Tau Salamo

144 KIA fakamonu kia Iehova, ko e haku a maka tumau, ko ia ne fakaako haku tau lima ke tau, mo e haku a tau matalima ke tau.

2 Ko ia ne fakaalofa mai kia au; ko e haku a kolo foki a ia, ko e haku a taue tokoluga; ko e haku a fakamoui, ko e haku akau punuti, ko ia foki ne tua au ki ai; ko ia ne fakamahala haku motu kia au.

3 Iehova na e, ko e heigoa kia e tagata kia iloa ai e koe a ia? po ke tama he tagata kia manatu ai e koe a ia?

4 Ko e tagata, tuga ne mena nakai aoga a ia; ko e hana tau aho tuga ne ata ia kua mole atu.

5 Iehova na e, kia ue hifo e koe hāu a lagi, mo e haele hifo a koe; kia pipiki atu ke he tau mouga, ti ahua ai ni.

6 Kia fakakapa mai e koe e uhila, mo e fakamavehevehe a lautolu; kia fana atu e koe hāu a tau fana, mo e tutuli a lautolu.

7 Kia fakaolo mai hāu a tau lima mai luga, laveaki mai ā e koe au; kia fakamoui au mai he tau vai loga, ko e tau lima he tau tagata kehe;

8 Ko lautolu, kua to mai ai he tau gutu ha lautolu e tau kupu pikopiko; ko e ha lautolu a tau lima matau foki ko e tau lima matau fakavai ia.

9 Ko e Atua na e, to lologo atu e au e lologo fou kia koe; to uhu lologo e au kia koe mo e napeli filo hogofulu.

10 Ko ia ne ta atu e fakamouiaga ke he tau patuiki; ko ia ne laveaki a Tavita hana fekafekau mai he pelu ke kelea ai.

11 Kia laveaki e koe au, mo e fakamoui au mai he tau lima he tau tagata kehe, ko lautolu ne to mai ai he tau gutu ha lautolu e tau kupu pikopiko; ko e ha lautolu a lima matau foki ko e lima matau fakavai ia;

12 Kia eke ha mautolu a tau tama tane ke tuga e tau akau kua to, kua tupu lahi ka kua fuata a lautolu; mo e ha mautolu a tau tamāfine ke tuga e tau maka he malokuaga kua taute ke lata mo e faituga.

13 Kia puke ha mautolu a tau fale saito, kia moua mai ai e mautolu taha mena mo e taha mena; kia fanau mai ha mautolu a tau fuifui mamoe ke afe mo afe ke he ha mautolu a tau fonua.

14 Kia lahi e tau kavega he tau povi ha mautolu; kia nakai oho mai, kia nakai fano kehe; kia nakai fai tagi ke he ha mautolu a tau male.

15 Uhoaki e motu kua pehenā a lautolu; uhoaki e motu kua eke a Iehova mo Atua ha lautolu.