Luka

7 KUA fakaoti e ia hana tau kupu oti, ne fanogonogo ki ai e motu, ti fano ai a ia ki Kapanaumi.

2 Kua gagao e fekafekau he taha takitaki he tokoteau, ne fakahelehele e ia, kua teitei mate.

3 Kua logona e ia e tala kia Iesu, ti fakafano mai ai e ia kia ia e tau patu Iutaia, ke olelalo mai kia ia ke fano ke fakamoui hana fekafekau.

4 Kua o mai a lautolu kia Iesu, ti ole fakamakamaka a lautolu kia ia, kua pehe mai, Kua aoga e tagata ia ke eke ki ai e koe e mena nai;

5 Ha kua fakaalofa mai a ia ke he motu ha tautolu, kua ta foki e ia e sunako ma mautolu.

6 Ti o ai a Iesu mo lautolu; kua tata tuai a ia ke he fale, ti fakafano mai ai he takitaki he tokoteau hana tau kapitiga kia ia, kua pehe mai kia ia, Ko e Iki na e, ua fakafita e koe a koe, nukua nakai aoga au ke hu mai a koe ki lalo hoku fale.

7 Ko e mena foki ia ne manatu ai au, nakai aoga au ke fina atu kia koe; ka kia vagahau mai e koe e kupu ti fakamalolo ai haku a fekafekau.

8 Ha ko au foki ko e tagata kua omaoma ke he pule, kua fanogonogo mai kia au e kau; ka tala atu au ke he taha, Ati fano a, ti fano ai a ia; mo e taha, Kia hau a, ti hau ai a ia; mo e haku a fekafekau, Ati eke a e koe e mena nai, ti eke ai e ia. 9 Kua logona e Iesu e tau mena ia, ti ofo ai na ia; kua haga atu, mo e tala age ke he moto tagata ne mumui mai kia ia, Kua tala atu e au kia mutolu, nakai kitia e au i Isaraela ha tagata ne tua fakalahi pihia.

10 Ko lautolu ne fakafano mai, kua liliu atu foki ke he fale, ti kitia ai e lautolu e fekafekau ne gagao, kua malolo tuai.

11 Ko e magaho pogipogi kua haele ai a ia ke he taha māga, ko Naina e higoa, kua fakalataha mo ia hana tau tutaki tokologa, mo e moto tagata ne tokologa.

12 Kua tata a ia ke he gutuhala he māga, kitiala, kua tauloto mai e tagata mate, ko e tama fuataha a ia he hana matua fifine, ko ia foki ko e takape; ha ha ia ia foki e tau tagata tokologa he māga ia.

13 Kua kikite atu e Iki kia ia, ti fakaalofa hohofi ai a ia kia ia, mo e tala age kia ia, Ua tagi a koe.

14 Kua haele age a ia, kua piki atu ke he fata, ti tutu ai a lautolu ne tauloto, ati tala age ai a ia, Ko e fuata na e, kua tala atu e au kia koe, Ati matike a.

15 Ti matike hake a ia ne mate kua vagahau; ti tuku atu e ia a ia ke he hana matua fifine.

16 Kua hoko kia lautolu oti e matakutaku, kua fakaheke atu a lautolu ke he Atua, kua pehe age, Kua tupu kia tautolu nai e perofeta kua mua; kua ahi mai foki he Atua hana motu.

17 Kua puloa ni ki Iutaia oti mo e fahi oti e tala nai kia ia.

18 Ko e tau tutaki a Ioane kua fakailoa atu kia ia e tau mena oti ia.

19 Ati ui atu ai e Ioane ke he tokoua e tutaki hana, kua fakafano atu a laua kia Iesu, kua pehe age, Ko koe kia ka haele mai? po ke leo atu a mautolu ke he taha?

20 Kua o age e na tagata ia kia ia, kua pehe mai, Kua fakafano mai e Ioane ko e papatiso a maua kia koe, kua pehe mai, Po ko koe kia ka haele mai? po ke leo atu a mautolu ke he taha?

21 Ko e magaaho ia ni kua fakamalolo ai e ia e tokologa ha i ai e tau gagao, mo e tau mamahi, mo e tau agaga kelea, kua foaki atu e ala ke he tau matapouli tokologa.

22 Ti tala age a Iesu kia laua, kua pehe age, Ati o atu a mua, mo e fakailoa kia Ioane e tau mena ne kitekite a mua ki ai, mo e fanogonogo ki ai; kua ala e tau matapouli, kua o e tau kulikuli, kua fakamea e tau lepela, kua māgi e tau teligatuli, kua fakamamatike a lautolu ne mamate, kua fakamatala e vagahau mitaki ke he tau tagata nonofogati.

23 Kua monuina foki a ia nakai tupetupe ha ko au.

24 Kua o a laua ne fakafano mai e Ioane, ti kamata ai a ia ke tala age ke he moto tagata kia Ioane, Na o atu a mutolu ke he tutakale ke mamata ha ha? Ko e kaho kia kua havilia he matagi?

25 Ka e o atu a mutolu ke kitia heinoa? Ko e tagata kia kua tapulu ke he tau tapulu molulu? Kitiala, ko lautolu ne tapulu he tau tapulu uho, mo e mitaki hololoa, ha ha he tau fale he tau patuiki a lautolu.

