Esera

4 NE logona e lautolu ne fai fi kia Iuta mo Peniamina kua ta he tau tagata he paeaaga e faituga ma Iehova ko e Atua a Isaraela;

2 Ti o mai ai a lautolu kia Serupapelu mo e tau iki ne mua, mo e pehe mai a lautolu kia lautolu, Kia eke e tautolu e fale fakalataha mo mutolu; ha kua kumi a mautolu ke he Atua ha mutolu, tuga na mutolu; kua eke poa foki e mautolu kia ia tali mai he vaha a Esarata ko e patuiki a Asuria, ne ta hake a mautolu ki hinai.

3 Ti pehe age a Serupapelu, mo Iesua mo e tau iki ne mua oti a Isaraela kia lautolu, Nakai ta e tautolu mo mutolu e fale he Atua ha mautolu; ka to ta e mautolu hoko mautolu ni e fale a Iehova ko e Atua a Isaraela, tuga ne poaki mai ai he patuiki a Peresia ko Kuresa kia mautolu.

4 Ti fakalolelole ai he tau tagata he motu e tau tagata Iuta, mo e fakamatakutaku ai e lautolu a lautolu kua eke e fale;

5 Ne totogi foki e lautolu falu ke pulega mo e fakalavelave kia lautolu, kia ulu ai e lautolu ha lautolu a tau pulega ke he tau aho oti he patuiki a Peresia ko Kuresa, ke hoko foki ke he vaha ne eke ai a Tariu mo patuiki a Peresia.

6 Ko e vaha ne patuiki ai a Ahasueru, ke he kamataaga he hana eke mo patuiki, ne tohi age e lautolu kia ia mo e hokotaki ai a lautolu ne nonofo i Iuta mo Ierusalema.

7 Ko e tau aho foki a Aretaseta ne tohi age ai e Pisalama, ko Mitereta, ko Taveeli, mo lautolu oti ne pule fakalataha mo lautolu kia Aretaseta ko e patuiki a Peresia; ko e tau kupu foki he tohi ne tohi ai ke he vagahau Arama, ne fakamatala ai foki ke he vagahau Arama.

8 Ne tohi age e Rekumu ko e fakafili, mo Semesai ko e tohikupu, ne tohi mo e hokotaki a Ierusalema ke he patuiki ko Aretaseta, kua pehe age;

9 Ti tohi age ai e Rekumu ko e fakafili, mo Semesai ko e tokikupu, mo lautolu oti ne pule fakalataha mo laua; ko e tau tagata Tinai, mo e tau tagata Afaresateka, ko e tau tagata Tarepalai, ko e tau tagata Afaresai, ko e tau tagata Areke ko e tau tagata Papelonia, ko e tau tagata Susana, ko e tau tagata Tihave, ko e tau tagata Elama,

10 Mo e falu he tau motu oti ne ta mai he patuiki lahi mo e talahaua ko Asenapa, mo e fakanonofo ai e ia a lautolu ke he tau maga i Samaria, mo lautolu oti ha ha he fahi mai nai he vailele, ko e vaha ia foki ne tohi ai.

11 Ko e tohi hanai, kua lagaaki, ne fakafano age e lautolu kia ia, ko e patuiki ko Aretaseta, Ko e hau a tau fekafekau ko e tau tagata he fahi mai nai he vailele, kua pehe atu,

12 Kia iloa he patuiki, ko e tau tagata Iuta ne o hake mai ia koe kia mautolu, kua hohoko mai a lautolu ki Ierusalema ko e maga fakafualoto mo e kelea lahi, kua ati foki e lautolu, kua fakaoti e lautolu hana tau kaupa he ati, kua tutaki foki e lautolu hana tau fakaveaga.

13 Kua iloa ainei he patuiki kaeke ke liu ati e maga nai mo e oti foki he ati hana tau kaupa, ti nakai tuai ta atu ai e lautolu e tau poa, mo e tau poa ke he tau mena kehekehe, mo e tau poa he tau puhala; ati oti ti fakagahoa ai e tau mena he tau patuiki.

14 Hanai, kua kai mena a mautolu mai he fale he patuiki; ti nakai lata kia mautolu ke kitekite ke he patuiki kua fakanofogati; ko e mena ia kua fakafano atu ai e mautolu, mo e fakailoa atu ai e tau mena ia ke he patuiki;

15 Kia kumi a ke he tohi fakamanatu he hau a tau matua; ti moua ai e koe ke he tohi fakamanatu, mo e iloa ai e koe, ko e maga na ko e maga fakafualoto, ko e maga foki kua eke e tau mena kelea ke he tau patuiki mo e tau fahi kautu, mo e fakatupu ai e lautolu e fakafualoto tali mai he vaha i tuai; ko e mena ia ne fakaoti ai e maga na.

16 Kua fakailoa atu e mautolu ke he patuiki kaeke ke liu ati e maga na, mo e oti he ati hana kaupa, ti nakai tuai fai tufaaga a koe ke he fahi mai nai he vailele.

17 Ti fakafano age he patuiki e tohi kia Rekumu ko e fakafili, mo Samesai ko e tohikupu, mo lautolu oti kua nonofo i Samaria ne pule fakalataha mo laua, mo lautolu ha ha he fahi atu he vailele, Kia monuina a mutolu, mo e tau kupu pihia.

18 Ko e tohi ne fakafano mai e mutolu kia mautolu, kua totou tuai ki mua haku.

19 Ti poaki age e au, ti kumi ai, ti kua kitia ai ne fakatokoluga e maga na ke he tau patuiki tali mai i tuai, ne fakatapu ai foki e fakafualoto mo e nakai omaoma.

20 Ne ha i ai foki i Ierusalema e tau patuiki malolo, ne pule a lautolu ke he tau motu oti ke he fahi atu he vailele, ne ta age foki kia lautolu e tau poa, mo e tau poa ke he tau mena kehekehe, mo e tau poa he tau puhala.

21 Hanai, kia poaki atu a e mutolu ke he tau tagata ia ke tokai, ti ua ati foki e lautolu e maga na, ato poaki atu ai e au.

22 A mutolu neke fakateaga a mutolu ke he mena na; ke tupu ai he ha e kelea ke fakagahoa ai e tau mena he tau patuiki?

23 Ne totou ai e tau kupu he tohi he patuiki ko Aretaseta ki mua a Rekumu mo Semesai ko e tohikupu, mo lautolu ne pule fakalataha mo laua, ti o fakaave a lautolu ki Ierusalema, ke he tau tagata Iuta, mo e hataki atu kia lautolu mo e lima malolo.

24 Ti toka ai e gahua he fale he Atua ha ha i Ierusalema. Ne toka ai foki ato hoko ke he tau ua ke eke a Tariu mo patuiki a Peresia.