Mataio

27 KUA aho, ti pulega ai e tau ekepoa ne mua oti mo e tau patu he motu kia Iesu kia kelipopo a ia.

2 Kua lili e lautolu a ia, ti takitaki e lautolu, mo e tuku atu a ia kia Ponotio Pilato ko e iki.

3 Kua iloa e Iuta ne afo a ia, kua fakahala tuai a ia, ti tokihala ai a ia, kua liuaki atu e tau tupe ne tolugofulu ke he tau ekepoa ne mua mo e tau patu,

4 Kua pehe atu, Kua hala tuai au he afo e au e tagata nakai hala. Ka kua pehe mai a lautolu, Mo ha ia kia mautolu? Pule na koe.

5 Ti liti hifo e ia e tau tupe ke he faituga, ka e fano kehe; ti fano ai a ia, kua taupega e ia a ia.

6 Ti eke he tau ekepoa ne mua e tau tupe, kua pehe age, kua nakai lata ke tuku e tau mena nai ke he tokaaga, ha ko e totogi toto.

7 Ti pulega ai a lautolu, ti fakafua ai e fonua he tagata eke kapiniu kelekele, ke tanu ai e tau tagata kehe.

8 Ko e mena haia kua ui ai e fonua ia, Ko e fonua he toto, kua hoko ni ke he vaha nai.

9 Ati fakamoli ai e kupu he perofeta ko Ieremia, ne pehe mai, Kua toto e lautolu e tau tupe ne tolugofulu, ko e fakafua hanā ne fakalata ki ai, ne fakalata he fanau a Isaraela.

10 Ati fakafua aki e lautolu e fonua he tagata eke kapiniu kelekele, tuga ne poaki mai he Iki kia au.

11 Kua tu a Iesu ki mua he iki; ti hūhu mai e iki kia ia, kua pehe mai, Ko koe kia ko e patuiki he tau tagata Iutaia? Ti pehe atu a Iesu kia ia, Haia.

12 Kua hokotaki a ia he tau ekepoa ne mua mo e tau patu, ka e nakai lea a ia.

13 Ti tala age ai a Pilato kia ia, Kua logona nakai e koe e tau mena loga kua talahau mai e lautolu kia koe?

14 Ka e nakai tali atu ai e ia ha kupu taha; ati ofo lahi ai e iki.

15 Ko e tau galue oti ne mahani ai e iki ke vevete atu ke he lanu tagata e taha tagata ne lili, ko ia ne loto ki ai a lautolu.

16 Ko e vaha ia, ha i ai ia lautolu taha kua lili, ko e tagata talahaua, ko e hana higoa ko Parapa.

17 Kua fakapotopoto tuai a lautolu, ti tala age ai a Pilato kia lautolu, Po ko hai kua loto a mutolu ki ai ke vevete atu e au kia mutolu? Ko Parapa kia? Po ko Iesu ne higoa ko Keriso?

18 Ha kua iloa tuai e ia ko e mahekeheke ne tuku atu ai e lautolu a ia.

19 Kua nofo a ia ke he nofoa fakafili, ti fekau mai ai kia ia he hoana hana, kua pehe mai, Neke eke e koe ha mena ke he tagata tututonu ia; ha ko e mena mamahi lahi ai au ninei ke he miti kia ia.

20 Ka kua omoomoi he tau ekepoa ne mua mo e tau patu e lanu tagata, kia tala age a lautolu, Ko Parapa, ka kia kelipopo a Iesu.

21 Ti tala age e iki, kua pehe age kia lautolu, Ko hai taha ia laua ke loto a mutolu ki ai ke vevete atu e au kia mutolu? Ti pehe age a lautolu, Ko Parapa.

22 Ti tala age a Pilato kia lautolu, Ti ko e heigoa e mena ke eke e au kia Iesu ne higoa ko Keriso? Ti tala age ai a lautolu oti kia ia, Kia fakasatauro a ia.

23 Kua tala age e iki, Ko e heigoa foki e mena kelea ne eke e ia? Ka kua au atu ai ha lautolu a tauhea, kua pehe age, Kia fakasatauro a.

