Kolose

3 HANAI, kaeke kua liu fakatu mai a mutolu fakalataha mo Keriso, kia kumi a mutolu ke he tau mena ha i luga, ha i ai a Keriso, kua nofo ke he fahi matau he Atua.

2 Kua loto a mutolu ke he tau mena ha i luga, ka e nakai ko e tau mena ha he lalolagi;

3 Ha kua mamate a mutolu, kua galo foki ha mutolu a moui fakalataha mo Keriso ke he Atua.

4 Ka fakakite mai a Keriso, ko e moui ha tautolu, ti fakakite ai foki a mutolu fakalataha mo ia ke he monuina.

5 Hanai, kia tamate e mutolu ha mutolu a tau fahi tino ha he lalolagi, ko e feuaki, ko e mahani kelea, ko e manako kelea, ko e foli kelea, mo e mahekeheke, ko e hufeilo ke he tupua haia;

6 Ha ko e tau mena ia kua hoko mai ai e ita he Atua kia lautolu kua faliuliu;

7 Ko mutolu foki ne mahani fakalataha mo lautolu i tuai, ka kua nonofo a mutolu mo e tau mena ia.

8 Ka ko e vaha nai kia tuku kehe e mutolu e tau mena oti ia ko e ita foki, ko e vale, ko e loto kelea, ko e kupu kelea, mo e kupu fuafuakelea, mai he tau gutu ha mutolu;

9 Aua neke fepikopikoaki ha kua tuku kehe e mutolu e tagata tuai katoa mo e hana tau mahani.

10 Ha kua fakatapulu a mutolu ke he tagata fou, ko ia kua fakafou ke he iloilo ke fakalata ke he fakatai hana kua eke a ia.

11 Kua nakai ha i ai e tagata Heleni, po ke Iutaia, ko e peritome, po ke nakai peritome, ko e tagata he motu kehe po ke tagata Sakutia, ko e tupa, po ke toka noa; ka kua ha ia Keriso e tau mena oti, ko ia foki ha i ai ke he tau mena oti kana.

12 Haia ni, kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka, ke lata mo lautolu kua fifili he Atua, ko e tau tagata tapu mo e ofania;

13 Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a Keriso kia mutolu, kia pihia foki a mutolu.

14 Ka e ha i luga he tau mena oti ia e fakaalofa ko e pipi haia ke fakamaopoopo ai.

15 Kia pule foki e mafola mai he Atua ke he tau loto ha mutolu, ko e mena ia kua ui ai e mutolu ke eke mo tino taha; kia mahani foki a mutolu ke fakaaue.

16 Kia nofo fakalahi e kupu a Keriso ki loto ia mutolu, mo e iloilo oti ni kia fakaako mo e tomatoma e mutolu ko e taha kia taha ke he tau salamo, mo e tau lologo, mo e tau ulutapu ke lata mo e agaga, ko e fakaalofa noa kua lologo atu ai ke he tau loto ha mutolu ke he Iki.

17 Ko e tau mena oti foki kua eke e mutolu ke he kupu, po ke gahua, kia eke e tau mena oti ke he higoa he Iki ko Iesu, mo e fakaaue ke he Atua e Matua ha ko ia.

18 Ko mutolu, e tau fifine, kia omaoma a mutolu ke he ha mutolu a tau tane, tuga ne mena kua lata ha ha he Iki.

19 Ko mutolu e tau tane, kia fakaalofa ke he tau hoana ha mutolu, ti ua fakahogohogo kia lautolu.

20 Ko mutolu e tau fanau, kia fanogonogo a mutolu ke he tau matua ha mutolu ke he tau mena oti; ha ko e mena mitaki ia ha ha he Iki.

21 Ko mutolu e tau matua tane, aua neke fakalagalaga e tau fanau ha mutolu, neke fakalolelole e tau loto ha lautolu.

22 Ko mutolu e tau fekafekau, kia fanogonogo atu a mutolu ke he tau mena oti ke he tau iki ha mutolu ke he tino, aua neke fekafekau fakapākau tuga ne fia fakafiafia tagata, ka kia eke mo e loto fakamoli, mo e matakutaku ke he Atua.

23 Ko e tau mena oti foki kua eke e mutolu kia eke mo e loto, tuga ne eke ke he Iki, ka e nakai ke he tau tagata;

24 Ha kua iloa e mutolu to moua e mutolu mai he Iki e totogi, ko e tufaaga haia; ha kua fekafekau a mutolu ke he Iki ko Keriso.

25 Ko ia kua mahani hepehepe to moua e ia e taui he hana mahani hepehepe; kua nakai fakamailoga foki ha tagata.