Tau Salamo

31 IEHOVA na e, kua tua ni au kia koe, aua neke fakama au ke tukulagi; kia laveaki mai e koe au ke he hāu a tututonu.

2 Kia haga mai hau a na teliga kia au, kia laveaki fakaave mai e koe au; kia eke a koe mo maka tumau māku, ko e poko he kolo ke moui ai au.

3 Ha ko koe ni ke e haku a maka tumau, mo e haku a kolo; kia takitaki mo e leveki e koe au ha ko e hau a higoa.

4 To uta kehe e koe au mai he kupega kua fufu e lautolu ke moua ai au; ha ko koe ni ko e haku a taue.

5 Kua tuku atu e au haku a agaga ke he hau a lima; kua fakamoui e koe au, ma Iehova na e, ko e Atua fakamoli.

6 Kua vihiatia e au a lautolu kua taofi e tau mena fakateaga mo e pikopiko; ka e tau ni au kia Iehova.

7 To fiafia au mo e olioli ke he hāu a fakaalofa mai; ha ko koe kua kitekite mai ke he haku a mamahi; kua fioia e koe au ka kua matematekelea au.

8 Kua nakai tuku atu foki e koe au ke he pule ha lautolu kua fai fi kia au; kua fakatu e koe haku tau hui ke he mena pulahi.

9 Iehova na e, kia fakaalofa mai a koe kia au, ha kua matematekelea au; kua tutue haku a mata, mo e haku a agaga, mo e haku manava, ke he mamahi.

10 Ha kua fakaoti haku a moui he mānu, mo e haku a tau tau he oi; kua matagataga haku a malolo ha ko e tau hala, kua popo haku a tau huimotua.

11 Kua fakamā au e lautolu oti kua fai fi kia au, ka e au atu ni e lautolu kua katofia mo au; kua eke au mo fakamatakutaku ke he haku tau kapitiga; kua fehola kehe ia au a lautolu ne kitia au ke he puhala.

12 Kua fakanimonimo au tuga ne tagata mate, nakai manatu ni; kua tatai au mo e kapiniu malipilipi.

13 Ha kua logona e au e tokologa ne eke fakakelea mai; kua agaagai au he matakutaku, he pulega fakalataha a lautolu kia au, ne eke lagatau e lautolu ke mate ai au.

14 Ka ko au nai, kua tua au kia koe Iehova na e, kua pehe atu au, Ko koe ni ko e haku a Atua.

15 Ha he lima hāu haku a tau aho; kia laveaki e koe au mai he tau lima ha lautolu ne fai fi kia au, mo e lautolu ne tutuli au.

16 Kia fakakikila mai hāu a na fofoga ke he hau a fekafekau; kia fakamoui e koe au ke he hau a fakaalofa noa.

17 Iehova na e, aua neke fakamā au, ha kua ui atu au kia koe; kia fakamā a lautolu kua mahani kelea, kia fakamamate a lautolu ke he tukuaga.

18 Kia fakamamate e tau laugutu pikopiko; ko lautolu kua vagahau fakahakehake mo e fakatokoluga, mo e fakalialia ke he tagata tututonu.

19 Kua lahi mahaki hāu a totonu kua taute e koe ma lautolu kua matakutaku kia koe, kua eke e koe ki mua he fanau he tau tagata ma lautolu kua tua kia koe,

20 To fufu e koe a lautolu ke he mena galo ki mua hāu, neke hoko kia lautolu e tau pulega he tau tagata; to fufu e koe a lautolu ke he hāu a fale api, neke hoko kia lautolu e taufetoko he tau alelo.

21 Fakaaue kia Iehova ha kua fakahomo e ia hana fakaalofa kia au ke he māga kua puipui.

22 Ko au foki ne pehe atu ke he haku a fakahahaku, Kua tiaki tuai a au mai mua hāu; ka kua fanogonogo mai a koe ke he haku a ole atu he kalaga atu au kia koe.

23 Kia fakaalofa a mutolu kia Iehova ko mutolu oti kana hana tau tagata tapu; kua leveki e Iehova a lautolu kua fakamoli, ka e taui fakalahi e ia a lautolu kua mahani fakatokoluga.

24 Kia fakamalolo a mutolu ko mutolu oti kana kua amaananaki kia Iehova; to fakamalolo e ia ha mutolu a tau loto.