Sakaria

6 NE haga hake foki au, mo e kitia e au, kitiala, ko e fa e kariota, ne o age he vaha he na mouga ua; ko e tau mouga foki, ko e tau mouga apa kula haia.

2 Ha ha he kariota fakamua e tau solofanua kula; ha ha he kariota ne ua aki e tau solofanua uli;

3 Ha ha he kariota ne tolu aki e tau solofanua hina; ha ha he kariota ne fa aki e tau solofanua pulepule ko e tau solofanua malolo.

4 Ti huhu age au ke he agelu ne vagahau ai a maua, kua pehe age; Ko e iki na e ko e heigoa kia e tau mena ia?

5 Ti tali mai ai e agelu kia au, kua pehe mai, Ko lautolu na ko e tau matamatagi ne fa he lagi, ne o age he tutu i mua he Iki he lalolagi oti.

6 Ko e kariota ha ha i ai e tau solofanua uli kua fina age a ia ke he motu ke he fahi tokelau; mo e tau solofanua hina ne mumui age ai; ka e o age e tau solofanua pulepule ke he motu ke he fahi toga.

7 Ne o age foki e tau solofanua malolo, kua fia o ke o fano ai ke he lalolagi. Ti o fano ai a lautolu ke he lalolagi.

8 Ti ui mai a ia kia au, mo e vagahau mai a ia kia au, kua pehe mai, Kikite la kia lautolu ne o age ke he motu ke he fahi tokelau kua fakaokioki ai e lautolu haku loto ke he motu he fahi tokelau.

9 Ne hoko mai foki e kupu a Iehova kia au, kua pehe mai;

10 Kia uta la e tau mena ia lautolu he paeaaga, ko Heletai mo Tovia, katoa mo Itaia; kia fano a koe he aho ia, ti hu atu a koe ke he fale a Iosia ko e tama a Sefanaia, kua nonofo ai a lautolu he o mai a lautolu i Papelonia;

11 Ti uta e koe ia lautolu e ario mo e auro, kia eke ai foki e koe e tau foufou, mo e tuku ai e koe ke he ulu he ekepoa ne mua ko Iosua ko e tama a Iosataka.

12 Kia tala age foki a koe kia ia, kia pehe age, Kua vagahau mai pehe a Iehova Sapaota, kua pehe mai, Kitiala, ko e tagata ko e La akau hana higoa; to tupu hake a ia mai he mena ne tupu ai, to ta foki e ia e faituga a Iehova.

13 To ta ni e ia e faituga a Iehova; to ha ia ia foki e lilifu, to nofo foki a ia i luga hana nofoaiki mo e pule ai a ia, to eke foki a ia mo ekepoa i luga hana nofoaiki; to ha i ai foki ia laua e pule ke monuina ai.

14 To ha i ai foki e tau foufou ma Heleme, ma Tovia foki, ma Itaia foki, ma Heni foki ko e tama a Sefanaia, ke eke mo fakamanatuaga ke he faituga a Iehova.

15 Ko lautolu foki ne mamao to o mai a lautolu mo e ta ai e fale a Iehova; ti iloa ai e mutolu kua fakafano mai au kia mutolu e Iehova Sapaota; to hoko foki e mena na kaeke ke fanogonogo fakamitaki a mutolu ke he leo a Iehova ha mutolu a Atua.