Mareko

9 NE tala age foki a ia kia lautolu, Ko e moli, ke tala atu e au kia mutolu, ha ne tutu mai falu i hinai, nakai hoko kia lautolu e mate, ato kitia e lautolu e kautu he Atua kua hoko mai mo e malolo.

2 Kua mole e aho ono, ti uta ai e Iesu a Peteru, mo Iakopo, mo Ioane; ti ta hake e ia a lautolu ke he mouga tokoluga, hoko lautolu ni, kua faliu foki a ia ki mua ha lautolu.

3 Ti kikila ai hana tau tapulu, kua hina ni mo e vakevake noa, tuga ne kiona; nakai fakai foki ha tagata unu tapulu ke he lalolagi ke maeke ia ia he fakahina pihia.

4 Kua fakakite mai foki kia lautolu a Elia mo Mose, kua fevagavagahauaki a lautolu mo Iesu.

5 Ti tala age ai a Peteru kia Iesu, kua pehe age, Rapai na e, mitaki he nonofo a tautolu i hinai; to ta ai e mautolu tolu e fale api, māu taha, ma Mose taha, ma Elia foki taha.

6 Ha kua nakai iloa e ia e kupu ke talahau; ko e mena matakutaku lahi a lautolu.7 Ti hoko mai e aolagi, kua ufia ai a lautolu, ti hau ai e leo mai loto he aolagi, kua pehe mai, Ko e haku a Tama fakahele hanā, kia fanogonogo a a mutolu kia ia.

8 Ti kitekite fano fakatepetepe ai a lautolu, kua nakai tuai kitia taha, ko Iesu hokoia ni mo lautolu.

9 Ha ne o hifo a lautolu he mouga, ti hataki atu e ia a lautolu, neke talahau atu e lautolu kia taha e tau mena ne kitia e lautolu, ato tu mai e Tama he tagata ia lautolu kua mamate.

10 Ati taofi ai e lautolu e kupu ia, mo e fekumiaki, po ke heigoa e liu foki tu mai ia lautolu kua mamate.

11 Ti hūhu atu a lautolu kia ia, kua pehe atu, Ko e heigoa e mena ne tala mai ai e tau tohikupu, to hau fakamua a Elia ke lata ai?

12 Ti tala age a ia, kua pehe age kia lautolu, To hau fakamua moli a Elia, mo e liu fakafou ai e tau mena oti; ti fefe e mena ne tohia ke he Tama he tagata, ke mamahi ai a ia he tau mena loga, mo e vihiatia foki a ia?

13 Ka e tala atu e au kia mutolu, kua hau tigahau a Elia, ne eke foki e lautolu kia ia e tau mena no loto a lautolu ki ai, tuga ne tohi tuai kia ia.

14 Kua hoko atu a ia ke he tau tutaki, ti kitia ai e ia e tau tagata tokologa, kua agaagai a lautolu, katoa mo e tau tohikupu, ha ne hūhu ai kia lautolu.

15 Kua kitia a ia he tau tagata oti, ti hopo ai agataha ha lautolu a tau ate, kua tafepoi atu a lautolu mo e fakaalofa atu kia ia.

16 Ne hūhu foki a ia ke he tau tohikupu, Po ke heigoa e mena ne hūhu ai a mutolu kia lautolu?

17 Ti tala age ai taha mai he moto tagata, kua pehe age, Ko e akoako na e, kua ta mai tuai e au haku a tama tane kia koe, ha i ai e agaga kuhukuhu.

18 Ko e tau mena oti ne moua ai a ia, kua palu hifo a ia; ti ifo e gutu, mo e konoi hana tau nifo, kua mao kikiha foki hana a tino; ti kua tala age tuai e au ke he tau tutaki hau kia vega ai e lautolu a ia, ka e nakai maeke kia lautolu.

19 Ti tala age ai a ia kia ia, kua pehe age, Ko e hau nakai tua na e, to fakalataha a tautolu mo mutolu ato a fe? to fakauka foki au kia mutolu ato a fe? ati ta mai a a ia kia au.

20 Ti ta atu ai e lautolu a ia kia ia; kua kitia e ia a ia, ti fakafitikia ai agataha a ia he agaga, ti veli ai a ia ke he kelekele, kua miko fano ai a ia, mo e ifo hana a gutu.

21 Ti hūhu age a ia ke he matua tane hana, Ko e vaha fe ne hoko ai e mena na kia ia? Ti tala age ai e ia, Tali mai he tote;

22 Kua liti mau foki a ia ke he afi, katoa mo e vai kia kelipopo ai a ia; kaeke ke maeke ia koe ha mena, kia fakaalofa mai a a koe kia mautolu, mo e lagomatai mai a koe kia mautolu.

23 Kua tala age ai a Iesu kia ia Kaeke kua maeke ke tua a koe, kua maeke e tau mena oti kana ke he tagata kua tua.

24 Ati ui mai ai agataha e matua he tama, kua pehe mai mo e tau hihina mata, Ko e Iki na e, kua tua ni au; kia lagomatai mai a a koe ke he haku a nakai tua.