24 Kua iloa e Pilato, kua nakai aoga hana kupu, ka kua au atu ai he go, ti toto e ia e magavai, kua holoholo ai hana tau lima ki mua he lanu tagata, kua pehe age, Kua mea na au he toto he tagata tututonu nai; pule na mutolu.

25 Ti tali age ai e motu oti, kua pehe age, Kia toka i luga ia mautolu, mo e tau fanau ha mautolu hana a toto.

26 Ati vevete atu ai e ia a Parapa kia lautolu, ka e fahi e ia a Iesu, ti tuku atu a ia ke fakasatauro.

27 Kua takitaki a Iesu he kau he iki ke he fale he iki, ti fakapotopoto e lautolu kia ia e kau oti.

28 Kua āki e lautolu hana tau tapulu, ti fakatapulu e lautolu a ia ke he tapulu kula.

29 Kua fakavihi foki e lautolu e foufou ke he tau akau fotofoto, ti fakafoufou aki e lautolu hana fufuga, kua tuku foki e kaho ke he lima matau hana; ti fakatokotui a lautolu ki mua hana, kua fefeua kia ia, kua pehe age, Fakaalofa, ko e patuiki he tau tagata Iutaia na e!

30 Ti tauanu a lautolu kia ia, ti toto e lautolu e kaho mo e ta aki hana fufuga.

31 Kua oti he fefeua a lautolu kia ia, ti āki ai e lautolu e tapulu, mo e fakatapulu a ia ke he hana tau tapulu; ti takitaki atu e lautolu a ia kia fakasatauro.

32 Ha ne o atu a lautolu, ti kitia ai e lautolu e tagata Kurene, ne higoa ko Simona, kua fakamakamaka a lautolu kia ia ke fua hana satauro.

33 Kua hoko atu a lautolu ke he mena ne higoa ko Kolokota, ko e hana kakano, ko e mena ne toka ai e tau ulupoko.

34 Kua age e lautolu kia ia e vineta kua fiofio mo e akau kona, kia inu ai; kua kamata e ia, ti nakai mafai ke inu ai.

35 Kua fakasatauro e lautolu a ia, ti tufatufa e lautolu hana tau tapulu, kua eke ai e lautolu e vili; kia fakamoli ai e kupu he perofeta, Kua tufatufa e lautolu haku a tau tapulu ma lautolu, ti kua eke e lautolu e vili ke he haku a tapulu tino.

36 Kua nonofo a lautolu ke he mena ia, kua leoleo a ia.

37 Ne tuku foki ki luga he hana fufuga e tohi ne tohi ai e mena ne talahau kia ia, KO IESU HANAI, KO E PATUIKI HE TAU TAGATA IUTAIA.

38 Kua fakasatauro foki e lautolu fakalataha mo ia e na tagata fofo mena, ko e taha he fahi matau, mo e taha he fahi hema.

39 Kua vagahau kelea kia ia a lautolu ne o age, mo e luelue ha lautolu a tau ulu;

40 Kua pehe age, Ko koe na, ne ulu e faituga, mo e eke foki ke he tolu e-aho, ati fakamoui a e koe a koe. Kaeke ko e Tama he Atua a koe, ati hifo mai a he satauro.

41 Ti pihia foki e tau ekepoa ne mua, mo e tau tohikupu, mo e tau patu, ne fefeua kia ia kua pehe atu,

42 Ne fakamomoui e ia e fala tagata, ka e nakai maeke ia ia ke fakamoui a ia. Kaeke ko e patuiki a Isaraela a ia, ati hifo mai a he satauro mogoho nai, ti talia ai e tautolu a ia.

43 Ne tua a ia ke he Atua, kia laveaki mai a e ia a ia mogoho nai, kaeke ke finagalo mai a ia kia ia; ha kua pehe mai a ia, Ko au ko e Tama he Atua.

