Mika

6 KIA fanogonogo mai ā ke he mena kua vagahau mai ai e Iehova, Kia tu ā koe ki luga, kia taufetoko atu a ki mua he tau mouga, kia logona foki he tau matiketike e leo hau.

2 Ko e tau mouga na e, kia fanogonogo mai ā mutolu ke he taufetoko a Iehova, ko mutolu foki ko e tau fakaveaga tumau he lalolagi; ha ko e mena ha ha ia Iehova e taufetoko mo e hana motu, to taufetoko ai a ia mo Isaraela.

3 Haku motu na e, ko e heigoa kia e mena kua eke e au kia koe? ko e heigoa foki e mena kua fakamamahi ai e au a koe? kia talahau mai a kia au.

4 Ha ko e mena ta hake e au a koe mai he motu ko Aikupito, mo e laveaki e au a koe mai he mena ne nofo fakatupa ai a koe, ne fakafano atu foki e au ki mua hau a Mose, mo Arona, mo Miriama.

5 Haku motu na e, kia manatu a e mena ne pulega ai e Palako ko e patuiki a Moapi, mo e mena ne tali age ai kia ia e Palaamo ko e tama a Peoro, kia manatu a e tau mena ne eke ke kamata i Sitima ke hoko atu ki Kilikala, kia iloa ai e koe e mahani tututonu a Iehova.

6 Ko e heigoa kia e mena ke uta ai e au ke fina atu au ki mua a Iehova, ko e heigoa e mena ke ta atu e au ke hufeilo aki au ke he Atua tokoluga? To fina atu kia au ki mua hana mo e tau poa huhunu, mo e tau punua povi tau taha?

7 To fiafia kia a Iehova ke he tau mamoe tane afe mo afe, mo e tau hogofulu e afe he tau mena po ke tau vailele kua tafe ai e puke lolo? To foaki atu kia e au haku a tama uluaki ke taui aki haku a tau holifono, ko e fanau he haku a tino ke taui aki e tau hala he haku agaaga?

8 Teme na e, kua fakakite atu e ia kia koe e mena mitaki; ko e heigoa foki e mena kua finagalo ai a Iehova kia koe, nakai kia ko e tau mena nai, ke eke ai e mahani tututonu, ke fiafia ke he fakaalofa, mo e feoaki mo e hau a Atua mo e loto holoilalo?

9 Kua ui mai e leo a Iehova ke he maga, (ko e tagata kua iloilo to iloa e ia haku a higoa;) Kia fanogonogo mai ā mutolu ke he akau ne fahi aki, mo ia ne kotofa ai.

10 Kua toka agaia kia ke he fale he tagata mahani kelea e tau koloa kua tatanaki ne moua ai he mahani kelea, mo e efa fakavai kua vihiatia?

11 To mahani hako kia au ka ha i ai e fua tautau nakai tonu, mo e kato ne toka ai e tau maka fakavai?

12 Kua puke e tau tagata maukoloa ke he favale, kua vagahau foki mo e pikopiko a lautolu kua nonofo ai, ko e tau alelo foki ha lautolu ha ha he tau gutu ha lautolu kua fakavai ia.

13 Ko e mena ia foki, kua ta e au a koe ke gagao ai a koe, kua eke e au a koe mo tau mena kua moumou ha ko e tau hala hāu.

14 To kai a koe ka e nakai makona ai, ko e hau a fia kai to ha ia koe haia; to fetuku e koe hau a tau mena, ka e nakai fakahao ai e koe, ko e tau mena foki kua fakahao ai to tuku atu e au ke he pelu.

15 To gana saito e koe ka e nakai helehele mai ai; to taholi e koe e tau fua olive ka e nakai takai ai a koe ke he puke lolo; katoa mo e huhua vine, ka e nakai inu e koe e uaina.

16 Ha kua omaoma ai ke he tau fakatufono a Omeri, mo e tau mena oti ne eke he magafaoa a Ahapo, kua o foki a mutolu ke lata mo e pule ha lautolu, kia eke e au a koe mo tau mena kua moumou, mo e eke mo mena ke fakakatakatakē ai a lautolu kua nonofo ai; to uta foki e mutolu e mena ne ma ai haku a motu.