Sefanaia

2 KIA fakapotopoto e mutolu a mutolu, kia fakapotopoto ai a mutolu, ko e tau motu kua nakai fai ma;

2 Ka kua nakaila fanau mai he fakatufono ka kua nakaila mole atu e aho tuga ne otaota he tau saito; ka e nakaila hoko mai kia mutolu e ita lahi; ka e nakaila hoko mai kia mutolu e aho he ita a Iehova.

3 Kia kumi e mutolu a Iehova ko mutolu oti ne mahani molu ke he motu, ko mutolu kua eke hana tau fakafiliaga; kia kumi e mutolu e mahani tututonu, kia kumi e mutolu e mahani molu, po ke galo nakai a mutolu ke he aho he ita a Iehova.

4 Ha ko e mena to tiaki a Kasa, to eke foki a Asekelona mo tau mena kua moumou; to vega kehe e lautolu a Asetota ke he tupou la, to taaki foki a Ekerona.

5 Oi te fakaalofa kia lautolu kua nonofo ke he hala kau tahi, ko e motu he tau tagata Kereti! kua hagao atu kia mutolu e kupu a Iehova; Kanana na e, ko e motu he tau tagata Filisitia, to fakaoti e au a koe, kia nakai nofo ai taha ia koe.

6 To eke foki e hala kau tahi mo lotopa manu, mo tau vaikeli foki ma e tau leveki manu, mo e tau pa mamoe.

7 To eke foki e hala kau tahi ma lautolu ne toe he magafaoa a Iuta, to fagai ai e lautolu ha lautolu a tau fuifui mamoe; ko e tau afiafi to tatakoto ai a lautolu ke he tau fale a Asekelona; ha ko e mena to ahi e Iehova ha lautolu a Atua a lautolu mo e liuaki mai ha lautolu a fakapaeaaga.

8 Kua logona e au he ekefakakelea mai a Moapi, mo e tukimakaefu mai he fanau a Amoni, ne ekefakakelea mai ai e lautolu ke he haku motu, mo e fakatokoluga mai ai a lautolu ke he tau katofia ha lautolu.

9 Ko e mena ia, kua pehe mai a Iehova Sapaota ko e Atua a Isaraela, Kua moui au, to eke ni a Moapi ke tuga a Sotoma, ko e fanau a Amoni foki ke tuga a Komora, ko e mena ke tutupu ai e tau akau magiiho, mo e toka ai e tau luo masima, kua eke foki mo tau mena kua moumou tukulagi; ko lautolu ne toe he haku motu to fofo e lautolu ha lautolu a tau mena, ko lautolu ne toe he haku a tau tagata to eke e lautolu a lautolu ma lautolu ni.

10 To hohoko e tau mena ia kia lautolu ha ko e ha lautolu a mahani fakatokoluga, ha kua ekefakakelea e lautolu mo e fakatokoluga atu a lautolu ke he motu a Iehova Sapaota.

11 To matakutakuina a Iehova kia lautolu, ha ko e mena to fakaoti ai e ia e tau atua oti he lalolagi; to fakaveveli fakafohifo ai e tau tagata kia ia takitaha ke he hana mena kua nofo ai, ko e tau motu he hala kau tahi oti he tau motu kehe.

12 Ko mutolu foki ko e tau tagata Aitiope to kelipopo ai a mutolu ke he haku a pelu.

13 To fakaolo atu foki e ia hana lima ke he fahi tokelau, mo e fakaoti ai e ia a Asuria; to eke foki e ia a Nineva mo tau mena kua moumou, ko e motu nakai fai vai tuga ne tutakale.

14 To tatakoto ai foki e tau fuifui he tau manu huifa oti he tau motu kehe, ko e kati mo e kefota to momohe ai a laua ki luga hana tau pou; to tagi e leo he tau manu ke he tau fakamaama, to eke e tau gutuhala mo tau mena kua moumou, ha kua fakatoka noa ai e ia e tau mena ne eke ai ke he tau arasi.

15 Ko e maga ne hula hana ne nofo fakahanoa, ne pehe hifo a ia ke he hana loto, Ko au ni, nakai ha i ai taha, ka ko au hoko au; oi te! kua pihia he eke a ia mo tau mena kua moumou; ko e mena ke tatakoto ai e tau manu he vao; ko lautolu ne o age to takitaha a lautolu mo e fakakatakatakē mo e alo atu ai ha lautolu a tau lima.