Malaki

2 HANAI foki, ko e poaki hanai kia mutolu ko e tau ekepoa na e,

2 Kaeke ke nakai fanogonogo mai a mutolu, kaeke foki ke nakai manamanatu a mutolu ke ta mai ai e mutolu e fakahekeaga ke he haku a higoa, kua pehe mai a Iehova Sapaota, ti fakafano atu e au e malaia kia mutolu, mo e fakamalaia ai e au e tau mena kua monuina ai a mutolu; ka kua fakamalaia tuai e au; he nakai manamanatu ai a mutolu.

3 Kitiala, to akonaki atu e au ke he tau fua saito ha ko mutolu; to gana foki e au e tau otaota he tau manu ke he tau mata ha mutolu, ko e tau otaota he tau poa he tau galue ha mutolu, to uta kehe foki e au a mutolu fakalataha mo e tau mena ia.

4 Ti iloa e mutolu kua fakafano atu e au e poaki na kia mutolu; kia ha ia Levi haku a maveheaga, kua pihia mai a Iehova Sapaota.

5 Ne ha ia ia haku a maveheaga ha i ai e moui mo e monuina; ne foaki atu e au e tau mena ia kia ia kia matakutaku ai a ia, ti matakutaku ai a ia kia au; ne matakutaku lahi ni a ia ke he haku a higoa.

6 Ko e fakatufono he fakamoli ha ha he gutu hana haia; nakai moua ai foki ha mahani hepehepe ke he hana tau laugutu; ne o fakalataha a maua mo au mo e monuina mo e mahani hako; ne liuaki mai foki e ia e tau tagata tokologa he mahani kelea ha lautolu.

7 Ha ko e tau laugutu he ekepoa kua taofi ai e iloilo, kua kumi foki e lautolu e fakatufono mai he gutu hana; ha ko ia, ko e fekau a Iehova Sapaota.

8 Ka ko mutolu kua o kehe a mutolu he puhala, mo e fakatupetupe ai e mutolu e tau tagata tokologa ke he fakatufono; kua kelea ia mutolu e maveheaga ne eke mo Levi, kua pihia mai a Iehova Sapaota.

9 Ko au foki ne tuku atu e au a mutolu ke fakavihia ai ke eke foki mo tau tagata fakateaga ke he tau motu oti, tuga he nakai omaoma a mutolu ke he haku a tau puhala, mo e fakamailoga tagata e mutolu ke he fakatufono.

10 Nakai kia ko e fanau he Matua taha a tautolu oti ni? nakai kia eke ai a tautolu oti he Atua tokotaha? Ko e heigoa kia e mena kua fakavai ai e tautolu ko e taha ke he taha mo e holi ai e tautolu e maveheaga he tau matua ha tautolu?

11 Kua fakavai e Iuta, kua eke foki i Isaraela mo Ierusalema e mena vihiatia; ha kua holitu e Iuta e mena kua Tapu kia Iehova, ko e mena kua fakaalofa a ia ki ai; kua fai hoana foki a ia ke he tamafifine he atua kehe.

12 To vevehe kehe e Iehova e tagata kua eke e mena na, ko ia ne mataala, mo ia kua tali atu ai mai he tau fale ie a Iakopo? katoa mo ia kua ta atu ai e poa kia Iehova Sapaota.

13 Ko e laga ua he eke e mutolu e tau mena nai, kua ufiufi e mutolu e fatapoa a Iehova ke he tau hihina mata, ko e tagi, mo e tauoi; ko e mena ia kua nakai fofoga mai a ia ke he tau poa ha mutolu, mo e nakai talia fakamitaki ai e ia he tau lima ha mutolu.

14 Ka kua pehe mai a mutolu, Ko e heigoa foki kia e mena? Ha ko Iehova ko ia kua talahau mena kia koe mo ia ne eke mo hoana hau ke he hau a vaha fuata, ko ia ne fakavai e koe; ka e nonofo a mua mo ia, ko e hoana foki a ia he maveheaga.

15 Nakai kia tokotaha ne eke e ia, pete he ha ha ia ia e mena ne toe he agaga? Ko e ha kia ne tokotaha ai? He kumi ai e ia e fanau mahani Atua. Hanai, kia fakaeneene a mutolu ke he tau loto ha mutolu, neke fakavai he taha e hoana ne mau ai a laua ke he vaha fuata.

16 Kua vihiatia e au e tiaki hoana, kua pihia mai a Iehova, ko e Atua a Isaraela; kua ufiufi foki e ia hana tapulu ke he favale, kua pihia mai a Iehova Sapaota; ko e mena ia kia fakaeneene a mutolu ke he tau loto ha mutolu, ka e aua neke fakavai a mutolu.

17 Kua fakamamahi e mutolu a Iehova ke he tau kupu ha mutolu; ka kua pehe mai a mutolu, Ko e mena fe kia kua fakamamahi ai e mautolu a ia? Kua fakamamahi e mutolu a ia he pehe age a mutolu, Ko lautolu oti kua eke mena kelea, kua mitaki a lautolu ki mua a Iehova, kua fiafia foki a ia kia lautolu; po ke pehe age a mutolu, Ko fe kia e Atua, ko e fakafili?