44 Ti pihia foki e na tagata fofo mena ne fakasatauro mo ia, ne vagahau kelea a laua kia ia.

45 Kua kamata mai he magaaho ono, ne pouli oti ai e motu, kua hoko ni ke he magaaho hiva.

46 Kua tata ke he magaaho hiva ti ui ai a Iesu mo e leo lahi, kua pehe atu, Eli, Eli, lama sapatani? ko e hana kakano hanai, Hoku Atua na e, hoku Atua na e, ko heigoa e mena kua tiaki mai ai e koe au?

47 Kua logona ai he falu ia lautolu ne tutu mai, ti pehe age ai a lautolu, Kua ui atu a ia kia Elia.

48 Ati poi ai agataha e taha ia lautolu, kua toto e omomi ti fuifui ke he vineta, mo e tuku ke he kaho, ti fakainu aki a ia;

49 Ka e pehe ni falu, Tokai a, ato kitia e tautolu po ke hau nakai a Elia ke fakamoui a ia.

50 Kua liu foki ui a Iesu mo e leo lahi, ti tuku atu ai e ia hana agaga.

51 Kitiala, kua hēhēua e ia puipui he faituga, kua kamata hifo i luga, ati hoko ke he kelekele; kua lulululu foki e fonua, kua maihiihi foki e tau maka.

52 Kua tokanoa foki e tau tukuaga, ti tutu mai ai e tau tagata tapu tokologa ne momohe;

53 Kua mole atu foki hana tu mai, ti o mai ai a lautolu he tau tukuaga, kua o atu a lautolu ke he māga tapu, kua kitia he tau tagata tokologa a lautolu.

54 Ko e takitaki he tokoteau, mo lautolu ne leoleo a Iesu fakalataha mo ia, kua kitia e lautolu e mafuike, mo e tau mena ne eke, ti matakutaku lahi a lautolu, kua pehe age, Ko e moli, ko e Tama ni he Atua hanā.

55 Ne nonofo ai foki e tau fifine tokologa ne kitekite fakamamao mai, ko lautolu haia ne mumui mai ia Iesu mai Kalilaia, mo e fekafekau kia ia;

56 Ha ha ia lautolu a Maria i Makatala, mo Maria e matua fifine a Iakopo mo Iose, ko e matua fifine foki he na tama tane a Sepetaio.

57 Kua hoko ke he afiafi, ti hau ai e taha tagata maukoloa i Arimataia, ne higoa ko Iosefa ko ia foki e taha tutaki a Iesu;

58 Kua fano a ia kia Pilato, kua ole e tino a Iesu. Ti poaki atu ai a Pilato ke age kia ia e tino.

59 Kua uta e Iosefa e tino, ti vakai ai e ia ke he ie lino mea.

60 Ti tuku atu ai e ia ke he hana tukuaga fou, ne tuki ke he kaumaka; kua fuluhi atu e ia e maka lahi ke he gutu he tukuaga, ti fano ai a ia.

61 Ha i ai foki a Maria i Makatala, mo e taha Maria, ne nonofo fehagai a laua mo e tukuaga.

62 Ko e pogipogi, ko e aho haia ne ua aki e aho he tauteaga, kua fakapotopoto atu ai kia Pilato e tau ekepoa ne mua mo e tau farasaio,

63 Kua pehe age, Ko e iki na e, kua manatu a mautolu, kua pehe mai e tagata fakavai na he moui a ia, Ka mole tolu e aho, ti tu mai foki au.

64 Hanai, kia poaki age a koe, kia fakamau e tukuaga, ato hoko ke he aho tolu, neke o age hana tau tutaki he po, mo e kaiha a ia, ti pehe a lautolu ke he motu, Kua tu mai tuai a ia ia lautolu kua mamate; ti au atu ai e fakavai fakamui, ke he fakavai ne fakamua.

65 Ti pehe age ai a Pilato kia lautolu, Ha ia mutolu e kau leoleo; ati o a, pule ni a mutolu ke fakamau ai.

66 Ti o ai a lautolu, kua fakamau e tukuaga, kua toka ai e fakamailoga ke he maka, mo e tau tagata ke leoleo ai.