21 Ka leveki hana fale he tagata toa mo e hana kanavaakau, ti toka mau ai hana tau mena.

22 Kaeke ke oho atu taha ne mua hana malolo, mo e kautu ki ai, ti fofo ai hana kanavaakau ne tua a ia ki ai, ti tufa foki hana tau mena ne fofo.

23 Ko e tagata nakai kau fakalataha mo au, ko e tagata ia kua kau kehe kia au; ko e tagata kua nakai tanaki fakalataha mo au kua fakatafola e ia.

24 Ka fano ki fafo he tagata e agaga kelea, ti fai fano a ia ke he tau mena momo, kua kumi ha okiokihaga; kua nakai moua, ti pehe ai a ia, To liu foki au ke he haku a fale ne hau ai au.

25 Kua hoko ki ai, ti moua ai, kua oti he tafitafi, mo e taute.

26 Ti fano ai a ia kua ta mai e ia e falu a agaga ne tokofitu, kua mua ha lautolu a mahani kelea he hana; kua huhū ai a lautolu mo e nonofo ai; ati mua ai e kelea he fakahikuaga he tagata ia ke he kamataaga hana.

27 Ha ne tala age e ia e tau mena ia, ti ui fakalahi mai ai e taha fifine mai he moto tagata, kua pehe kia ia, Uhoaki e manava ne fanau mai ai a koe, mo e tau huhu foki ne kai e koe.

28 Ka e tala age a ia, Ko e moli; ka e mua e monuina he tau tagata ka fanogonogo ke he kupu he Atua mo e omaoma ki ai.

29 Kua lolofi mai e moto tagata, ti kamata ai a ia ke tala age, Ko e hau kelea a enei, kua kumi mai e fakamailoga, ka e nakai foaki atu ki ai ha fakamailoga ka ko e fakamailoga ni hokoia a Iona e perofeta.

30 Ha ko e mena tuga a Iona ne eke mo fakamailoga kia Nineva, ke pihia foki e Tama he tagata ke he hau nai. 31 Ko e patuiki fifine he fahi ki toga to tu a ia ke he fakafiliaga fakalataha mo e tau tagata he hau nai, ti fakahala a lautolu; ha ko e mena hau a ia mai he fakaotiaga he lalolagi ke fanogonogo ke he pulotu a Solomona; kitiala, ha hinai taha kua mua kia Solomona.

32 To tutu e tau tagata Nineva ke he fakafiliaga fakalataha mo e hau nai, ti fakahala ai; ha ko e mena tokihala a lautolu he fakamatalaga a Iona; kitiala, ha hinai taha kua mua kia Iona.

33 Nakai fai tagata ke tugi e lamepa ti toka ai ke he mena galo, po ko lalo he kumete, ka ko luga ni he tokaaga lamepa, kia kitia atu e maama e lautolu ka huhu mai.

34 Ko e hulu he tino ko e tau mata haia; hanai, ka mitaki hau a tau mata, ti maama oti ai hau a tino; ka kelea, ti pouli ai hau a tino.

35 Hanai, a koe, neke pouli kikio e maama ha ia koe.

36 Kaeke foki kua maama hau a tino oti, nakai fai pouli, ati maama oti ai, tuga ne fakamaama mai kia koe e lamepa he hana kikila mai.

37 Kua vagahau a ia, ka e tala mai e taha farasaio kia ia, ke kai mena a laua mo ia, ati hu ai a ia ki fale, mo e takoto ke taumafa.

38 Kua kitia he farasaio, ti ofo ni he nakai holoholo fakamua a ia, to taumafa ai.

39 Kua tala age e Iki kia ia, Ko mutolu e tau farasaio, kua fakamea e mutolu e tua he kapiniu mo e kumete; ka ko loto ia mutolu kua puke namo ke he fofo mena mo e mahani kelea.

40 Ko e tau tagata goagoa na e! ko ia ne eke e tua, ka e nakai kia eke foki e ia e liu.

41 Ka kia uta e mutolu e tau mena ha i loto mo mena fakaalofa; kitiala, ti mea ai e tau mena oti kia mutolu,

42 Oi fakaalofa kia mutolu e tau farasaio! ha kua ta atu e mutolu e mena ne hogofulu aki e mili, mo e pekano, mo e tau lakau oti ke mateafu; ka e tiaki e mutolu e fakafiliaga mo e fakaalofa ke he Atua; kua lata ni kane mai eke e mutolu e tau mena ia, ti ua tiaki foki e tau mena na.

43 Oi fakaalofa kia mutolu e tau farasaio! ha ko e mena fiafia a mutolu ke he tau nofoaga uho he tau sunako, kia fakaalofa foki a mutolu ke he tau male.

44 Oi fakaalofa kia mutolu e tau tohikupu mo e tau farasaio, ko e tau tagata pikopiko! nukua lata a mutolu mo e tau tukuaga galo; kua evaeva foki e tau tagata ki luga ha lautolu, ka e nakai kitia.

45 Ati tala age e taha he tau ako fakatufono, kua pehe mai kia ia, Ko e akoako na e, kua fakakelea mai e koe a mautolu he hāu a tau kupu na.

46 Ti kua pehe atu a ia, Oi fakaalofa foki kia mutolu e tau ako fakatufono! ha kua tuku atu e mutolu e tau kavega mamafa ke he tau tagata, ka ko mutolu nakai fakai ke piki atu ke he tau kavega ia mo e taha matalima ha mutolu.

47 Oi fakaalofa kia mutolu! ha kua ati e mutolu e tau tukuaga he tau perofeta; ka ko e tau matua ha mutolu ne kelipopo e lautolu a lautolu.

48 Kua fakakite ni e mutolu e tau mahani he tau matua ha mutolu mo e fiafia ki ai; ha ko e mena kelipopo ne lautolu a lautolu, ka e ati e mutolu ha lautolu a tau tukuaga.

49 Ko e mena foki haia ne pehe mai ai e pulotu he Atua, To fakafano atu e au kia lautolu e tau perofeta mo e tau aposetolo; to kelipopo foki e lautolu e falu, mo e favale atu ai;

50 Kia kumi ai ke he hau nai e toto he tau perofeta oti, ne fakamaligi tali mai he fakave he lalolagi;

51 Ke kamata mai he toto a Apelu, ati hoko atu ke he toto a Sakaria, ne mate he vaha he fatapoa mo e faituga; ko e moli, ke tala atu e au kia mutolu, to kumi ni ke he hau nai.

52 Oi fakaalofa kia mutolu e tau ako fakatufono! ha kua uta e mutolu e kei he maama; nakai huhu atu ai a mutolu, kua hataki foki e mutolu a lautolu ha ne huhu atu.

53 Kua tala age e ia e tau kupu ia kia lautolu, ati vale lahi ai e tau tohikupu mo e tau farasaio kia ia, kua kamata ai a lautolu ke hūhu kamatamata kia ia ke he tau mena loga;

54 Kua takahao kia ia, kua kumi ke moua taha kupu mai he fofoga hana, kia hokotaki ai e lautolu a ia.