2 Nofoaga he Tau Patuiki

35 NE eke foki e Iosia e paseka kia Iehova i Ierusalema; mo e keli e lautolu e paseka ke he aho hogofulu ma fa he mahina fakamua.

2 Ti kotofa e ia e tu ekepoa ke he tau kotofaaga ha lautolu, mo e fakamalolo ai e ia a lautolu ke he gahua he fale he Atua;

3 Ti pehe age a ia ke he tau tagata Levi, ko lautolu ne fakatapu ma Iehova, ne fakaako atu ai kia Isaraela oti, Kia tuku a e mutolu e puha tapu ke he fale ne ta e Solomona ko e tama a Tavita ko e patuiki a Isaraela; nakai eke ia mo kavega ke he tau ua ha mutolu; hanai, kia fekafekau a mutolu kia Iehova ha mutolu a Atua mo e hana motu ko Isaraela,

4 Kia tauteute foki a mutolu ke he tau magafaoa he tau matua ha mutolu, ke lata mo e tau vahega ha mutolu, ke lata mo e tohi he patuiki a Isaraela ko Tavita, ke lata foki mo e tohi he tama hana ko Solomona.

5 Mo e tutu a a mutolu ke he faituga ke he tau veveheaga he tau magafaoa he tau matua he tau matakainaga ha mutolu, ko e tau tagata he motu, mo e tau veveheaga he tau magafaoa he tau tagata Levi.

6 Kia keli foki e mutolu e paseka, mo e fakatapu e mutolu a mutolu, mo e taute e mutolu e tau matakainaga ha mutolu, kia eke ai e lautolu ke lata mo e kupu a Iehova kia Mose.

7 Ti ta age e Iosia ke he motu mai he fuifui ko e tau punua mamoe mo e tau punua koti ke eke mo tau poa, ko e tau manu oti ia ke eke ai e paseka ma lautolu oti ne nonofo ai, ko e katoatoa he totou ko e tolugofulu e afe e tau manu ia, mo e tolu e afe povi; ko e tau mena ia ne ta mai ai he tau mena he patuiki.

8 Ko e hana tau iki foki ne ta age e lautolu mo e fakamakai ke he motu, mo e tau ekepoa, mo e tau tagata Levi e tau manu ke eke aki e poa. Ko Hilikia, mo Sakaria, mo Ikielu, ko e tau pule ke he fale he Atua, ne ta age e lautolu ke he tau ekepoa mo tau poa ke eke aki e paseka, ua e afe mo e ono e teau manu, mo e tolu e teau povi.

9 Ko Konania foki, mo Semaia, mo Natanielu hana matakainaga, mo Hasapea, mo Ieielu, mo Iosapata, ko e tau iki he tau tagata Levi haia, ne ta age e lautolu ke he tau tagata Levi mo tau poa ke eke aki e paseka lima e afe manu, mo e lima e teau povi.

10 Ti taute ai e gahua, mo e tutu ai e tau ekepoa ke he tau mena ha lautolu ke tutu ai, mo e tau tagata Levi ke he tau vahega ha lautolu, ke lata mo e poaki he patuiki.

11 Ti keli e lautolu e paseka, mo e pipi ai he tau ekepoa e toto mai he tau lima ha lautolu, ka e fofole he tau tagata Levi e tau kili.

12 Ne uta kehe e lautolu e tau poa huhunu, kia ta age ai e lautolu ke lata mo e tau veveheaga he tau magafaoa he tau tagata he motu, ke eke poa kia Iehova tuga ne tohi ai ke he tohi a Mose. Ne eke pihia foki ke he tau povi.

13 Ne tunu foki e lautolu e paseka ke he afi ke lata mo e fakatufono; ka ko e tau poa tapu ne tunu e lautolu ke he tau ulo, mo e tau pani lalahi, mo e tau pani lapalapa, mo e tufatufa fakaave ke he tau tagata oti he motu.

14 Kua mole ia ti taute ai e lautolu ma lautolu mo e tau ekepoa; ha ko e tau ekepoa ko e fanau a Arona ne feiga ai a lautolu he eke e tau poa huhunu mo e tau gako ato hoko ke he po; ko e mena ia ne taute ai he tau tagata Levi ma lautolu ni mo e tau ekepoa ko e fanau a Arona.

