Tagi Aue a Ieremia

5 IEHOVA na e, kia manatu e koe ke he mena kua hoko mai kia mautolu; kia kitekite mai a, mo e fofoga mai a koe kia mautolu kua eke fakakelea.

2 Kua uta ha mautolu a tufaaga ma e tau tagata kehe, mo e ha mautolu a tau fale ma e tau motu kehe.

3 Kua eke a mautolu mo tau tama kua nakai fai matua, kua nakai fai matua tane, kua tuga ne tau takape ha mautolu a tau matua fifine.

4 Kua inu e mautolu e maga vai kua fakafua ai ke he tau tupe; ko e ha mautolu a tau gaafi kua ta mai he totogi.

5 Ha ha i luga he tau ua ha mautolu a lautolu ne tutuli a mautolu; kua nakai fahia a mautolu, kua nakai fai okiokihaga a mautolu.

6 Kua tuku atu e mautolu e lima ki Aikupito mo Asuria, kia makona ai a mautolu he tau mena kai.

7 Ne hala e tau matua ha mautolu, ti nakai ha i ai a lautolu; ka ko mautolu, kua fua e mautolu ha lautolu a tau mahani kelea.

8 Kua pule e tau fekafekau kia mautolu; kua nakai ha i ai taha ke laveaki a mautolu mai he tau lima ha lautolu.

9 Ko e tuku lele atu ha mautolu a tau momoui ne moua ai e mautolu ha mautolu a tau mena kai, ha ko e pelu ha ha he tutakale.

10 Kua vevela ha mautolu a kili tuga ne gutuumu, ha ko e hoge ke vevela ai.

11 Ne toho e lautolu e tau fifine i Siona, ko e tau tamāfine ikiiki foki ke he tau maga i Iuta.

12 Ne fakatautau ai e tau iki ke he tau lima ha lautolu; nakai fakalilifu ai ke he tau patu.

13 Ne fua he tau fuata e tau makaholo, ne tupetupe foki e tau tama i lalo he tau kavega gaafi,

14 Kua tiaki he tau patu e gutuhala, ko e tau fuata foki kua tiaki e lautolu ha lautolu a tau lologo.

15 Kua hiku e fiafia he tau loto ha mautolu; kua liliu ha mautolu a kolikoli ke he tagi.

16 Kua to e foufou he tau ulu ha mautolu, oi te fakaalofa kia mautolu, ha kua hala a mautolu.

17 Ko e mena ia kua lolelole ai ha mautolu a tau loto; ko e tau mena ia kua pouli ai ha mautolu a tau mata.

18 Ha ko e mouga ko Siona kua toka noa, kua o fano ai e tau alope.

19 Ko koe, Iehova na e, to tumau tukulagi a koe; ko e hau a nofoaiki ke hahau mo hahau ia.

20 Ko e ha ne nimo tukulagi a mautolu ia koe, mo e tiaki ai e koe a mautolu ke he tau aho loga?

21 Iehova na e, kia fakaliliu e koe a mautolu kia koe, ti liliu ai ni a mautolu; kia fakafou e koe ha mautolu a tau aho ke tuga he vaha ne aho mua.

22 Ha kua tiaki ni e koe a mautolu; kua ita lahi ni a koe kia mautolu.