Nahuma

2 KUA hake ni ki mua hau a ia ne fakamavehevehe; kia leoleo a e taue, kia kitekite ke he puhala, kia pipi a e tokupu, kia fakalahi a hau a malolo.

2 Ha ko e mena to vega kehe ai e motu e lautolu ne vega kehe a lautolu, mo e moumou foki e lautolu ha lautolu a tau la vine, ka to liuaki mai e Iehova e lilifu a Iakopo, ke tuga e lilifu a Isaraela.

3 Ko e tau akau punuti he hana tau toa kua vali kula ia, ko e tau tagata malolo foki kua tapulu ai a lautolu ke he tau tapulu kula; kua kikila ai poke afi e tau lapatoa he tau kariota, ke he aho ne tauteute ai a ia; kua fakavivivivi ai foki e tau tao ha lautolu.

4 Ne feoho atu e tau kariota ke he tau puhala, ne tafepoi tafeliuaki a lautolu ke he tau male; kua tuga ne tau hulu a lautolu ka kitekite ki ai, kua mafiti lahi po ke uhila a lautolu.

5 Ne manatu e ia hana tau iki ne mua, kua tupetupe a lautolu he o a lautolu, ne o age fakaave a lautolu ke he hana kaupa, kua taute foki e mena ke pa aki e tau maka.

6 Ne vevete ai e tau pa ne puipui aki e vailele, ne ulu ki lalo foki e fale he patuiki.

7 Ne fakatumau a ia, ka e fakanofonoa a ia, ne takitaki hake a ia, ne gagagaga foki hana tau fekafekau fifine tuga ne leo he tau lupe, ne tukituki ai e lautolu e tau fatafata ha lautolu.

8 Ko Nineva foki ne tuga e vai namo tali mai i tuai, ka kua fehola ni a lautolu. Tutu, tutu a ne pihia a lautolu; ka e nakai haga ki tua e taha.

9 Kia eke e mutolu e ario ne fofo he tau, kia eke e mutolu e auro ne fofo he tau; nakai oti e koloa kua tatanaki, mo e lilifu he tau mena fulufuluola oti.

10 Kua fakaotioti a lautolu, kua fakamahakava, kua eke mo tau mena kua moumou; kua lolelole e loto, kua fepakaki e tau tulihui, kua mamahi lahi e tau tua oti, ko e tau mata oti foki ha lautolu kua maaki tea.

11 Ko fe kia e ofaga leona, mo e mena ne kai ai e tau punua leona, ko e mena ne o fano ai e leona mo e leona fifine, katoa mo e punua leona ti nakai ha i ai taha ke fakamatakutaku atu kia lautolu.

12 Ne hēhē he leona ke makona ai hana tau punua, ne fofota manu foki a ia mo e hana tau leona fifine, kua fakapuke ai e ia hana tau ana ke he tau mena ne moua, ko e hana tau ofaga foki kua fakapuke ai e ia ke he tau mena ne hēhē.

13 Kua pehe mai a Iehova Sapaota, Kitiala, Kua totoko atu au kia koe, to huhunu foki e au hana tau kariota ke mole atu ai ke he ahua, to fakaoti ai hau a tau punua leona ke he pelu; to uta kehe foki e au he motu hau a tau mena ne hēhē; to nakai logona foki e tau leo he hau a tau fekau.