2 Nofoaga he Tau Patuiki

36 TI uta he tau tagata he motu e tama a Iosia ko Iehoahasa, mo e eke e lautolu a ia mo patuiki ke hukui aki hana matua i Ierusalema.

2 Ne uafulu ma tolu e tau tau a Iehoahasa he eke a ia mo patuiki, ti tolu e mahina ne patuiki ai a ia i Ierusalema.

3 Ti uta kehe he patuiki a Aikupito a ia i Ierusalema, ti fakahala foki e ia e motu ke he taha teau e taleni ario, mo e taleni auro.

4 Ti kotofa he patuiki a Aikupito, e matakainaga hana ko Eliakimo ke eke mo patuiki i Iuta mo Ierusalema, ti ui ai e ia hana higoa ko Iehoakima. Ti uta ai e Neko hana matakainaga ko Iehoahasa, mo e takitaki age a ia ki Aikupito.

5 Ne uafulu ma lima e tau a Iehoakima he eke a ia mo patuiki, ti hogofulu ma taha e tau ne patuiki ai a ia i Ierusalema; ne eke foki e ia e mahani kelea ki mua a Iehova hana Atua.

6 Ne hake e patuiki a Papelonia ko Nepukanesa ke tau mo ia, mo e lili e ia a ia ke he tau liliaga apa kula ke uta a ia ki Papelonia.

7 Ne uta foki e Nepukanesa falu a kapiniu he fale a Iehova ki Papelonia, mo e tuku ai e ia ke he hana faituga i Papelonia.

8 Ko e tau mena ne toe ne eke e Iehoakima, mo e hana tau mahani fakalialia ne eke e ia, mo e tau mena ne kitia kia ia, kitiala, kua tohi ai ke he tohi ne tohi ai e tala ke he tau patuiki a Isaraela mo Iuta; ti eke e tama hana ko Iehoakina mo patuiki ke hukui aki a ia.

9 Ne valu e tau a Iehoakina he eke a ia mo patuiki, ti tolu e mahina mo e hogofulu e aho ne patuiki ai a ia i Ierusalema; ne eke foki e ia e tau mahani kelea ki mua a Iehova.

10 Kua liu hoko mai e tau, ti fakafano age he patuiki a Papelonia ko Nepukanesa e tau fekau, mo e uta a ia ki Papelonia, mo e tau kapiniu mitaki he fale a Iehova; ne eke foki e matakainaga hana ko Setekaia mo Patuiki i Iuta mo Ierusalema.

11 Ne uafulu ma taha e tau a Setekaia he eke a ia mo patuiki, ti hogofulu ma taha e tau ne patuiki ai a ia i Ierusalema.

12 Ne eke e ia e mahani kelea ki mua a Iehova hana Atua, ti nakai fakatokolalo a ia ki mua he perofeta ko Ieremia, ne vagahau mai kia ia ke he finagalo a Iehova.

13 Ne fakafualoto foki a ia ke he patuiki ko Nepukanesa, ne pehe age kia ia kia omonuo a ia ke he Atua; ka e fakamao ai e ia hana ua, mo e fakamalolo e ia hana loto, mo e nakai liu mai a ia kia Iehova ko e Atua a Isaraela.

14 Ko e tau iki oti foki he tau ekepoa, mo e motu, ne hala lahi ni a lautolu ke lata mo e tau mahani fakalialia oti he tau motu kehe; ne fakakelea foki e lautolu e fale a Iehova ne fakatapu ai e ia i Ierusalema.

15 Ne fakafano mai he Atua he tau matua ha lautolu ko Iehova hana tau fekau, ne uhu matike a ia mo e fakafano mai e ia a lautolu; he fakaalofa a ia ke he hana motu mo e hana haeleaga;

16 Ka e fakafiufiu e lautolu kia lautolu ne fakafano mai he Atua, mo e fakavihia e lautolu hana tau kupu, mo e va a lautolu ke he hana tau perofeta, ti tupu ai e ita a Iehova ke he hana motu, ato nakai maeke ke fakamalolo ai a lautolu.

17 Ti fakafano mai ai e ia kia lautolu e patuiki he tau tagata Kaletaia, ne kelipopo e ia ha lautolu a tau fuata ke he pelu ke he fale he faituga ha lautolu, mo e nakai fakaalofa atu a ia ke he tau fuata mo e tau tamāfine ikiiki, ko e tau patu mo e tau tagata momotua; ne tuku atu e ia a lautolu oti ke he hana lima.

18 Ko e tau kapiniu oti foki he fale he Atua, ko e tau mena lalahi mo e tau mena ikiiki, mo e tau koloa he fale a Iehova, mo e tau koloa he patuiki mo e hana tau iki; ne uta e ia e tau mena oti ia ki Papelonia.

19 Ne huhunu foki e lautolu e fale he Atua, mo e ulu e kaupa a Ierusalema, mo e huhunu ke he afi hana tau fale iki oti, mo e moumou ai hana tau kapiniu mitaki oti.

20 Ko lautolu ne toe ne hao mai he pelu ne fakapaea atu e ia ki Papelonia; ha ha i ai a lautolu mo ia mo e hana tau tama tane kua eke a lautolu mo tau fekafekau, kua hoko ke he vaha ne pule ai e kautu a Peresia.

21 Kia fakamoli ai e kupu a Iehova ne vagahai ai e Ieremia, ke hoko ke he vaha kua fakakatoatoa ai he kelekele hana tau sapati; ko e tau aho oti ne vao ai, ne eke sapati ai, ke fakakatoatoa ai e tau tau fitugofulu.

22 Ko e tau fakamua he patuiki a Peresia ko Kuresa, kia hoko ai e kupu a Iehova ne vagahau mai a Ieremia, ne fakalagalaga ai e Iehova e loto a Kuresa ko e patuiki a Peresia, ti fakamatala ai e ia e kupu ke he hana kautu oti, mo e tohi ai e ia ke he tohi, kua pehe age,

23 Kua pehe atu e vagahau he patuiki a Peresia ko Kuresa, Kua foaki mai kia au e Iehova ko e Atua he lagi e tau kautu oti he lalolagi; kua poaki mai foki a ia kia au ke ta e au e fale māna i Ierusalema ha ha i Iuta. Ko ia ha ha ia mutolu mai hana motu oti, ne ha ia ia a Iehova hana Atua, kia hake ai a ia.