26 Ka e o atu a mutolu ke kitia heinoa? Ko e perofeta kia? E, kua tala atu e au kia mutolu, kua mua a ia ke he perofeta.

27 Ko ia haia ne tohi ki ai, Kitiala, to fakafano atu e au haku a fekafekau ki mua hau, ke tauteute e ia hau a puhala ki mua hau.

28 Ke tala atu foki e au kia mutolu, ko lautolu ne fanau mai he tau fifine, nakai fai perofeta ke mua kia Ioane ko e papatiso; ka ko ia ne tote ue atu he kautu he Atua, kua mua a ia kia ia.

29 Ti talahaua tututonu ai e Atua he tau tagata oti kana ne fanogonogo ai, katoa mo e tau telona he papatiso a lautolu ke he papatisoaga a Ioane.

30 Ka ko e tau farasaio mo e tau ako fakatufono kua papage atu e lautolu e pule he Atua ia lautolu he nakai papatiso e ia a lautolu.

31 Kua tala age e Iki, Ti ko e heigoa e mena ke fakatai e au ki ai e tau tagata he hau nai? ke lata a lautolu mo e ha ha?

32 Ne lata a lautolu mo e tau tama ikiiki kua nonofo he male mo e fetauheaaki, kua pehe age, Kua fakatagi a mautolu kia mutolu, ka e nakai kolikoli mai a mutolu; kua tagi ualoa a mautolu kia mutolu, ka e nakai tagi aue mai a mutolu. 33 Ha ko e mena hau a Ioane ko e papatiso, kua nakai kai areto, ti nakai inu uaina; ti pehe mai a mutolu, Ha ha ia ia e temoni.

34 Kua hau e Tama he tagata, kua kai a ia mo e inu; ti pehe mai a mutolu, Kitiala, ko e tagata kai lahi mo e inu uaina, ko e kapitiga he tau telona mo e tau tagata hala.

35 Ka e talahaua tututonu e pulotu he hana tau fanau oti.

36 Ko e taha he tau farasaio kua tala age kia ia ke kai mena a laua mo ia; kua hu atu a ia ke he fale he farasaio, ti takoto ai a ia ke taumafa ai.

37 Kitiala, ko e fifine he māga, ko e fifine hala a ia, kua kitia e ia kua takoto a ia ke kai mena ke he fale he farasaio, ti ta mai ai e ia e lupo alapasa kua puke ke he lolo manogi.

38 Kua tu a ia ki tua he tau hui hana, kua tagi, kua fakahihina hifo e ia e tau hihina mata ke he hana tau ve, mo e holoholo aki ke he hana lauulu, kua figita ke he tau ve hana, mo e fakatākai aki e magalolo manogi.

39 Ka kua kitia he farasaio ne tala age kia ia, ti kua manatu hifo a ia, kua pehe, Kane mai ko e perofeta e enei, po kua iloa e ia e fifine nai, mo e hana mahani, kua piki atu a ia kia ia; ha ko e fifine hala a ia.

40 Ati tala age ai a Iesu, kua pehe age kia ia, Ma Simona na e, ko e haku a kupu ke tala atu e au kia koe. Ti pehe mai a ia, Ko e akoako na e, tala mai a.

41 Ko e tokoua a tagata ne ogo tupe mai a laua he taha tagata; ne ogo taha lima geau a tenari, ka e limagofulu he taha.

42 Ti kua nakai fai tupe a laua ke liuaki, ti fakamagalo noa atu ai a ia kia laua tokoua. Tala mai a koe, po ko hai taha ia laua ne lahi hana fakaalofa kia ia?

43 Ti tala mai a Simona, kua pehe mai, Na ko ia ni ne fakamagalo atu ki ai e tau mena loga. Kua tala age a ia kia ia, Ko e moli a koe.

44 Kua hagao atu a ia ke he fifine, mo e pehe age kia Simona, Kua kitia nakai e koe e fifine nai? na hu mai au ke he hau a fale, ti nakai ta mai e koe ha magavai mo e na hui haku; ka ko ia ni, kua fakahihina hifo e ia e tau hihina mata mo e na hui haku, mo e holoholo aki ke he hana ni a lauulu.

45 Nakai fakafigita mai e koe au; ka ko ia ni, kua nakai oki he figita a ia ke he haku tau hui tali mai he hu mai au.

46 Nakai fakauku mai e koe hoku ulu ke he magalolo noa; ka ko ia ni, kua fakatākai e ia haku a tau hui ke he magalolo manogi.

47 Ko e mena ia ke tala atu ai e au kia koe, Kua fakamagalo tuai hana tau hala loga, ha ko e mena kua fakaalofa lahi mai a ia; ka ko ia kua fakamagalo ki ai taha mena tote, kua tote foki hana fakaalofa mai. 48 Kua tala age a ia kia ia, Kua fakamagalo tuai hau a tau hala.

49 Ko lautolu ne tatakoto ke kai mena, kua pehe hifo a lautolu ke he tau loto ha lautolu, Ko hai foki hanai kua fakamagalo e tau hala?

50 Kua tala age a ia ke he fifine, Kua moui tuai a koe he hau a tua; ati fano a mo e monuina.