Tau Salamo

96 KIA lologo atu a mutolu kia Iehova ke he lologo fou; ko mutolu gotoa ha he lalolagi, kia lologo atu kia Iehova.

2 Kia lologo atu a mutolu kia Iehova, kia fakamonu ke he hana higoa; kia fakamatala atu e mutolu hana fakamouiaga ke he taha aho mo e taha aho.

3 Kia tokutoku atu hana lilifu ke he tau motu kehe, mo e hana tau mana ke he tau motu oti kana.

4 Ha kua homo a Iehova, ti lata ni ke fakaheke fakalahi kia ia; kua mua e matakutaku kia ia ke he tau atua oti.

5 Ha ko e tau tupua e tau atua oti he tau motu; ka ko Iehova, ne eke e ia e lagi.

6 Ha ha i mua hana e fakahekeaga mo e fulufuluola; ha he faituga hana e malolo mo e lilifu.

7 Ko mutolu ko e tau magafaoa he tau motu, kia ta atu e mutolu kia Iehova, kia ta atu e mutolu kia Iehova e lilifu mo e malolo.

8 Kia ta atu kia Iehova e fakahekeaga he hana higoa; kia uta e mutolu e tau poa, mo e huhu atu a mutolu ke he hana lotopa.

9 Kia hufeilo a mutolu kia Iehova mo e tau mena tapu kua fulufuluola; kia vivivivi ki mua hana a mutolu ko e lalolagi oti.

10 Kia tala atu e mutolu ke ke tau motu kehe, Ko e patuiki a Iehova; kua fakamau foki e lalolagi neke gahuahua; to fakafili e ia e tau motu mo e tonu.

11 Kia fiafia e lagi, mo e olioli e lalolagi; kia go mai e tahi mo e tau mena kua puke ai.

12 Kia fiafia e fonua mo e tau mena oti ha i ai; ti kalaga fiafia ai e tau akau oti he kavei,

13 Ki mua a Iehova; ha kua haele mai a ia, ha kua haele mai a ia ke fakafili e lalolagi; ke fakafili e atu motu mo e tututonu, mo e tau motu ke he hana fakamoli.