Nahuma

3 OI te fakaalofa ke he maga keli tagata! kua puke ai ke he pikopiko mo e favale; nakai uta kehe ai e tau mena ne hēhē.

2 Ko e kalivi he tau hunu ne hunu aki e tau solofanua, ko e tomumu he tau veli, ko e tau solofanua ne feohoaki, mo e tau kariota ne hopohopo;

3 Ko e tau tagata heke solofanua kua feoho atu, ka e kikila mai foki he tau pelu, mo e kikila mai he tau tao; ko e tokologa foki kua keli, mo e toloaga lahi he tau tino he tau tagata mamate; nakai maeke ke totou e tau tagata mamate he tokologa, ne tupetupe ai a lautolu ke he tau tagata mamate ha lautolu.

4 Ha ko e tau feuaki loga he fifine fakataka ne tino mitaki, ko e patu fifine taulaatua, ne fakafua atu e ia e tau motu ke he hana tau feuaki katoa mo e tau magafaoa ke he hana tau lagatau taulaatua.

5 Kua pehe mai a Iehova Sapaota, Kitiala, kua fai fi au kia koe, to aki e au hau a felevehi mo e liti hake ke he hau a tau mata, to fakakite atu e au hau a nakai fai felevehi ke he tau motu kehe, to fakakite foki hau a ma ke he tau kautu.

6 To liti e au e tau mena kelea ki luga ia koe, to fakavihia foki e au a koe, mo e eke e au a koe mo mena ke kitekite ki ai.

7 Ati oti ka e fehola kehe ia koe a lautolu oti kua kitekite atu kia koe, mo e pehe age a lautolu, Kua eke tuai a Nineva mo tau mena kua moumou! ko hai ke tagi ha ko ia? Po ke kumi e au ki fe e tau tagata ke fakamafana a koe?

8 Kua mua kia e mitaki hau ke he mitaki a No-amoni, ne toka ai ke he vaha he tau vailele, ne takai foki a ia he tau vai, ko e hana malolo ko e vailele lahi haia, ha i ai hana kaupa ke he vailele lahi.

9 Ko Aitiope ko e hana malolo haia, katoa moAikupito, nakai maeke foki ke totou hana tau tagata he tokologa; ko Futu mo Lipua ko e hau a tau lagomatai haia.

10 Ka e fakapaea ni a ia, ne fano a ia fakalataha mo lautolu ne fofo he tau; ko e hana tau tama ikiiki foki ne palu ke he tau maka he tau matahala he tau puhala oti; ne eke foki e lautolu e vili ke he hana tau iki lilifu, ne lili foki e lautolu hana tau iki lalahi oti ke he tau toua lapatoa.

11 Ko koe foki to inu a koe ke konahia, to galo ai a koe; to kumi foki e koe e taue ha ko lautolu kua fai fi kia koe.

12 Ko e hau a tau taue oti, to eke ia ke tuga e tau mati, ha i ai e tau fua uluaki ne momoho mua; kaeke ke lulululu, to mokulu ai ke he gutu hana kua kai ai.

13 Kitiala, ko e hau a motu i loto ia koe ko e tau fifine ni; kua tokanoa e tau gutuhala he hau a motu kia lautolu kua fai fi kia koe, kua huhunu ai ke he afi hau a tau akau fakalava.

14 Kia utu a e tau vai ha ko e pa takai ai ne fai a koe, kia tauteute a ke mau ai hau a tau taue; fano a ke he pelapela, kia taholi a e kelekele, kia taute a ke mau e mena ke tunu ai e tau maka kelekele.

15 To huhunu ai a koe ke he afi ke he mena ia, to keli a koe ke he pelu, to kai ai e ia a koe tuga ne he aleki, kia fakatokologa ai a koe tuga ne he aleki, kia fakatokologa ai a koe tuga ne he akerise.

16 Kua fakatokologa e koe hau a tau tagata fakafua koloa ke homo atu a lautolu ke he tau fetu he lagi; kua fakalaulahi ai e tau he aleki, ti lele kehe ai.

17 Ko e hau a tau iki ne mua kua tuga e tau he akerise ia, mo e hau a tau iki kua pule ke he tau kau kua tuga e tau he akerise ne mua he loga, kua nonofo ke he tau kaupa ke he aho makalili, ka hake e la ti fehola ai a lautolu, ti nakai iloa foki e mena ha ha i ai a lautolu.

18 Ko e patuiki i Asuria na e, kua momohe hau a tau leveki mamoe, kua tatakoto hau a tau iki ne mua; kua fakamavehevehe hau a motu ke he tau mouga, ti nakai ha i ai taha ke fakapotopoto ai a lautolu.

19 Nakai ni maūlu hāu a malaia, kua kelea lahi hau a kafokia; ko lautolu oti ka logona e lautolu e tala kia koe, to patipati ha lautolu a tau lima kia koe; ha ko hai taha kua nakai hoko mau ki luga hana hau a tau mahani kelea.