Sakaria

3 NE fakakite mai foki kia au a Iosua ko e ekepoa ne mua, kua tu ki mua he agelu a Iehova; ko Satani foki kua tu a ia ke he hana fahi matau ke totoko atu kia ia.

2 Ti pehe age a Iehova kia Satani, Kia akonaki atu e Iehova a koe ma Satani, ko ia kua fifili a Ierusalema; nakai kia ko e potu gaafi hanai kua hamu mai he afi?

3 Ne tapulu ai a Iosua ke he tau tapulu pilo; ti tu ai a ia ki mua he agelu.

4 Ne tali age a ia mo e pehe age a ia kia lautolu ne tutu ai ki mua hana, kua pehe age, Kia uta kehe ā ia ia e tau tapulu pilo ne tapulu ai a ia. Ne pehe age foki a ia kia ia, Kitiala kua uta kehe e au hau a tau mahani kelea i luga hau, to fakatapulu foki e au a koe ke he tau tapulu fulufuluola.

5 Ti pehe age au, Kia tuku e lautolu e potiki mitaki ke he hana ulu, ti tuku ai e lautolu e potiki mitaki ke he hana ulu, mo e fakatapulu ai e lautolu a ia ke he tau tapulu, kua tu mai foki e agelu a Iehova.

6 Ti tala age fakalahi he agelu a Iehova kia Iosua, kua pehe age.

7 Kua pehe mai e vagahau a Iehova Sapaota, Kaeke ke fano a koe ke he haku a tau puhala, kaeke foki ke omaoma a koe ke he haku a fekau, ti fakafili ai e koe haku a fale, ti leveki foki e koe haku a tau loto pa; to tuku atu foki e au kia koe e tau puhala ke fano ai fakalataha mo lautolu na kua tutu ai.

8 Iosua na e, ko e ekepoa ne mua, kia fanogonogo mai a, ko koe katoa mo lautolu ha ha ia koe, kua nonofo ki mua hau; ha kua eke e tau tagata na mo fakamailoga; ha ko e mena, kitiala, to ta mai e au haku a fekafekau ko e La akau.

9 Ha ko e mena kitiala, ko e maka ne tuku atu ai e au ki mua a Iosua, ha ha i ai ke he maka taha fitu e mata; kitiala to ta ai e au ke he maka e tau mena ke ta ki ai, kua pihia mai a Iehova Sapaota; to uta kehe foki e au e mahani kelea he motu nai ke he aho taha.

10 Kua pehe mai a Iehova Sapaota, ko e aho ia to takitaha a lautolu mo e ui ke he tagata ne katofia mo ia ki lalo he vine ki lalo foki he mati.