Tagi Aue a Ieremia

Ko e Tagi Aue a Ieremia

1 OI te! kua nofo tokotaha e maga ne puke ai e tau tagata; kua eke a ia mo takape ne lilifu ke he tau motu; ko e iki fifine he tau motu kua eke a ia mo tagata ke ta age e poa.

2 Kua tagi lahi a ia ke he po, ha i ai foki ke he hana tau kauvehe hana tau hihina mata; nakai ha i ai taha ia lautolu oti ne manako kia ia ke fakamafana a ia; kua fakavai he tau kapitiga oti hana a ia, kua eke a lautolu mo tau tagata kua fai fi kia ia.

3 Kua fakapaea a Iuta ha ko e matematekelea, mo e gahua lahi; kua nofo a ia ke he tau motu kehe, ti nakai moua e ia ha okiokihaga; ko lautolu oti ne tutuli a ia kua moua e lautolu a ia ke he mena apiapi.

4 Kua tagi e tau puhala a Siona, ha kua nakai tuai o mai e tau tagata ke he tau galue; kua eke mo tau mena kua tiaki hana tau gutuhala oti; kua tauoi hana tau ekepoa, kua matematekelea hana tau tamafine ikiiki, kua mamahi foki a ia.

5 Kua mua tuai a lautolu ne favale atu kia ia, kua monuina a lautolu ne fai fi kia ia; ha kua fakamamahi e Iehova a ia ha ko e tau holifono loga hana; kua o atu e tau tama hana ke he paeaaga ki mua ha lautolu ne favale.

6 Kua mole atu e fulufuluola oti he tama fifine a Siona; ko e hana tau iki kua tuga ne tau aila kua nakai moua ha vao ke kai ai e lautolu, kua o a lautolu ti nakai fai malolo a lautolu ki mua ha lautolu ne tutuli a lautolu.

7 Ko e vaha ne matematekelea ai a Ierusalema mo e ekefakakelea ai a ia kua manatu ai e ia ke he tau mena hana ne fiafia ai ne ha ha ia ia tali mai he vaha ne aho mua; he veveli ai hana tau tagata he tau lima ha lautolu ne fai fi kia lautolu, ti nakai ha ha ia ia taha ke lagomatai; ne kitia e lautolu ne fai fi kia ia ti feki ai a lautolu ha kua moumou ai a ia.

8 Kua hala lahi a Ierusalema; ko e mena ia kua fakanofo kehe ai a ia; kua talahaua fakateaga a ia ia lautolu oti ne fakaheke atu kia ia, ha kua kitia e lautolu hana a nakai fai felevehi; ko ia foki, kua oi a ia, mo e liu ki tua.

9 Ne ha i ai ke he kala tapulu hana e kelea; nakai manatu ai e ia ke he hana fakahikuaga, ko e mena ia kua fakatokolalo fakalahi ai a ia; ti nakai ha i ai taha ke fakamafana a ia. Iehova na e, kia fofoga mai ā koe ke he haku a matematekelea, ha kua fakatokoluga a ia kua fai fi mai.

10 Kua fakaolo mai e ia ne fai fi mai hana lima ke he hana tau mena fakafiafia oti; ha kua kitia e ia e tau motu kehe kua huhu atu ke he hana faituga ko lautolu ne poaki ki ai, aua neke o age a lautolu ke he hau a tau fakapotopotoaga.

11 Kua tauoi hana tau tagata oti, ti kumi e lautolu e tau mena kai; kua ta age e lautolu ha lautolu a tau mena fakafiafia oti ke fakafua ai e tau mena kai ke liu aki mai ai e moui; Iehova na e, fofoga mai a mo e kitekite mai ā koe, ha kua fakateaga au.

12 Ko e mena noa kia aena kia mutolu ko mutolu oti kua o age he puhala? Kia kitekite mai ā mutolu mo e kitia e mutolu po ke fai mamahi nakai ke tatai mo e haku a mamahi kua hoko mai kia au, ne fakamamahi ai e Iehova au ke he aho he hana ita lahi.

13 Kua fakafano mai e ia e afi mai luga ke he haku a tau huimotua, ti kautu ai; kua fofola ai e ia e kupega ma e haku tau hui, kua fakaliu e ia au ki tua; kua fakanofo tokotaha e ia au, kua lolelole au ke he aho katoa.

14 Kua lili e lakau hahamo he haku a tau holifono ke he hana lima; kua fifili, kua hoko ni ke he haku ua; kua fakaoti e ia haku a malolo; kua tuku he Iki au ki lalo he tau lima ha lautolu kua nakai maeke au ke matike.

15 Kua eke he Iki haku a tau tagata malolo oti i loto ia au mo mena nakai aoga; kua fakapotopoto e ia e fakapotopotoaga ke totoko mai kia au ke lipilipi ai haku a tau fuata; kua taholi he Iki e holiaga vine ma e tamāfine tote, ko e tamafifine a Iuta.

16 Ko e tau mena ia kua tagi ai au; ko e haku tau mata, kua tafe hifo e vai he tau mata haku; ha kua vaha mamao mo au a ia ke fakamafana mai kia au ke liu aki mai ai haku a moui; kua nonofo haku a fanau, ko lautolu hoko lautolu, ha kua kautu a ia ne fai fi mai.

17 Kua fakaolo atu e Siona hana tau lima, ka e nakai ha i ai taha ke fakamafana a ia; kua poaki e Iehova kia lautolu ne agaagai kia Iakopo ke eke mo tau tagata kua fai fi kia ia; kua eke a Ierusalema kia lautolu ke tuga e fifine kua nofo kehe.

18 Kua tututonu a Iehova; ha kua fakafualoto au ke he hana tau poaki; kia fanogonogo mai ā mutolu ko e tau motu oti, mo e kitekite mai ā mutolu ke he haku a mamahi; kua o ke he paeaaga haku a tau tamāfine ikiiki mo e haku a tau fuata.

19 Ne ui atu e au kia lautolu ne manako mai kia au, ka e fakavai e lautolu au; ko e haku a tau ekepoa mo e haku a tau patu kua mamate a lautolu ke he maga, he kumi e lautolu e tau mena kai ma lautolu, ke liuaki mai ai ha lautolu a moui.

20 Iehova na e, kia kitekite mai a, ha kua matematekelea au; kua ofoofo noa haku a manava; kua mamahi lahi haku loto i loto ia au; ha kua fakafualoto lahi au; ko fafo kua fakaoti ai he pelu, ha he fale kua tuga e mate.

21 Kua logona e lautolu kua oi au, nakai ha i ai taha ke fakamafana mai kia au; kua logona e lautolu oti kua fai fi kia au haku a malaia; kua fiafia a lautolu he eke ai e koe; to fakahoko mai e koe e aho ne talahau mai ai e koe, ti eke a lautolu ke tuga au nai.

22 Kia hohoko atu ha lautolu a tau mahani kelea oti ki mua hau, mo e eke e koe kia lautolu tuga he eke e koe kia au ha ko e haku a tau holifono oti; ha kua loga haku a tau oi, kua lolelole foki haku loto.