15 Ko e tau tagata uhu lologo ko e fanau a Asafo ha ha i ai a lautolu ke he tau mena ha lautolu ke tutu ai, ke lata mo e poaki a Tavita, mo Asafo, mo Hemana, mo Iutana ko e tagata kitekite he patuiki; ne leoleo foki he tau tagata leoleo gutuhala taha gutuhala mo e taha gutuhala; nakai toka e lautolu ha lautolu a tau gahua; ka ko e tau matakainaga ha lautolu ko e tau tagata Levi ne taute ai e lautolu ma lautolu.

16 Kua oti he taute e tau gahua oti a Iehova ke he aho ia ni, ke eke ai e paseka mo e huhunu ai e tau poa huhunu ki luga he fatapoa a Iehova, ke lata mo e poaki he patuiki ko Iosia.

17 Ko e fanau a Isaraela ha ha i ai ne eke e lautolu e paseka ke he aho ia, mo e po fitu ne eke ai e lautolu e galue he tau areto nakai fakaea.

18 Nakai eke foki e paseka pehena i Isaraela tali mai he vaha he perofeta ko Samuela; nakai eke foki he tau patuiki oti a Isaraela ha paseka tuga ne paseka ne eke e Iosia, mo e tau ekepoa, mo e tau tagata Levi, mo Iuta oti mo Isaraela ha ha i ai, mo lautolu ne nonofo i Ierusalema.

19 Ne eke e paseka na ke he tau hogofulu ma valu ne patuiki ai a Iosia.

20 Kua mole atu e tau mena oti ia, kua taute foki e Iosia e fale, ti hake ai e patuiki a Aikupito ko Neko ke tau mo Karekemisa tata age ki Eufirate; ti fina atu a Iosia ke totoko atu kia ia.

21 Ka e fakafano mai e ia e tau fekau kia ia, kua pehe mai, Ko e heigoa hāu kia au, ko koe na ko e patuiki a Iuta na e? Nakai fina atu au he aho nai ke tau mo koe, ka ko e magafaoa kua tau a mautolu ki ai; ha kua pehe mai e Atua kia au ke fakaave; Toka ā ua totoko atu a koe ke he Atua, kua fakalataha mo au, neke fakaoti ai e ia a koe.

22 Ka e nakai liu kehe a Iosia ia ia, ka e tapulu ai a ia ke he tau tapulu kehe ke tau mo ia, mo e nakai fanogonogo a ia ke he tau kupu a Neko mai he fofoga he Atua, ka e fano a ia ke tau ke he pahua a Mekito.

23 Ti fana atu he tau tagata fana e tau fana ke he patuiki ko Iosia; ti pehe age e patuiki ke he hana tau fekafekau, Kia uta kehe e mutolu au, ha kua tuina lahi tuai au.

24 Ti lagaaki ai he tau fekafekau hana a ia he kariota ia, mo e fakaheke e lautolu a ia ke he kariota ne ua aki ha ha ia ia, mo e uta e lautolu a ia ki Ierusalema; kua mate a ia ti tanu e lautolu a ia ke he tau tukuaga he hana tau matua tane. Ti mānu ai a Iuta oti mo Ierusalema ha ko Iosia.

25 Ti tagi aue ai a Ieremia ha ko Iosia; ko e tau tane uhu lologo oti katoa mo e tau fifine uhu lologo kua talahau ai e lautolu a Iosia ke he tau lologo moiofa ha lautolu kua hoko mai ke he aho nai, kua eke ia mo fakatufono kia Isaraela; kitiala, kua tohi ai ke he tau lologo moiofa.

26 Ko e tau mena ne toe ne eke e Iosia, mo e hana mahani mitaki, ke lata mo e tau mena kua tohi ke he fakatufono a Iehova,

27 Ko e hana tau mena ne eke, ko e tau mena fakamua, mo e tau mena fakamui, kitiala, kua tohi ke he tohi he tau patuiki a Isaraela mo Iuta.