25 Kua fioia e Iesu, kua tafepoi mai e moto tagata, ti hataki ai e ia e agaga kelea, kua pehe kia ia, Ko koe na, e agaga kuhukuhu mo e teliga tuli, kua tala atu ni e au kia koe, ati hau a ki fafo ia ia; aua foki neke liu hu a koe ki loto ia ia.

26 Ati fakatutu ai e agaga mo e fakafitikia lahi ai a ia, ti hau ai ki fafo, kua faliu tuai a ia tuga ne tagata kua mate; ti kua pehe ai e falu ne tokologa, Kua matepopo tuai a ia.

27 Ka ko Iesu kua toto e ia hana lima, mo e fakatu a ia, ti matike ai a ia.

28 Kua haele age a Iesu ke he fale, ti hūhu age ai hana tau tutaki kia ia, hoko lautolu ni, Ko e heigoa e mena nakai maeke ai ia mautolu ke vega a ia?

29 Ti tala age a ia kia lautolu, Ko e liogi mo e fakakanopogi hokoia ke maeke ai he fano kehe e tau mena pehena.

30 Kua toka foki e lautolu e mena ia, kua o age hala Kalilaia; ko e hana finagalo foki, aua neke kitia he taha a ia.

31 Ha kua fakaako atu a ia ke he hana tau tutaki, mo e tala atu kia lautolu, Kua tuku atu e Tama he tagata ke he tau lima he tau tagata, to kelipopo foki e lautolu a ia; ka oti he keli a ia, ti liu foki tu a ia ke he aho tolu.

32 Ka e nakai maama e kupu ia kia lautolu, ti matakutaku a lautolu ke hūhu age kia ia.

33 Kua hoko a ia ki Kapanaumi, ha he fale, ti hūhu ai a ia kia lautolu, Ko e ha ne taufetoko ai a mutolu ke he magahehala?

34 Ka e fakafenono a lautolu; ha ko e mena ne taufetoko a lautolu ke he magahehala, po ko hai ia lautolu ke mua.

35 Kua nofo a ia ki lalo, ti ui atu ai ke he tokohogofulu ma ua, kua tala atu kia lautolu, Kaeke ke loto taha kia mua a ia, ti muikau a ia ke he tau tagata oti kana, mo e fekafekau a ia he tau tagata oti.

36 Ti toto ai e ia e tama tote, kua fakatu a ia ki mua ha lautolu, kua nikiti e ia a ia ke he hana tau lima, ti tala age ai kia lautolu,

37 Ko e tagata ka talia e tama tote pehenai he haku a higoa, kua talia e ia au; ko e tagata ka talia mai e ia au, nakai ko au kua talia e ia, ka ko ia ni ne fekau mai au.

38 Ti tala age ai a Ioane kia ia, kua pehe age, Ko e akoako na e, ne kitia e mautolu taha ha ne vega e tau temoni ke he higoa hāu, kua nakai mui mai a ia kia tautolu, ti hataki e mautolu a ia, he nakai mui mai a ia kia tautolu.

39 Ka e pehe age ai a Iesu, Ua hataki a ia e mutolu; ha kua nakai fai tagata ke eke mana he haku a higoa nai, ti maeke ia ia ke vagahau fakaave ha kupu kelea kia au.

40 Ha ko e tagata nakai kau kehe kia tautolu, ko e kau fakalataha a ia mo tautolu.

41 Ko e tagata foki ke atu e ia e taha kapiniu vai kia mutolu he haku a higoa nai, ha ko e ha Keriso a mutolu; ko e moli, ke tala atu ne au kia mutolu, nakai moumou e ia hana taui.

42 Ko e tagata ka fakatupetupe e ia taha he tau tagata fakateaga nai kua tua kia au, po kua laukauka e tagata ia ane pipi e makaholo ke he hana ua, mo e liti ai a ia ke he moana.

43 Ka tupetupe foki a koe he hau a lima, ati hio kehe a; mena mitaki kia hu atu a koe ke he moui mo e lima kune, ka e kelea ke lima ua ke fano ki Kehena, ke he afi nakai maeke ke tamate;

44 Ha i ai nakai mate ha lautolu a uaga, nakai tamate foki e afi.

45 Ka tupetupe foki a koe he hāu a hui, ati hio kehe a; mitaki ke hu atu a koe ke he moui mo e hui taha, ka e kelea ke ua e hui ke liti ki Kehena, ke he afi nakai maeke ke tamate.

46 Ha i ai nakai mate ha lautolu a uaga, nakai tamate foki e afi.

47 Ka tupetupe foki a koe he hāu a mata, ati kape a; mitaki ke hu atu a koe ke he kautu he Atua mo e mata taha, ka e kelea ke mata ua ke liti ke he afi i Kehena;

48 Ha i ai nakai mate ha lautolu a uaga, nakai tamate foki e afi.

49 Ha ko e mena takitaha mo e fakamasima ke he afi, to takitaha foki e tau poa oti mo e fakamasima ni ke he masima.

50 Ko e mena mitaki e masima, kaeke ke magalo e masima, ato fakakona aki ha ha e mutolu? Kia ha ha ia mutolu e masima, kia mafola foki a a mutolu ia mutolu.