Sakaria

Ko e Tohi a Sakaria

1 KO e valu mahina, ko e tau ua a Tariu, ne hoko mai ai e kupu a Iehova ke he perofeta ko Sakaria ko e tama a Parakaio, ko e tama a ia a Ito, kua pehe mai,

2 Ne ita lahi ni a Iehova ke he tau matua ha mutolu.

3 Kia pehe age foki a koe kia lautolu, kua pehe mai e vagahau a Iehova Sapaota, Kia liliu mai ā mutolu kia au, kua pihia mai a Iehova Sapaota; ti liu atu au kua mutolu, kua pihia mai a Iehova Sapaota.

4 Aua neke eke a mutolu ke tuga ne tau matua ha mutolu, ko lautolu ne ui age ki ai he tau perofeta fakamua, kua pehe age, Kua pehe mai e vagahau a Iehova Sapaota, Kia liliu mai a mutolu he tau mahani kelea ha mutolu, mo e ha mutolu a tau gahua kelea; ka e nakai fanogonogo mai a lautolu, mo e nakai haga mai a lautolu kia au, kua pihia mai a Iehova.

5 Ko e tau matua ha mutolu ko fe kia a lautolu? ko e tau perofeta foki, ko e mena momoui tukulagi kia a lautolu?

6 Ka ko e haku a tau kupu mo e haku a tau fakatufono, ne poaki atu ai e au ke he haku a tau fekafekau ko e tau perofeta, nakai kia moua atu ai ha mutolu a tau matua? ti liliu mai ai a lautolu mo e pehe mai a lautolu, Tuga he finagalo a Iehova Sapaota, ke eke kia mautolu, ke lata mo e ha mautolu a tau mahani mo e ha mautolu a tau gahua, kua eke pihia ni e ia kua mautolu.

7 Ko e aho uafulu ma fa, he mahina hogofulu ma taha, ko e mahina ko Sapata haia, ko e tau ua a Tariu, ne hoko mai ai e kupu a Iehova ke he perofeta ko Sakaria ko e tama a Parakaio, ko e tama a ia a Ito, kua pehe mai.

8 Ne kitia ai e au ke he po, kitiala, ko e tagata kua heke e solofanua kula, kua tu foki a ia ke he ulu akau ko e tau hatasi, ke he mena tokolalo; ha ha i ai ki tua hana foki e tau solofanua kula, mo e tau solofanua kulatea, mo e tau solofanua hina.

9 Ti pehe age au, Ko e iki na e, ko e heigoa kia e tau mena na? Ti pehe mai kia au e agelu ne vagahau ai a maua, To fakakite atu e au kia koe e kakano he tau mena na.

10 Ti tali mai ai e tagata ne tu ke he ulu akau ko e tau hatasi, kua pehe mai, ko lautolu na kua fakafano mai e Iehova ke o fano ai ke he lalolagi.

11 Ti tali age ai a lautolu ke he agelu ne tu ke he ulu hatasi, kua pehe age, Kua o fano ni a mautolu ke he lalolagi; ti, kitiala, kua nonofo noa e lalolagi oti, kua nonofo fakatekiteki ni.

12 Ti vagahau ai e agelu a Iehova, kua pehe age, Iehova Sapaota na e, ato a fe kia ke nakai fakaalofa a koe ki Ierusalema mo e tau maga a Iuta, ne ita a koe ki ai ke he tau tau ne fitugofulu?

13 Ti tali mai ai a Iehova ke he agelu ne vagahau mai kia au, ke he tau kupu mitaki, ko e tau kupu fakamafana.

14 Ti pehe mai kia au e agelu ne vagahau ai a maua, Kia ui age a, kia pehe age, Kua pehe mai e vagahau a Iehova Sapaota, Kua fakamalolo ai au ha ko Ierusalema mo Siona mo e fakamalolo fakalahi.

15 Kua ita lahi ni au ke he tau motu kehe kua nonofo fakahanoa; ha ko e mena ita tote ni au, ka ko lautolu, kua fakalahi ai e lautolu e malaia.

16 Ko e mena ia kua pehe mai e vagahau a Iehova kua liu atu au ki Ierusalema mo e fakaalofa; to ta ai haku a fale, kua pihia mai a Iehova Sapaota; to toho ai foki e afo ke fafati aki i luga a Ierusalema.

17 Kia ui atu foki a, kia pehe atu, Kua pehe mai a Iehova Sapaota, To tolonaki atu foki haku a tau maga ha ko e monuina; to liu fakamafana e Iehova a Siona, mo e fifili ai foki e ia a Ierusalema.

18 Ti haga hake au, ti kitia ai e au, kitiala, ko e fa e hoe.

19 Ti pehe age au ke he agelu ne vagahau ai a maua, Ko e heigoa kia e tau mena na? Ti pehe mai a ia kia au, Ko e tau mena na, ko e tau hoe haia ne fakamavehevehe ai a Iuta, mo Isaraela, mo Ierusalema.

20 Ne fakakite mai foki e Iehova kia au e tau tufuga ne tokofa.

21 To pehe age ai au, Kua o mai a lautolu na, ke eke heinoa? Ti tali mai a ia, kua pehe mai, Ko e tau hoe hanā ne fakamavehevehe ai a Iuta, ati oti kua nakai ha i ai ha tagata taha kua haga hake ki luga hana a ulu; ka kua o mai a lautolu na ke fakamatakutaku atu kia lautolu, ke liti hifo ki lalo e tau hoe he tau motu kehe, ne nikiti ai ki luga ha lautolu a tau hoe ke he motu a Iuta ke fakamavehevehe ai.